Okkar ástkæri Vilhjálmur Einarsson, til heimilis að Goðatúni 3 Garðabæ, lést á Sólvangi föstudaginn 31. desember.
Útför Vilhjálms fer fram frá Garðakirkju í Garðabæ 7.jan 2021

Þökkum starfsfólki Sólvangs, vinum og ættingum fyrir kveðjur og mikinn stuðning.

[DEFAULT]

Ég á svo erfitt með að trúa að þú sért farinn. Og þó okkur líði vel að vita að þú þjáist ekki lengur þá er eitthvað svo tómt hér án þín. Ég á svo mikið af góðum minningum, enda alltaf verið algjör pabbastelpa. Yngsta barnið, dekurdísin hans pabba síns. Þú varst alltaf svo duglegur að leyfa mér að koma með þér hvert sem er, í vinnuferðir útá land, söngferðir með kórnum ykkar mömmu, í vinnuna hvort sem var uppá velli hjá Varnarliðinu eða á földunarverkstæðið, sem var eins og að leika sér í teppahimnaríki fyrir okkur krakkana. Allra bestu minningarnar eru þegar við kúrðum saman fyrir háttinn í ykkar rúmi og þú fórst með bænirnar með mér. Ég naut þess svo að fá alla athygli þína og geta spjallað við þig um allt og ekkert. Bara við tvö. En þú hefur líklega verið búinn að fá nóg þegar þú settir regluna „Ásdís, það má ekki tala þegar maður er búinn að segja Amen, nú verðuru að byrja uppá nýtt“. 

Pabbi var yndislegur maður. Það sem einkenndi hann var hvað hann var sanngjarn, heiðarlegur, gamansamur, félagslyndur og einstaklega barngóður og mikill dýravinur. Hann var alla tíð einstaklega duglegur og vinnusamur. Maður man hann varla öðruvísi en vinnandi frá eldsnemma að morgni og oft langt frammá kvöld. Alla mína tíð átti hann og rak földunarverkstæði og var teppalagningarmaður. Hann var mikill söngmaður, söng með Skagfirsku söngsveitinni ásamt mömmu, og söng með Fóstbræðrum líka. Þegar hann varð gamall þá þótti honum leiðast að hann væri búinn að missa söngröddina. Hann hafði líka gaman af að spila. Var mikill bridge maður og ef hann var einn þá var hann mikið að leggja kapal og svo vorum við með snóker borð í bílskúrnum sem veitti honum mikla gleði. Hann var mikill keppnismaður og þótti nú ekki gaman að tapa. Enda sem betur fer vann hann oftast. 

Þetta síðasta ár hefur verið vægast sagt erfitt. 

Pabbi lést á Sólvangi á gamlárskvöld kl 23:50. Við systur og elsku Beta systurdóttir mín og jafnaldra sátum hjá honum fyrr um kvöldið og rifjuðum upp að mamma sendi hann alltaf út að sprengja með okkur krökkunum kl 23:50 þegar við vorum yngri. Við systkini, mamma og nokkur barnabörn náðum að vera með honum síðasta daginn. Ég er svo þakklát og ánægð að hafa verið með honum þegar hann kvaddi, svo friðsæll og loks laus við verki og kvalir. 

Elsku pabbi. Ég verð alltaf litla stelpan þín. Ég og strákarnir mínir munum alltaf sakna þín, þú átt stóran hlut í hjörtum okkar. Ég veit þú passar okkur og fylgist með okkur. 

Þín Ásdís, Árni Kr og afastrákarnir Daníel Einar, Óskar Örn og Róbert Ingi.

﻿Með ást þinni kenndir þú mér að elska.

﻿Með trausti þínu kenndir þú mér að trúa.

﻿Með örlæti þínu kenndir þú mér að gefa.

Minningarsíður

Nýleg andlát

Útfarir

Hlaðvarp

Þjónustusíða

Fræðsluefni

Vilhjálmur Einarsson

Andlátstilkynning

Útför

Aðstandendur

Þakkir

Elsku pabbi minn