Elskuleg móðir okkar, tengdamóðir, amma og langamma Vilborg Fríður Björgvinsdóttir (Bíbí) lést á Hömrum þann 1. mars 2022. Eiginmaður hennar var Jóhannes Sigurðsson sem lést 2014

Útförin fer fram í Kópavogskirkju miðvikudaginn 16. mars 2022 kl 11:00 

Blóm og kransar eru vinsamlegast afþakkaðir en við bendum þeim sem vilja minnast hennar á Góðvild styrktarsjóð sem vinnur fyrir langveik börn og börn með fatlanir 

Vilborg Fríður Björgvinsdóttir, sem var alltaf kölluð Bíbí, fæddist á Ísafirði 7. október 1935. Hún lést á hjúkrunarheimilinu Hömrum 1. mars 2022. 

Foreldrar hennar voru Björgvin Egill Pálsson f. 31.12.1911 d. 12.7 1949 og Jóhanna Jónasdóttir f. 2.5.1915 d. 20.07. 1984

Jónas Páll Björgvinssson f 1937, en hann lést 38 ára,                Birgir Björgvinsson fæddur 1939 og                                               Björk Björgvinsdóttir fædd 1945. 

Börnin fæddust öll á Ísafirði nema yngsta systirinn því fjölskyldan flutti árið 1945 til Reykjavíkur og settist að á Bræðraborgarstíg en svo var keypt hús í Skerjafirðinum að Þvervegi 14.                             Á fermingarárinu hennar Bíbíar verður risastórt áfall í fjölskyldunni  þegar faðir hennar fór fyrir borð á Skógarfossi þá 38 ára að aldri, hann næst lifandi upp úr sjónum en fær hjartaáfall þegar hann er komin aftur um borð og deyr. Bíbí og móðir hennar héldu utan um barnahópinn eins og Birgir bróðir hennar lýsir því og hann minnist þess  í þakklæti hvað stóra systir var dugleg og styðjandi. Bíbí hafði gengið í grunnskóla á Ísafirði og lauk skólaskyldunni en svo fór hún að vinna í fiski til að hjálpa móður sinni að framfleyta fjölskyldunni.                                      Síðar fór Bíbí, sem ung kona, að vinna í Kron í Skerjafirðinum og þar hitti hún Jóhannes Sigurðsson í fyrsta sinn.  Hún var með vinkonu sinni og hann kemur á bíl sem hann átti sem var óalgengt með unga menn á þeim tíma og bauð henni í bíltúr.  Þá var Bíbí 16 ára en Jóhannes 18 ára. Synir þeirra eru sannfærðir um að þetta hafi verið ást við fyrstu sýn því eftir þennan bíltúr var ekki aftur snúið. Þau hófu búskap sinn á loftinu í húsi móður hennar í Skerjafirðinum, en þaðan var svo flutt í Kópavoginn og þar átti fjölskyldan heima í tvo áratugi. Síðar flytja þau hjónin í Reyrengi í Grafarvoginum þar sem þau bjuggu í tæplega tuttugu ár. En Bíbí bjó síðast á Vesturgötu 7 áður en hún fór á dvalarheimili.          

Saman áttu þau Bíbí og Jóhannes fimm syni:                                                        Björgvin Hólm f. 1956,                                                                       Bjarni Sigurður f. 1958, maki Björg Dagmar Jóhannesson,         Bjarki Þór f. 1963, maki Steingerður Kristjánsdóttir,               Sigurður Hólmar f. 1970, maki Ragnheiður Erla Hjaltadóttir og Jóhannes Birgir f. 1973 maki Glicia Gomes. 

Þau hjónin stóðu fallega saman og nutu þess að ganga og njóta útiveru.  Þau áttu það sameiginlegt að hlúa vel að því sem þeim var trúað fyrir.  Jóhannes færi minnissjúkdóm aðeins 64 ára að aldri en sem betur fer þróaðist sjúkdómurinn hægt og hann gat lokið sinni starfsævi 67 ára gamall, en hann lifði með sjúkdóminn í sautján ár og lést í október árið 2014. Að sjálfsögðu stóð Bíbí með sínum eiginmanni og var á vaktinni alveg til enda.

Bíbí vann við hin ýmsu störf en lengst af sem matráður við Digranesskóla í Kópavogi. 

Bíbí lifði bæði gleði og sorgir í gegnum langa ævi.                    Fyrsta ömmustelpan Sunna Valdís er greind með sjaldgæfan taugasjúkdóm og amma Bíbí hélt vel utan um hana og fyrsta barnabarnið, Arnar Óli Bjarnason lést aðeins 27 ára að aldrei og var henni og fjölskyldunni allri mikill harmdauði.                             En Bíbí lifði líka þá blessun að eignast ellefu barnabörn og fjögur langömmubörn.                                                                                  Bíbí, far þú í friði, friður Guðs þig blessi, hafðu þökk fyrir allt og allt.

Sigurður Hólmar Jóhannesson

þegar við kveðjum Bíbí  æsku vinkonu mína fer margt í gegnum hugann.Við erum báðar aldar upp í Skerjafirði. Nokkur ár fór ég í burtu en kom svo aftur  og þá vorum við  báðar með mann og börn . Mér er mjög minnsstætt  margar ferðir okkar með barnavagna og  barnahóp á labbi upp á Grímsstaðarholt að kaupa brauð og fisk . þetta er nú löngu liðin tíð  en góðar minningar. Alltaf hefur verið gott samband bæði hjá okkur og börnunum okkar.   það var alltaf gott að koma til Bíbí hlýjar móttökur og heitt kaffi. Síðustu árin hafa verði erfið en alltaf brosti hún þegar ég koma til hennar en hún var á Hömrum síðustu árin. Við munum sakna hennar öll  Blessuð sé minning hennar og innilegar samúðarkveðjur til fjölskyldu hennar.
Valva

[DEFAULT]

Nú ert þú komin á betri stað, vil ég trúa. Á göngu með pabba og Tumi hoppandi og skoppandi í kringum ykkur. Það er bjart í kringum ykkur og þið eruð hamingjusöm. Þetta vona ég og trúi.

Það er sárt að kveðja en því fylgir líka léttir því að þú hefur átt erfiða daga undanfarin ár. Andlegt þrek þitt minnkaði með hverju árinu og að lokum vann sjúkdómurinn. Þrátt fyrir allt varstu alltaf glöð þegar fólkið þitt kom í heimsókn. Þú varst jákvæð og glöð alveg fram á síðasta dag. Brosandi og með þennan dillandi hlátur, sem gladdi aðra. Þú varst jákvæðasta manneskja, sem ég hef þekkt. Þú bölvaðir aldrei og þú talaðir ekki illa um nokkurn mann. 

Alveg frá því að þú varst unglingur þá sást um einhverja. Fyrst annaðistu systkini þín, síðan syni þína, okkur strákana og síðan barnabörn og langömmubörn. Minnstu börnin þín færðu þér mikla gleði. Þú varst þeim svo góð að yndislegt var að sjá. Alltaf varstu tilbúin með afmælisgjafirnar daginn fyrir afmælið og gjafirnar hittu alltaf í mark. Jafnvel fötin fyrir unglingana smellpössuðu og glöddu. Þú varst einfaldlega ofuramma og þú elskaðir öll börnin þín skilyrðislaust og eins og þau voru. Þú gerðir allt fyrir börnin þín og þú skammaðir þau aldrei. Skammirnar sem ég fékk frá þér á allri ævinni er hægt að telja á fingrum annarrar handar og átti ég þær allar svo sannarlega  skilið og fleiri til. En þú þurftir ekki að skamma fólkið þitt því maður vildi gera allt sem maður gat fyrir þig. Þú áttir það svo skilið. Þú áttir skilið allt gott í þessum heimi, elsku mamma mín.  

Þú varst mjög hæfileikarík á mörgum sviðum. Þú prjónaðir og heklaðir og gerðir flos listaverk. Á seinni árum þá fórstu á námskeið í listmálun og eftir þig standa nokkur listaverk. Í eldhúsinu töfraðir þú fram veislur á svipstundu og það var alltaf nóg til að borða hjá þér. Þú varst ánægðust með allt fólkið þitt í kringum þig og allir saddir og glaðir. Þú varst líka ótrúlega minnug bæði á nöfn og andlit. Þú gast rakið heilu fjölskyldurnar og ættirnar. Þú mundir líka alla afmælisdaga. Þess vegna var það sérstaklega sorglegt þegar sjúkdómurinn rændi þig þessu einstaka minni.

Þú varst svo einstök manneskja, elsku mamma mín, að það er ekki hægt að lýsa því. Maður þurfti að upplifa það. Heimili þitt og pabba var alltaf opið öllum vinum okkar bræðra og var það oft kallað félagsheimilið. Allir voru velkomnir á heimili þitt.

Þú varst ótrúleg hógvær, mamma, og lítillát. Þú gerðir alltaf lítið úr öllum þínum verkum og hæfileikum. Stundum fannst mér þú of lítillát en þannig varst þú. Þú beiðst þolinmóð og varst ánægð með það sem þú fékkst.

Það var alltaf gott að koma í heimsókn til þín. Á tímabili, fyrir nokkuð mörgum árum síðan, þá kom ég í heimsókn til þín og við horfðum saman á Nágranna í sjónvarpinu. Þessi minning situr í mér. Þessi stund var einhvern veginn okkar. Afslappandi og yndisleg í einfaldleika sínum. 

Mamma mín, það er engu líkara en að ég sé að lýsa dýrlingi en það varstu í raun og veru þegar maður lítur yfir ævi þín og verkin öll. Þú auðgaðir líf okkar og gerðir okkur að betri manneskjum. Ef þú værir hjá mér núna myndirðu segja að ég væri að ýkja og það væri fullt af betri manneskjum en þú þarna úti. Vonandi en ég efast um það, elsku mamma. 

Í mínum huga ertu fallegasta og besta manneskja í heimi og ég sakna þín alveg óskaplega mikið, elsku mamma mín.

Elsku mamma, þú varst sú allra besta. Ég þekki ekki marga sem áttu eins innilegt og gott samband við mömmu sína eins og ég átti við þig. 

Þú passaðir alltaf uppá að veita okkur bræðrunum allt sem við þörfnuðumst þegar við vorum ungir og hélst svo áfram að aðstoða okkur gegnum lífið með okkar börn. 

Svo þegar að undan fór að halla hjá þér þá kom að mér að hjálpa þér sem ég gerði með mikilli ánægju. Þó svo að alzheimer hafi tekið nánast allt frá þér þá náði sjúkdómurinn aldrei að taka ljúfa persónuleikann og starfsfólkið á Hömrum talaði alltaf um hversu yndisleg þú varst þrátt fyrir allt sem þú varst að ganga í gegnum. 

Undir það síðasta spurði ég þig hvort þú værir tilbúin að fara til pabba og svarið var afdráttarlaust „já“ og það gerði það auðveldara fyrir mig að kveðja þig þó svo að það hafi auðvitað verið erfitt og mun halda áfram að vera erfitt enda tómarúmið mikið. 

Við vitum að þú ert núna með pabba og Mána að ganga í Sumarlandinu og við munum alltaf geta hlýjað okkur við minningarnar um ykkur. 

Minningarsíður

Nýleg andlát

Útfarir

Hlaðvarp

Þjónustusíða

Fræðsluefni

Vilborg Fríður Björgvinsdóttir

Andlátstilkynning

Útför

Aðstandendur

Þakkir

Elsku mamma mín

Minningarorð um mömmu