Ástkær eiginkona mín, móðir okkar, tengdamóðir, amma og langamma, Vibeke A. Jonsson, lést á Hrafnistu Hafnarfirði þann 9. ágúst sl. 
Útför hennar hefur farið fram í kyrrþey.

Fjölskylda og aðstandendur Vibsí þakka sérstaklega starfsfólki Hrafnistu í Hafnarfirði fyrir góða umönnun og kærleik. Þakkir til allra fyrir hlýhug vegna andláts Vibsí. 

Vibeke A. Jonsson fæddist 9. apríl 1941 í Odense Danmörku. Móðir hennar var Guðrún Aðalbjörg Guðnadóttir frá Neskaupstað og faðir hennar var Sven Åge Madsen frá Odense í Danmörku. Vibeke átti tvo bræður, Thorbjorn og Ingólf.

Vibsi mamma, amma og langamma eins og hún var kölluð, sleit barnskónum í Danmörku. Hún fór í lyfjatækninám í Odense eftir grunnskóla, og kynnist þar Sigga pabba afa og langafa sem stundaði nám í véltæknifræði. Fljótlega eftir að þau kynnast, giftu þau sig í Danmörku. Siggi átti dóttur fyrir á Íslandi og heitir hún Guðrún, kölluð Guja, sem Vibsí tók ástfóstri við frá fyrsta degi sem var og gagnkvæmt og áttu þær fallegt samband alla tíð.

Eftir að þau luku námi fluttu þau til Íslands. Og þá sagði mamma hennar, „ég get alveg eins sent þig til helvítis frekar en að flytja til Íslands“.

Ungu hjónin fóru samt til Íslands 1960 og nokkrum árum síðar fæðist Chacha og eftir fæðingu hennar fluttust þau til Ameríku árið 1965. Í Ameríku fæddust svo kúkalabbarnir Þórsi og Pési. Dvöl þeirra í Ameríku var stutt, eða í 8 ár en þá fékk Siggi heimþrá og aftur fluttu þau á helvítis klakann (1973) 

Á Íslandi bjuggu þau í 17 ár og margar góðar minningar frá þeim árum og má þar helst nefna ferðarnar í Eden til þess að skoða stóru plönturnar eins og t.d. pálmana, sem gátu ekki verið nógu stórar í hennar augum og ein ferðin sem stóð uppúr var þegar hún keypti stóran pálma sem öll fjölskyldan var búin að safna fyrir. Honum var skellt í skottið á Trabantinum en það var svo mikil hálka að Vibsí bakkaði bílnum upp alla Kambana og þótti ekkert tiltökumál.

Þau fluttu svo aftur til Wisconsin árið 1990 og aftur á Klakann árið 2008.

Hvert sem Vibsí fór var hún hrókur alls fagnaðar og átti stóran vinahóp. Vibsí var mjög félagslynd og var mjög dugleg alla tíð, hún hafði gaman af því að bjóða í veislur og hafði þá oftast danskan frukost með snaps. En það sem toppaði allt var kampavín og kransakökur. Vibsí vildi alltaf vera svo smart og til að fullkomna lúkkið notaði hún stóra og litríka skartgripi.

Í seinni tíð var Vibsí dugleg að hafa samband við krakkana sína í gegnum   samfélagsmiðla. Hún hringdi iðulega myndsímtöl og var alltaf svo jákvæð og hress og óspör á ráð til þeirra hvort sem þau vildu þau eða ekki.

Elsku Vibsíar verður sárt saknað og erfitt verður að fylla í hennar skarð. Sjáumst næst við kampavínsturninn.

Minningarsíður

Nýleg andlát

Útfarir

Hlaðvarp

Þjónustusíða

Fræðsluefni

Vibeke A. Jonsson

Andlátstilkynning

Útför

Aðstandendur

Þakkir

Ertu með minningargrein?