Torfey Margrét Steinsdóttir var fædd á Ísafirði 24. ágúst 1928. Hún andaðist á Hrafnistu í Reykjavík 9. mars 2022. 

Foreldrar Torfeyjar voru Steinn Leós, f. 21. jan. 1899, d. 25. des. 1972, og Kristensa Ágústa Ólöf Jensen, f. 11. maí 1902, d. 5. mars 1976. Bróðir Torfeyjar var Kristján Steinsson, f. 4. nóv. 1930, d. 23. mars 2021. Hálfbróðir Torfeyjar, samfeðra, var Marvin Guðbjörn Kjarval, f. 16. apríl 1921, d. 26. júní 1992.

Steinn, faðir Torfeyjar, var kaupmaður, skrifstofumaður og um tíma bæjarstjóri á Ísafirði. Kristensa, móðir hennar, var húsmóðir en hafði einnig tekjur af fatasaumi.

Torfey lauk gagnfræðaprófi frá Gagnfræðaskóla Ísafjarðar og einnig 1. bekk menntaskóla. Að námi loknu hneigðist hugur hennar til utanferða og hún dvaldi um 2ja ára skeið í Bandaríkjunum. Heimkomin fór hún að vinna við skrifstofustörf hjá Félagi ísl. botnvörpuskipaeigenda eða þar til hún stofnaði eigið heimili.

Þann 1. janúar 1956 giftist Torfey, Birni Eyþórssyni, prentara, f. 16. nóv. 1930, d. 17. júní 2010. Þau bjuggu allan sinn búskap í Reykjavík, lengst af í Álfheimum 60.

Synir Björns og Torfeyjar eru: 1) Steinn Bjarki Björnsson, íslenskufræðingur, f. 23. ágúst 1957; 2) Eyþór Hreinn Björnsson, lungnalæknir, f. 15. apríl 1959. Kona Eyþórs er Ingunn Þorsteinsdóttir, læknir, f. 20. ágúst 1961. Eiga þau 3 börn: a) Darra, f. 1985, b) Dagnýju Yrsu, f. 1988, c) Ægi, f. 1990. Barnabörn þeirra (og langömmubörn Torfeyjar) eru fimm.

Auk þess að sinna heimilisstörfum og barnauppeldi fékkst Torfey lengi við þýðingar, fyrst smásögur og greinar fyrir blöð og tímarit, en seinna varð hún mikilvirkur þýðandi útvarpsleikrita fyrir Ríkisútvarpið og þýddi yfir 100 leikrit. Þessi aukastörf stundaði hún í allmörg ár, líka eftir að hún hóf aftur að vinna úti, hjá Styrktarfélagi lamaðra og fatlaðra árið 1974. Hún byrjaði sem símastúlka en var orðin skrifstofustjóri þegar hún lét af störfum árið 1997. Seinustu árin fór heilsu hennar hrakandi þar til hún flutti á Hrafnistu í október 2020. Þar var vel um hana hugsað og henni leið eins vel og á varð kosið.

Útför Torfeyjar var gerð frá Langholtskirkju 18. mars 2022.

Minningarsíður

Nýleg andlát

Útfarir

Hlaðvarp

Þjónustusíða

Fræðsluefni

Torfey Margrét Steinsdóttir

Andlátstilkynning

Útför

Aðstandendur

Ertu með minningargrein?