[DEFAULT]

Ástkær vinur minn, Þorsteinn Ingi Þorleifsson, er fallinn frá og það ríkir mikil sorg í hjörtum okkar allra sem þekktum hann. Ég kynntist Steina fyrst þegar við vorum litlir pollar í Breiðholtinu. Fjölskylda hans tók mér alltaf opnum örmum enda eru þau sérstaklega yndislegt fólk. Þegar við vorum unglingar bjuggum við saman í Keflavík og síðar meir störfuðum við félagarnir við farþegasiglingar á Jökulsárlóni á sumrin og við akstur í íshella og leiðsögustörf á Breiðamerkurjökli á veturnar. 

   Steini var hamhleypa til verka enda réði hann sig í byggingarvinnu um leið og hann hafði aldur til. Hamarinn lék í höndum hans rétt eins og hann hefði meðfædda smiðshæfileika og þannig átti það eftir að vera um flest það sem hann tók sér fyrir hendur. Það þurfti ekkert að kenna honum, hann virtist bara bara kunna allt og geta allt frá fyrsta degi. Ég man sérstaklega eftir því þegar hann var ekki nema 18 ára þá sagði hann mér að hann þyrfti að fara með flokk manna vestur á Grundarfjörð til að steypa frystihús og hann væri verkstjórinn. Það sem ég dáðist að honum. 

   Steini byrjaði að vinna með okkur á Jökulsáarlóni sumarið 2016. Ég var fyrst sá eini sem þekkti hann en það breyttist fljótt. Nokkrum dögum seinna þá sagði Einar eigandi fyrirtækisins: „Hann er magnaður þessi Þorsteinn Ingi, hann hleypur hérna fram og til baka og stoppar aldrei, þvílíkur dugnaðarforkur.“ Steini varð strax mjög vinsæll meðal starfsmanna Jökulsárlóns. Hann var alltaf brosandi, reytti af sér brandarana og það líkaði öllum vel við hann. Steini hafði svo marga kosti, hann var ósérhlífinn og heiðarlegur. Hann var þó fyrst og fremst frábær leiðsögumaður og þar var hann fremstur meðal jafningja. Steini hafði mikla þjónustulund og vildi allt fyrir ferðarmennina gera enda fylltust vefsíður þeirra fyrirtækja sem hann starfaði fyrir af umsögnum um hvað hann væri frábær leiðsögumaður. 

   Elsku Steini minn! Eftir að þú kvaddir þennan heim hefur varla sú stund liðið sem ég hef ekki hugsað til þín. Gömul minning kom í hugann þegar við vorum smástrákar, tveir saman í Elliðaárdal að byggja virki. Síðan þú kvaddir hef ég ekkert þráð heitara heldur en að geta orðið 10 ára aftur og byggt með þér virki í Elliðaárdalnum. Ég sakna þín ótrúlega mikið, þú varst besta manneskja sem ég hef kynnst og það verður erfitt að vera án þín en núna þarf ég trúa því að himnaríki sé til því ef að einhver á skilið að fara þangað þá ert það þú. Svo kem ég til þín elsku Steini minn þegar minn tími kemur.

Minningarsíður

Nýleg andlát

Útfarir

Hlaðvarp

Þjónustusíða

Fræðsluefni

Þorsteinn Ingi Þorleifsson

Útför

Elsku Steini