
Ástkær móðir okkar, tengdamóðir, amma og langamma Þorgerður Brynjólfsdóttir hjúkrunarfræðingur lést sunnudaginn 10. júlí á Öldrunardeild Vífilsstaða. 

Þorgerður Brynjólfsdóttir hjúkrunarfræðingur fæddist á Siglufirði 12.03.1927. Hún lést á öldrunardeild Vífilsstaða 10.07.2022.

Foreldrar hennar voru Guðrún Vilmundardóttir f. 03.08.1898, d. 25.04.1996 og Brynjólfur Jóhannsson f. 16.10.1891, d. 07.10.1962. Þorgerður átti tvær systur Baldvinu Jónu Brynjólfsdóttur f. 13.01.1930 d. 24.09.1988 gift Hreggviði Inga Sigríkssyni f. 2. sept. 1928  d. 31. ágúst 1988. Þau skildu. Sigríður f. 12.04.1932, d. 07.08.2002 gift Kristjáni Júlíussyni f. 11. 08 1933. d.  31. mars 2017.

Þorgerður giftist 09.01.1957 Herði Jónssyni f. 01.10.1931 efnaverkfræðingi d. 12.09.2014.

Þorgerður og Hörður eignuðust fjóra syni. Þeir eru:  Ævar Ph.D arkitekt f. 2.5. 1957. Eiginkona hans er Gerður Tómasdóttir kennari f. 1961. Börn þeirra eru Þorgerður Þóranna f. 1996 og Gerður f. 2000. Börn Gerðar af fyrra hjónabandi eru Tómas Hrafn f. 1980, Helgi Þórir f. 1988 og Edda María f. 1989, Sveinsbörn. Gunnar Örn tæknifræðingur, f. 3.12. 1959. Eiginkona hans er Anna Kristinsdóttir stjórnmála- og stjórnsýslufræðingurf. 1963. Sonur þeirra er Vilmundur Örn f. 1997. Börn Önnu af fyrra hjónabandi eru Sverrir og Kristinn Diego f. 1982. Birgir viðskiptafræðingur, f. 7.09. 1964. Eiginkona hans er Sif Hauksdóttir kennari f. 1960. Börn Sifjar af fyrra hjónabandi eru Karl f. 1981, Þorgils f. 1988 og Friðbert f. 1995 Gíslasynir. Hörður Már flugvirki, f. 15. 11 1966. Eiginkona hans er Guðfinna Dröfn Aradóttir, kennari f. 1966. Börn þeirra eru Hlynur f. 1993,  Birkir f. 1997 og Katrín Helga f. 2009.  

Þorgerður gekk í barnaskóla Siglufjarðar og gagnfræðaskóla Siglufjarðar og útskrifaðist sem gagnfræðingur 1944. Hún lauk prófi frá Hjúkrunarskóla Íslands í október 1951. Hún var hjúkrunarkona við Sjúkrahús Akureyrar í eitt ár frá 1951-1952 og á Sjúkrahúsi Akraness.  Árið 1953 fór hún til Englands og vann í eitt ár sem hjúkrunarfræðingur á Bromley Hospital Bromley Kent. Næstu árin vann hún á The Royal Infirmary í Edinborg. Hún vann síðan á hinum ýmsu deildum á Landspítalanum. Lengst á lungnadeild Vífilsstaða og öldrunardeild Landspítalans í Hátúni. Árið 1975 fór Þorgerður í eins árs framhaldsnám í lyflæknisfræði við Nýja Hjúkrunarskólann. Frá 1985 til 1989 vann Þorgerður sem hjúkrunarfræðingur við Bekkelagshjemmet í Osló. Eftir heimkomu vann hún á Landspítalanum til 1997 þegar hún lét af störfum sjötug.

[DEFAULT]

Þorgerður Brynjólfsdóttir, minningarorð

Mín elskulega tengdamóðir, Þorgerður Brynjólfsdóttir er látin, 96 ára að aldri. Þorgerður var afar jákvæð og lífsglöð kona. Hún var hafsjór af fróðleik sem hún miðlaði óspart og hafði unun að því að lesa sér til skemmtunar og gagns. Það var gaman að hlusta á hana segja frá því hún var afar góður sögumaður og mundi bókstaflega allt.

Þorgerður hafði þann góða kost að láta öllum líða vel í návist sinni. Ömmuhlutverkið var Þorgerði afar dýrmætt og naut hún þeirra stunda að vera með barnabörnum sínum. Hún fylgdist vel með og gaf sér alltaf tíma til að setjast niður með fólkinu sínu, sem var henni svo kært, og ræða málin. Hún var iðin við að fara á menningaviðburði og fylgdist einnig vel með ungu kynslóðinni sem var að gera áhugaverða hluti í samfélaginu. Hún miðlaði því einnig til barnabarnanna með því að bjóða þeim með sér á menningaviðburði svo sem leikhús og tónleika.

Ég heyrði Þorgerði aldrei tala illa um nokkurn mann, heldur sá hún mannkostina í samferðafólki sínu. Það fannst mér fallegur eiginleiki. Mér fannst líka eftirtektarvert og fallegt hvað Þorgerður hafði sérstaklega jákvætt viðhorf til lífsins. Hún sagði mér einu sinni að það sem skipti mestu máli í lífinu, fyrir utan góða heilsu, væri viðhorf okkar sjálfra til framtíðarinnar. Hún sagði þetta í spjalli okkar um það hvernig væri eldast á Íslandi „De er ikke hvordan man har de, de er hvordan man tar de,“ sagði hún í því samhengi  og vísaði í gamalt orðatiltæki sem þýðir að það hvernig maður í raun hefur það í lífinu hefur ekki með hamingju að gera,  heldur byggist hún á því hvernig maður tekst á við lífið. Hún lifði sannarleg samkvæmt þessari lífsspeki og sá það bjarta og jákvæða við hvert lífsskeið, líka ellina sem henni sjálfri fannst gott lífsskeið að sigla inn í.  Svona var Þorgerður.

Ég er þakklát fyrir að hafa átt samleið með Þorgerði og fá að kynnast hennar jákvæðu lífsviðhorfum. Ég minnist hennar sem hlýrri konu sem tók hlutunum eins og þeir voru. Þannig tókst hún á við verkefnin með jákvæðni, æðruleysi og þrautsegju. 

Blessuð sé minning elskulegrar tengdamóður minnar.   

Minningarsíður

Nýleg andlát

Útfarir

Hlaðvarp

Þjónustusíða

Fræðsluefni

Þorgerður Brynjólfsdóttir

Andlátstilkynning

Útför

Aðstandendur

Þorgerður Brynjólfsdóttir, minningarorð