Sverrir Sigurjón Einarsson fæddist á Selfossi 29. júlí 1948. Hann lést á heimili sínu, Drápuhlíð 40, Reykjavík, 13. apríl 1998 af völdum heilakrabbameins. Foreldrar hans voru hjónin Kristín Helgadóttir, f. 6. maí 1921, d. 25. mars 1965, og Einar Sigurjónsson,  f. 11. júlí 1917. Sambýliskona Einars eftir fráfall Kristínar var nafna hennar Kristín Helgadóttir, f. 19. maí 1918. Einar og Kristín bjuggu á Selfossi.  Systkini Sverris eru 1) Hildur, f. 9. júlí 1943. Hún er gift Guðmundi Pétri Arnoldssyni,  f. 16. maí 1944. Þau eru búsett á Selfossi og eiga þrjú börn. 2) Gunnar, f. 13.júní 1944. Eiginkona hans er Hulda Gunnlaugsdóttir f. 7. júlí 1944. Þau eru búsett á Selfossi og eiga þrjár dætur. 3) Garðar Einarsson f. 13.júní 1944. Eiginkona hans er Dýrfinna Jónsdóttir. Þau eru búsett á Selfossi og eiga tvö börn. 4) Helga, f. 16. október 1955. Hún er búsett í Stokkhólmi og á tvo syni. Fyrri eiginkona Sverris er Rannveig Auður Jóhannsdóttir f. 7. ágúst 1949. Dætur þeirra eru Helga, f. 8. nóvember 1970, og Hildur f. 22. október 1978. Eftirlifandi eiginkonu sinni, Karólínu Huldu Guðmundsdóttur, f. 4. maí 1960, kvæntist Sverrir 8.7. 1989. Börn þeirra eru Guðmundur, f. 24. maí 1990, og Kristín, f. 28. apríl 1992. Karólína Hulda á fyrir soninn Tryggva Baldursson, f. 4. mars 1980. 

Eftir landspróf frá Héraðsskólanum á Laugarvatni lauk Sverrir kennaraprófi frá Kennaraskóla Íslands 1970 og stúdentsprófi frá stærðfræðideild Kennaraskólans 1971. Hann lagði stund á stærðfræði, eðlis- og efnafræði við Stokkhólmsháskóla og lauk þaðan fil.cand.-prófi 1976 og adjunkt-prófi frá Kennaraháskólanum í Stokkhólmi 1977. Veturinn 1992 til 1993 var hann í skólastjórnunarnámi við Skolledarhögskolan í Örebro í Svíþjóð. Þann vetur hélt Sverrir fjölda fyrirlestra um íslenska áfangakerfið sem Svíar litu til þegar breyta átti sænska menntaskólanum. Sverrir var stærðfræðikennari við Menntaskólann við Hamrahlíð frá 1979 til 1986 en þá var hann ráðinn áfangastjóri. Hann starfaði sem konrektor frá 1988 til 1995. Á haustönn 1995 kenndi hann stærðfræði við Fjölbrautaskóla Vesturlands. Sverrir var skipaður rektor Menntaskólans við Hamrahlíð 1. janúar 1996. 

Sverrir, í samvinnu við fleiri, þýddi og staðfærði kennsluefni í stærðfræði fyrir unglingastig og samdi kennsluleiðbeiningar um efnið. Hann gegndi ýmsum trúnaðar og nefndarstörfum um skólamál. Sverrir var fararstjóri á Ítalíu, í Egyptalandi og Ísrael á árunum 1982 til 1991. Hann var félagi í Karlakór Reykjavíkur frá 1980 og formaður kórsins 1988. 

Útför Sverris fór fram frá Hallgrímskirkju í Reykjavík, 22. apríl 1998. Við athöfnina sungu Karlakór Reykjavíkur, Kór menntaskólans við Hamrahlíð, ásamt Hamrahlíðarkórnum.

Minningarsíður

Nýleg andlát

Útfarir

Hlaðvarp

Þjónustusíða

Fræðsluefni

Sverrir S. Einarsson

Útför

Ertu með minningargrein?