Elskulegur sonur okkar og bróðir Steingrímur Jónsson rafmagnsverkfræðingur andaðist miðvikudagskvöldið 12. janúar.



Útför Steingríms S. Jónssonar rafmagnsverkfræðings fer fram frá Seltjarnarneskirkju í dag föstudaginn 4. febrúar kl.13.00. Athöfninni verður streymt  á streyma.is. 

[DEFAULT]

Fyrsta minningin mín er þegar föðursystir okkar, ég man ekki hvor, sagði við mig „Stefán viltu ekki koma og sjá litla bróður þinn?“ svo ég kíkti í vagninn eða burðarrúmið sem þú lást í. Ég man svo sem ekki hvaða hugsanir fóru um huga mér eða tilfinningar gripu mig en líklegast varð ég hissa á því að þú gætir ekki talað við mig eins og bræður eru vanir að gera, og glaður yfir því að eignast nýjan bróður og vin. Ég var ekki nema 779 daga gamall þegar þú komst í heiminn, en vissi samt strax að ég var ekki lengur litli bróðirinn. 

Ýmislegt var brallað. Stundum reyndi ég að passa þig hvort heldur ég hafði verið beðinn um það eða ekki, ég veit ekki hvernig til tókst en þú varst litli bróðir minn og vinur svo ég gerði mitt besta.  

Ástríða þín fyrir hljómsveitinni Pink Floyd og áhugi á forsprakka sveitarinnar, Roger Waters, var áberandi. Ádeila á stríð, stríðsrekstur og samúð hljómasveitarinnar með fórnarlömbum stríðsátaka, og andúð þeirra á harðstjórum, tel ég að hafi mögulega verið hluti af tryggð þinni við hljómsveitina, textana og flutninginn. Síðustu vikur hef ég hlustað mikið á Pink Floyd. Þó erfitt sé að gera uppá milli þessara góðu laga þá hefur lagið

 farið oftast í gegn um spilarann því sú tilfinning hefur verið sterk.  

Ég man svo vel eftir því þegar þú íhugaðir að sleppa sumarbústaðarferð í Flatey árið 2005 þar sem þú hafðir boðið mér og fleira góðu fólki að eiga saman góðar stundir.  Þann 2. júlí þetta ár komu Pink Floyd nefnilega saman að nýju eftir langt hlé. Ég skildi þig ekki þá, en núna skil ég af hverju það var svona mikilvægt fyrir þig að sjá tónleikana í beinni útsendingu. Ég hvatti þig til að hætta ekki við Flateyjarferðina því gæðastund var í hönd. Úr varð að þú keyptir léttan gervihnattamótakara og við reyndum allt hvað við gátum að ná merkjum í Flatey. Þegar ég hélt á disknum og miðaði í austur varð okkur ljóst að við þyrftum fleiri græjur til að stilla skífuna rétt. Því miður gekk dæmið ekki upp og þú misstir af útsendingunni en þess í stað áttum við öll ógleymanlega stund með þér. Seinna bættir þú þér þetta upp með nokkrum tónleikaferðum erlendis þegar Waters var að spila, og jafnframt sóttir þú tónleika Dúndurfrétta bæði á Akureyri og í Reykjavík. Þegar ég heimsótti þig í Klettatúnið fékk ég svo stundum að sjá tónleikana sem þú misstir af í bústaðnum en þeir voru fantagóðir í upptöku. 

Stuttu áður, 2003 eða 2004, fórst þú með okkur Hlyni og fleira góðu fólki á Góugleði í Heydal í Mjóafirði. Þar sátu sveitungar og aðrir góðir gestir í uppgerðri hlöðunni og gæddu sér á þorramat. Stólbök lágu þétt saman og fólk ræddi margt skemmtilegt og fróðlegt. Fyrir aftan þig sat starfsmaður Orkubús Vestfjarða og ræddi við vinafólk sitt. Sá var ekki hress með „sérfræðinga að sunnan“ og ræddi opinskátt um allt sem hann var ósáttur með. Þú snerir þér rólega við, bankaðir í öxlina á manninum og sagðir „bara svo þú vitir af því, þá situr sérfræðingurinn hér“ og þið fóruð báðir að skellihlægja. Þetta var ógleymanlegt andartak. 

Í einni ferðinni norður í fyrra fórum við í bíltúr til Grenivíkur þangað sem ég hafði ekki komið áður. Rafmagnsfræðileg leiðsögn þín um austanverðan Eyjafjörðinn var afar góð og fróðleg. Bakaleiðin lá m.a. um Fnjóskadal en þegar ég hugðist aka um Vaðlaheiðagöng kom á þig undarlegur svipur. Þú minntir mig á að þú hafir verið á móti þessum göngum frá upphafi því meiri þörf var fyrir lagningu vegganga annars staðar á landinu. Göngin opnuðu á afmælisdegi Bjarna bróður árið 2017 og fjórum árum síðar hafðir þú aldrei ekið um göngin. En viti menn, mér tókst að tala um fyrir þér og þá var svarið „jæja þá, en þú borgar“ og þannig fór að við bræðurnir upplifðum Vaðlaheiðagöng saman í fyrsta skipti. Síðasta september fórum við saman til Madeira og leiðsögn þín um rafmagnssögusafnið þar var merkileg upplifun. Ekki aðeins fékk ég tilsögn um hvað væri spennir, hvað væri þéttir og hvað eitthvað allt annað, heldur fræddir þú mig um sögu fyrirtækjanna sem framleiddu tækin í sýningarsalnum og selt höfðu RARIK búnað bæði fyrir og eftir sameiningu tveggja þeirra. Þú vissir allt um þetta enda hafðir þú alltaf mikinn áhuga á öllu sem starfi þínu tengdist og gafst þig í að sanka að þér fróðleik og upplýsingum. 

Þú kenndir mér margt kæri Steini. Ég hef öðlast nýjar hugmyndir um merkingu orðsins æðruleysi eftir að hafa fylgst með þér glíma við sjúkdóminn sem tók þig alltaf snemma frá okkur. Ekki sá ég hjá þér vott af biturð eða reiði yfir þann tíma sem baráttan stóð. Ég hef líka öðlast betri og dýpri skilning á mikilvægi heilbrigðisþjónustu í heimabyggð þegar ég sá hversu vel starfsfólk sjúkrahússins á Akureyri sinnti þér, og þú hafðir þá tækifæri til að vera lengur heima og í vinnu eftir því sem þú hafðir þrek til. Þegar þú keyrðir með mér suður í lok nóvember og vinnufélagar þínir hjálpuðu þér að flytja, bæði fylla sendibílinn fyrir norðan og tæma hann hér í 102 Reykjavík, fór það ekki framhjá mér hversu góður starfsfélagi þú hefur verið og mikils metin af vinum þínum. Við vorum báðir afar þakklátir fyrir þessa ómetanlegu aðstoð þegar við ókum suður.  

Það er sárt að missa þig kæri bróðir minn. Fráfall þitt ýtir undir efasemdir mínar um eigið trúleysi. Ég get nefnilega ekki hugsað tilveruna á annan hátt en að þú sért á kominn betri stað eftir þessa erfiðu baráttu. Og hvar sem þú ert núna, þá sé ég þig fyrir mér raula fyrir okkur lagið þeirra Gilmour og Waters:  

Lögin þeirra í Pink Floyd munu alltaf kalla fram minningar um þig í mínum huga. Þú varst góður drengur, bróðir, vinur og félagi og ég verð alltaf þakklátur fyrir allt sem við gerðum og upplifðum, bæði sem litlir strákar, unglingar og fullorðnir menn. Ég vildi að þú værir hér enn. 

Minningarsíður

Nýleg andlát

Útfarir

Hlaðvarp

Þjónustusíða

Fræðsluefni

Steingrímur S. Jónsson

Andlátstilkynning

Útför

Aðstandendur

Kæri Steini