Ástkær eiginkona mín, móðir okkar og dóttir mín andaðist 16. janúar sl. á Heilbrigðisstofnun Suðurlands.
Útförin fer fram frá Selfosskirkju 31. janúar nk. kl. 14:00


Útför Soffíu Magnúsdóttur sem andaðist 16. janúar sl. fer fram frá Selfosskirkju 31. janúar nk. kl. 14:00
Blóm og kransar vinsamlega afþakkaðir.

Soffía fæddist í Reykjavík 17. mars 1964, dóttir hjónanna Magnúsar Einarssonar og Gyðu Sigríðar Siggeirsdóttur. Soffía á tvo bræður Einar Bjarna f. 1962 og Siggeir f. 1965. Einnig á hún þrjár hálfsystur Freyju f. 1956, Jónu Magneu f. 1960 og Sigrúnu Ingu f. 1959 Magnúsdætur.

Soffía ólst upp í Smáíbúðahverfinu í Reykjavík.  Að sumarlagi var hún oft hjá afa sínum og ömmu á Kirkjubæjarklaustri og frændfólki á Hörgslandi. Aðspurð sagðist hún oft vera frá Klaustri frekar en Reykjavík. Soffía gekk í hverfiskólana í Smáíbúðahverfinu, Breiðagerðisskóla og Réttarholtsskóla.  

Á yngri árum æfði hún handbolta með Víkingi, varð Íslandmeistari í 2. flokki og tók þátt í frjálsum íþróttum með Ármanni á Klaustri.

Síðar fór hún í Fjölbrautarskólann við Ármúla og í Komvux Lund.

Árið 1991 giftist Soffía eiginmanni sínum Sveini Pálssyni frá Vík f. 1961 og bjuggu þau í Reykjavík, í Lundi í Svíþjóð, í Vík í Mýrdal, í Búðardal og loks á Selfossi. Soffía og Sveinn eiga þrjá syni, Magnús Orra f. 1987, Sölva Hrafn f. 1991 og Pál Andra f. 1999.

Á yngri árum vann Soffía meðal annars í þjónustustörfum á veitingahúsum og í  fiskvinnslu á Hornafirði.  Í Svíþjóð vann hún á hótelum og  veitingstöðum.  Eftir að hún flutti til íslands tók hún þátt í stofnun og rekstri veitingastaðarins Halldórskaffis í Vík.
Síðar var Soffía stuðningsfulltrúi í grunn- og leikskólum og vann einnig með öldruðum.  Þegar veikindin kvöddu dyra var Soffía stuðningsfulltrúi við Stekkjarskóla á Selfossi.

Soffía gekk að hverju starfi með jákvæðni að leiðarljósi og lynti almennt vel við samstarfsfólk sem og börn og aldraða sem hún vann fyrir.

[DEFAULT]

Elsku, elsku vinkona mín hún Soffía er farin frá okkur svo alltof snemma.

Við hittumst fyrst 1990 á jólaballi Íslendingafélagsins í Lundi í Svíþjóð þegar við Óli vorum nýflutt þangað. Við smullum saman frá fyrstu stundu, báðar ófrískar af strákunum okkar, Hafliða og Sölva sem fæddust um vorið 1991 og hafa verið miklir vinir síðan. Soffía dró mig í kór íslendingafélagsins og þar áttum við margar góðar stundir með frábæru fólki, gáfum út geisladisk og fórum m.a. í kórferðalög til Kaupmannahafnar og Greifswald í Þýskalandi. Óli Haukur og Svenni stóðu sig eins og hetjur sem grúpppíur. Við fjölskyldurnar vorum mikið saman og fórum m.a. í 3ja vikna ferð niður um allar evrópu með tjöld í skottinu og 2 litla, ljóshærða gutta í hvorum bíl. Þessi ferð var algjörlega óborganleg og þreyttumst við aldrei á að rifja hana upp. Mestu áhyggjurnar voru hvort gömlu bíldruslurnar okkar kæmust aftur heim og hvort peningurinn mundi duga. Heim komumst við, bílarnir heilir, búið að loka kreditkortunum og síðustu bensíndroparnir keyptir fyrir peninga sem strákunum hafði verið gefnir í Prag.

Þegar við vorum komin aftur til Íslands þá fórum við saman í ótal ferðir innanlands, oft norður til Ólafsfjarðar, til Grímseyjar, út í Drangey, Papey, á vestfirði og norður á Strandir. Gengum yfir í Héðinsfjörð áður en göngin komu, í Dyrfjöll, Strútslaug og margar fleiri gönguferðir með vinahópnum. Margar ferðir fórum við svo í paradísina þeirra í Grænalóni og lentum í mörgum ævintýraferðum á fjöllum sem við gátum endalaust hlegið að.

Við vorum bestu vinkonur alla tíð og skipti þá engu máli hvort hún bjó í Vík, Búðardal eða Selfossi, vegalengdir voru ekkert mál, bara tekin helgarferð og gist og eins þau í bænum hjá okkur. Soffía var ótrúlega dugleg og hjálpsöm, alltaf mætt ef einhver þurfti aðstoð hvort sem það var við flutninga, þrif eða veisluhöld enda snillingur í matargerð. 

Óteljandi stundum eyddum við saman í sumarbústaðnum okkar og þá var ekki slegið slöku við, Óla ofbauð stundum það sem okkur datt í hug. Eitt sinn grófum við niður rafmagnssnúru frá húsinu og út á tún sem oft er tjaldað á ca. 40 metra, Óla fannst þetta nú meiri óþarfinn, snúran mátti bara liggja á grasinu. Þegar við Óli héldum upp á fimmtugsafmælin okkar fyrir austan, þá var Soffía auðvitað mætt í undirbúning og okkur vinkonunum fannst alveg ómögulegt að hafa trébretti við útidyrnar lengur sem bráðarbyrgða stétt. Við sóttum sand, möl og notaðar hellur og gerðum þessa fínu stétt við dyrnar. 

Hún hjálpaði oft við bæði gróðursetningu tráa og svo seinna við að fella og grisja. Í eitt skiptið þegar við vorum að fella stórar aspir og keyra þeim í burtu datt okkur í hug að taka einn drumbinn ca. 1 meter á lengd og fara með hann upp á hól og stinga niður. Óli hristi bara hausinn yfir okkur en þessi drumbur lifnaði við þó rótarlaus væri og er í dag 6 metra hátt, tvístofna tré og við sögðum að þetta værum við.  Svo var auðvitað sest niður og drukkið vín og bjór, hlegið og fíflast.

Hún elskaði að koma með mér til Bournemouth þegar Alexandra og Kristó voru þar í námi, hún var auka amma fyrir litlu skvísurnar.

Soffía var mesti partýpinni sem ég þekki, hrókur alls fagnaðar, söng og hló hátt. Hún kunni endalaust af klámvísum og tók oft syrpu af þeim við mikinn fögnuð viðstaddra. 

Ég á svo mikið í minningabankanum að ég gæti skrifað heila bók.

Í júní í fyrra var ég stödd inni í Þórsmörk og þá hringdi Soffía í mig og sagðist hafa verið að greinast með krabbamein. Rúmum 6 mánuðum síðar er hún farin, hatrömm barátta sem hún var staðráðin í að sigra er töpuð.  Guð minn góður hvað ég á eftir að sakna hennar. 

Elsku Svenni og synir, missir ykkar er mikill en við reynum að heiðra minningu hennar með fleiri ævintýraferðum.

Í dag kveðjum við yndislega vinkonu sem tekin var frá okkur allt of snemma❤️ Ég kynntist Soffíu og fjöldskyldu í Svíþjóð og allar götur síðan höfum við í SOSO (Siggi, Óli, Svenni, Óli and the bitches) haft gaman saman, með eða án barna, innanlands, erlendis, til fjalla eða næstum hvar sem er❤️stórt skarð er hoggið í vinahopinn en við huggum okkur við endalausar góðar og hlýjar minningar❤️ farðu í friði mín kæra og við sjáumst þegar þar að kemur❤️❤️Soffía Magnúsdóttir

Minningarsíður

Nýleg andlát

Útfarir

Hlaðvarp

Þjónustusíða

Fræðsluefni

Soffía Magnúsdóttir

Andlátstilkynning

Útför

Aðstandendur

Kveðja frá Sigrúnu Konráðs

Frá Maríu Bjarna