Ástkær móðir okkar, tengdamóðir, amma og langamma, Sjöfn Lára Janusdóttir, lést á Sólvangi fimmtudaginn 22. september.

Útförin fer fram frá Fríkirkjunni í Hafnarfirði fimmtudaginn 6. október kl. 11:00

Sjöfn Lára Janusdóttir fæddist í Reykjavík 3. júlí 1927. Hún lést á dvalar- og hjúkrunarheimilinu Sólvangi 22. september síðastliðinn. Fósturforeldrar Láru voru Janus Guðmundsson, vélstjóri, f. 6. janúar 1896, d. 9. júní 1985 og Friðrika Sigurveig Friðriksdóttir, húsfreyja, f. 12. september 1898, d. 16. september 1987. Foreldrar Láru voru Þorsteinn Jakobsson Elíasson, f. 26. júlí 1899, d. 14. febrúar 1967 og Bjarney Kristín Þorsteinsdóttir, f. 26. júlí 1892, d. 4. mars 1945.

Eiginmaður Láru var Guðlaugur Björgvin Þórðarson kaupmaður f. 19. apríl 1922, d. 28. mars 2006. Synir Láru og Guðlaugs eru: 1) Þórður Jón, f. 13. maí 1953, d. 23. júlí 2005. Þórður var kvæntur Brynhildi Garðarsdóttur, f. 23. febrúar 1950. Synir þeirra eru Guðlaugur Jón, f. 11. júlí 1975, kvæntur Ernu Mjöll Grétarsdóttur, f. 12. janúar 1976. Sonur Guðlaugs og Ernu er Þórður Jón, f. 7. september 2007. Helgi, f. 7. október 1977, kvæntur Önnu Ósk Óskarsdóttur, f. 2. janúar 1981. Börn Helga og Önnu eru, Gabríel Ingi, f. 30. september 2004 og Matthildur Thea, f. 1. júní 2010. Stjúpsonur Þórðar frá 1973 er Gunnar Ármannsson, f. 10. apríl 1967, kvæntur Þóru Helgadóttur, f. 15. júlí 1965. Dóttir Gunnars er Fjóla Hreindís, f. 10. júlí 1995 í sambúð með Hjörleifi Þórðarsyni, f. 5. apríl 1993 og eiga þau óskýrðan son, f. 29. ágúst 2022. 2) Janus Friðrik, f. 7. október 1955, kvæntur Sigrúnu Eddu Knútsdóttur, f. 24. september 1955. Börn Janusar og Sigrúnar eru Lára, f. 3. júlí 1974, eiginmaður Láru er Haraldur Guðjónsson, f. 19. maí 1974. Börn Láru og Haraldar eru Helena Ingibjörg, f. 17. júní 2004 og Aron Knútur, f. 13. júlí 2008. Daði, f. 20. nóvember 1984, kvæntur Guðríði Steingrímsdóttur, f. 13. júlí 1984. Börn Daða og Guðríðar eru Sigrún Vala, f. 10. febrúar 2015, Karen Jana, f. 24. ágúst 2016, Kristín Lára, f. 24. ágúst 2016 d. 24. ágúst 2016 og Kári, f. 26. apríl 2021. Andri, f. 27. júní 1986, kvæntur Birnu Dís Birgisdóttir, f. 21. nóvember 1986. Synir Andra og Birnu eru Alexander Jan, f. 21. maí 2011 og Brynjar Daði, f. 9. júlí 2015. 3) Kristinn, f. 15. febrúar 1968 kvæntur Hönnu Ragnarsdóttur, f. 31. ágúst 1960. Börn þeirra eru Elías Kristinn, f. 23. júní 1999 í sambúð með Elsu Rut Leifsdóttur, f. 29. mars 1999 og Elísa Katrín, f. 18. desember 2000. Börn Hönnu eru Davíð Valdimar, f. 3. febrúar 1990 og Kristín Anna, f. 7. september 1994. Davíð Valdimar er kvæntur Særúnu Valdísi, f. 12. ágúst 1994. Synir þeirra eru Kristmundur Einar, f. 25. ágúst 2018 og óskýrður sonur, f. 28. ágúst 2022. Sonur Davíðs er Daníel Hrafn, f. 27. júlí 2011 og sonur Særúnar er Benedikt Nóel, f. 8. september 2014. Kristín Anna er í sambúð með Jóni Kristni, f. 6. desember 1992. 

Lára gekk í barnaskólann í Keflavík og sótti síðan nám í Flensborgarskólanum í Hafnarfirði á árunum 1944 til 1946. Að loknu námi við Flensborgarskólann sótti hún nám við Hússtjórnarskólann í Reykjavík og sumarið á eftir var hún við nám í Hússtjórnarskólanum á Akureyri. Árið 1951 kvæntist hún Guðlaugi Björgvini Þórðarsyni. Ráku þau í samvinnu Verslun Þórðar Þórðarsonar í nær hálfa öld eða til ársins 1995. Lára tók virkan þátt í félagsstörfum og átti skátastarf hug hennar allan á unglingsárum. Þegar til Hafnarfjarðar kom sat hún m.a. í stjórn kvenfélags Fríkirkjunnar til margra ára og nokkur ár í safnaðarnefnd. Hún sá um sunnudagaskólann í kirkjunni í mörg ár. Lára tók þátt í skátastarfi í Hafnarfirði ásamt eiginmanni sínum og sonum og var ein af stofnfélögum St. Georgsgildisins í Hafnarfirði. Lára var iðin við að sauma og skapa allt fram á síðasta dag. Hún sótti námskeið í myndlist og hannyrðum og naut þess að mála myndir, mála og hanna kort og sinna postulínsmálin. Hún bæði gaf og seldi verk sín auk þess sem hún var með leiðsögn í postulínsmálun um tíma. Eftir hana liggja óteljandi myndir og postulínsgripir af ýmsum toga

Kristinn Guðlaugsson

Guðrún Hromcho/Guðrún Magnúsdóttir frænka biður fyrir kærri kveðju en Guðrún er búsett í Bandaríkjunum. Guðrún ásamt tveimur systkinum sínum (Friðriki og Sigurveigu/Sísi) fluttu til Janusar og Friðriku frá Hafnarfirði til Keflavíkur eftir föðurmissi árið 1946. En Lára bjó hjá Gunnfríði Geirdísi (Dísa frænka, systir Friðriku) og Magnúsi seinna árið sitt í Flensborg 1945-1946. Lára passaði oft Guðrúnu.

Ásdís Jónsdóttir/Dísa biður fyrir kærri kveðju. En þær Lára og Dísa voru vinkomur frá 9 mánaða aldri, þegar Lára er tekin í fóstur til Janusar og Friðriku. Þær ólust upp á Hafnargötunni Lára á Hafnargötu 41 en Dísa á Hafnargötu 51 í Keflavík. Ásdís býr núna á Nesvöllum í Reykjanesbæ ásamt manni sínum Hilmari Péturssyni.

[DEFAULT]

„Heim er ég kominn, og halla’ undir flatt” 

Þessa setningu fékk ég að heyra í hvert einasta skipti þegar ég gaf ömmu Láru far heim. Það gat allt eins verið bílferð heim úr matarboði yfir í nýafstaðin og árangursrík kortaviðskipti við Nonna Gull á Strandgötunni. Þessi setning varð að órjúfanlegum hluta bílferðarinnar og eftir henni beið ég alltaf fullur tilhlökkunar. Þegar bílferðunum fór að fjölga var ég farinn að taka undir og oft litum við hvort á annað og sögðum hana saman í kór. Það var loks stórmerkileg uppgötvun að komast að því að þessi setning er hluti af fyllerísvísu sem ber heitið Timburmennirnir. 

Vert er einnig að nefna kræsingarnar sem þú töfraðir fram. Sama hvaða dagur var, hvernig viðraði og hvort það var tilefni eða ekki var ætíð fullt borð af kræsingum hjá þér. Kexkökurnar, eplaskífurnar og pönnukökurnar þínar, elsku amma Lára, munu alltaf geymast mér í minni. 

Þér var margt til lista lagt og eitt er víst að annan eins dugnaðarfork, eins og þig, verður erfitt að finna. Þú hafðir jafnframt þína skoðun á hlutunum og stóðst ætíð föst á þínu. Öll þín gildi, sýn á lífið og þín mikla atorkusemi mun veita mér gott veganesti út í lífið. Þú hefur kennt mér ótal margt og af því dreg ég mikinn lærdóm. Fyrir það er ég ævinlega þakklátur. Þú hugsaðir alla tíð vel um þig og þína og hafðir ávallt mikinn áhuga á því sem afkomendur þínir tóku sér fyrir hendur. Þér tókst að mynda einstök sambönd með hverjum og einum í fjölskyldunni og það smitaði frá sér svo mikla hlýju og kærleika. 

Það kom varla upp sá dagur þar sem þú varst ekki vel tilhöfð. Alltaf í þínu fínasta pússi, með skartgripi og glænýtt naglalakk. Það er þannig sem ég mun muna eftir þér kæra amma.

Ég kveð þig með miklum söknuði en á sama tíma lít ég yfir farinn veg og sé þar allar minningarnar sem við eigum saman. Allt frá því þú fékkst mig í fangið fyrst og fram að því þegar ég hélt í hönd þína í síðasta sinn. 

Að lokum vil ég fyrst og fremst þakka þér fyrir allar bílferðirnar, allar búðarferðirnar, allar sögurnar, allar sumarbústaðaferðirnar, allar KFC ferðirnar, allar kræsingarnar, allar samverustundirnar og allar minningarnar.

Heim ertu nú komin, amma mín, og hafðu það sem allra best í sumarlandinu. Ég skila hlýrri kveðju á allt settið þitt.


Sofnar drótt, nálgast nótt,
sveipast kvöldroða himinn og sær.
Allt er hljótt, hvíldu rótt,
Guð er nær.

Þannig hljómar kvöldsöngur kvenskáta, orð og skilaboð frá skátahreyfingunni sem móður okkar Sjöfn Láru Janusdóttur var svo kær, bæði í uppvexti en ekki síður á efri árum. Hann á vel við á þessari kveðjustund. Hún var tápmikil og fjörug á yngri árum en hélt fast í trú sína sem styrkti hana til ýmissa verka. Móðir okkar var tekin í fóstur og flutti 9 mánaða til Keflavíkur þar sem Janus Guðmundsson og Friðrika Sigurveig Friðriksdóttir bjuggu henni einstaklega gott og ástríkt heimili og gengu henni í foreldra stað. Hún var lánsöm og þess nutum við bræður einnig til hins ýtrasta síðar meir.

Hún sleit barnsskónum í Keflavík, lauk þar barnaskólanámi samhliða því sem hún gekk í skátafélagið Heiðabúa. Hún naut þess að syngja og dansa auk þess að búa við góðan félagsskap alla tíð. Tengdist órjúfandi vinaböndum sem vörðu alla hennar lífstíð. Hún flutti sig til Hafnarfjarðar með Sísí vinkonu sinni og frænku til að sækja nám í Flensborgarskóla á árunum 1944-1946. Þar kynntisst hún föður okkar, Guðlaugi Björgvini Þórðarsyni eða Laugja eins og hann var yfirleitt kallaður. Fundum þeirra bar að öllum líkindum saman á dansæfingu í Gúttó við Suðurgötuna, en á þeim tíma voru haldnir þar dansleikir á hverjum sunnudegi kl. 17:00. Hún sagði okkur frá því að þeir voru ófáir sem fylgdu henni heim eftir dansleikina, boðnir og búnir að ganga skrefinu lengra. Daman var siðprúð, fór sér hægt í mannavali, sagði hún með kímni nýlega. Það kom þó að því að hún fann hinn rétta og árið 1951 kvæntist hún föður okkar og kaupmannssyninum Guðlaugi. Þau höfðu kynnst nokkrum árum áður en faðir okkar tók við rekstri verslunarinnar af föður sínum Þórði 1946. 

Eftir útskrift frá Flensborg sótti hún nám við Hússtjórnarskólann í Reykjavík á árunum 1946 til 1947 þar sem hún lærði til verka sem húsmóðir þess tíma. Sumarið 1947 sótti hún nám í vefnaði við Hússtjórnarskólann á Akureyri. Á þessum árum kynntist hún góðum vinkonum sem héldu tengslum áratugum saman. 

Eftir að hún gifti sig og faðir okkar tók alfarið við rekstri Verslun Þórðar Þórðarsonar að Suðurgötu 36 í Hafnarfirði helgaði hún sig verslunarstörfum með honum í hálfa öld eða til ársins 1995 þegar þau ákváðu að loka versluninni. Þegar verslunartímabilinu lauk sat hún ekki auðum höndum. Hún var listfengin mjög, prjónaði, heklaði og óf af miklum krafti. Hún hafði einstaklega fallega rithönd og næmt auga fyrir listum og tísku. Hún hafði unun af því að teikna og mála og eftir að Laugjabúð var lokað naut hún þess að sinna sínum hugðarefnum, ekki síst að mála og brenna verk sín á postulín. Eftir hana liggur fjöldinn allur af munum með merkingunni; Handmálað af Láru Jan. Hún brenndi sína muni sjálf eftir að hafa keypt sér fullkominn brennsluofn vegna mikilla afkasta. Til að styrkja sig enn frekar þá sótti hún námskeið í myndlist og postulínsmálun og tók að sér leiðsögn í sömu iðju. Hún sagði okkur að ef hún hefði ekki ákveðið að sinna búðarstörfum þá hafði hugur hennar legið til kennslustarfa í hannyrðum og listum. Hún naut virkilega þeirra tíma sem biðu hennar eftir lokun verslunarinnar.

Móðir okkar var félagslynd kona og naut þess að vera innan um fólk. Hún tók virkan þátt í ýmsum félagsstörfum, fyrst sem skáti í Keflavík en síðan í Hraunbúum í Hafnarfirði. Síðar meir sem skáti í St. Georgsgildinu í Hafnarfirði þar sem hún var ein af stofnendum þess. Hún sat einnig í safnaðarstjórn Fríkirkjunnar í Hafnarfirði og meðan faðir okkar var þar formaður þá fóru fundir stjórnarinnar fram á heimili okkar á Suðurgötunni þar sem ekkert safnaðarheimili var þá til staðar.

Hún naut þess að ferðast um landið og flestar helgar á sumrin var haldið austur fyrir fjall, burtu frá verslunarstörfum þar sem þau bæði nutu náttúrunnar og hvíldar. Síðan kom að því að þau fjárfestu í sumarhúsi í Þrastaskógi þar sem hún og faðir okkur nutu sín vel, hvíldinni fegin frá annasömum búðarstörfum vikunnar. Þetta var þeirra sælureitur og þeirra annað heimili eftir að þau hættu verslunarrekstri.

Hún fylgdist vel með afkomendum sínum og var mjög minnug allt fram á síðasta dag. Spurðist fyrir um börnin, hvernig þeim vegnaði og hvað þau voru að starfa. Það var henni erfiður tími þegar Þórður bróðir okkar féll frá árið 2005 og síðan faðir okkar ári síðar. En með trúna að vopni og hugmyndafræði skátanna að leiðarljósi var hún staðföst að halda lífi sínu áfram. Hún varð enn afkastameiri í sínum tómstundum og listsköpun. Hún var ávallt vel til fara og vildi líta vel út allt fram á síðasta dag.

Við leiðarlok viljum við þakka starfsfólki á Sólvangi innilega fyrir alúð þeirra og umhyggju meðan móðir okkar dvaldi þar síðasta eina og hálfa árið. Hún, á 96. aldursári, er sjálfsagt hvíldinni fegin eftir langa og viðburðaríka ævi. Við kveðjum móður okkar með miklu þakklæti, óskum henni góðrar ferðar vitandi það að vel verður tekið á móti henni í nýjum heimkynnum. Ljóð Hrefnu Tynes skátahöfðingja á vel við á þessum tímamótum:

Tendraðu lítið skátaljós, 
láttu það lýsa þér, 
láttu það efla andans eld 
og allt sem göfugt er. 
Þá verður litla ljósið þitt 
ljómandi stjarna skær, 
lýsir lýð alla tíð, 
nær og fjær. .

Minningarsíður

Nýleg andlát

Útfarir

Hlaðvarp

Þjónustusíða

Fræðsluefni

Sjöfn Lára Janusdóttir

Andlátstilkynning

Útför

Aðstandendur

Kveðja frá ömmustráknum þínum

Kveðja frá sonum