Sálin hans Sigurðar Konráðssonar hefur yfirgefið okkar jarðneska efnisheim. 

Eilífur skapari og verndari ljóssins.

Fæddur - 07.05.57 
Frelsaður - 11.04.26


Kveðjustund og bálför fer fram frá Fossvogs kapellunni föstudaginn 24. Apríl klukkan 15:00

Gleði- og samverustund kl 16:15 - 17:30 í Petersen Svítan, Ingólfsstræti 2A.

Fjölskylda, aðstandendur, vinir og gestir. 

Sr. Hjörtur Magni

Útfararstofa Reykjavíkur

Fossvogskapella

Slava (Hljóð) 

Ragnar (Streymi)

MINNINGARORÐ
Sigurður Konráðsson fæddist 7. maí árið 1957 hér í Reykjavík.
Hann var yngstur fjögurra systkina, sonur þeirra Sigríðar Skúladóttur og Konráðs Axelssonar.   Albróðir Sigurðar er Skúli Konráðsson, kona hans er Hrafnhildur Árnadóttir. Hálfsystkini Sigurðar samfeðra, eru Hallfríður Konráðsdóttir, maður hennar var Axel Gíslason, látinn í desember 2017 og Bergþór Konráðsson kona hans er Hildur Halldórsdóttir.

Sigurður ólst upp í Skipholti 24 ásamt foreldrum sínum og eldri bróðir og ömmu hans Þuríði, í hlýju og kærleik.
Í hverfinu var hann kallaður Siggi sæti og oft eltur heim af stelpunum — og flúði þær hlæjandi heim.

18 ára kynntist hann barnsmóður sinni, Bryndísi Markúsdóttur sem þá var 19 ára.
Árið 1977 eignuðust þau sitt fyrsta barn, Birgi Konráð — bæði enn kornung, eins og tíðkaðist þá, og saman fluttu þau í kjallarann í Skipholtinu eftir að Siggi kláraði Samvinnuskólann á Bifröst, ásamt því að spila fótbolta með Fram og lék einnig með U-21 landsliðinu í fótbolta.

Á Bifröst eignaðist góða vini og mótaði með sér þá forvitni og skapandi lífssýn sem fylgdi honum alla tíð.

Hann var maður með einstakan húmor og léttleika.
Vinir hans minnast hans sem manns sem var alltaf til í sprell – skapandi, hlýr og með ómælda gleði í samskiptum við aðra.

Árið 1983 eignuðust þau sitt annað barn, hana Sigríði Björk, og keyptu á sama tíma sína fyrstu íbúð í Miðleiti 3 og ári seinna gengu þau í hjónaband.
Saman áttu þau 36 ára sambúð, með ótal mörgum litum lífsins — og stundum blæbrigðum blámans.

Árið 1989 fæddist Bryndís Erla og árið 1990 fluttu þau í Hverafold í Grafarvogi og síðar í Grundarhús 26.

Barnabörnin eru þrjú: Konráð Darri Birgisson, Kristófer Pálmason og Ísabella Marín Sigríðardóttir.

Siggi var afar stoltur af fjölskyldu sinni og sagði oft — stundum næstum óþarflega oft, eins og við munum eftir, með bros á vör:
„Ég er svo montinn af ykkur.“

Hvað varðar starfsferil Sigurðar, þá var hann bæði í eigin rekstri og starfaði með föður sínum.

Á yngri árum kom hann að listsýningum á Kjarvalsstöðum og tók þátt í að kynna íslenskum almenningi verk eftir listamenn á borð við Erró, Miró og Picasso.
Saman kynntu þeir einnig nýja strauma og menningu sem áður höfðu ekki sést hér á landi — meðal annars persnesk teppi og önnur listform frá framandi menningarheimum.

Síðar stofnaði Siggi fyrirtækið S. Konráðsson & Co., þar sem hann flutti inn og seldi hágæða skrifstofuhúsgögn.
Nokkrum árum síðar stofnaði hann Sólarplast, sem flutti inn brautryðjandi byggingarefni sem meðal annars var notað í umgjörð Tívolísins í Hveragerði — fyrir þá sem muna — og í fjölmörg gróðurhús víða um landið.

Siggi var framtíðarsinnaður maður.
Hann hafði djúpan áhuga á tækni og nýjungum og vildi færa Íslandi það nýjasta sem gæti opnað tækifæri og bætt líf fólks.

Hann var meðal þeirra fyrstu á Íslandi til að nota og kynna TELEX-tækni — risastórt apparat á sínum tíma, sem síðar þróaðist í samskiptatækni eins og fax.
Hann deildi þeirri aðstöðu frítt með öðrum, einfaldlega af því að hann vildi að fleiri fengju að upplifa og nýta sér það sem var að koma.

Á heimilinu lagði hann áherslu á tónlist, tækni og sköpun.
Hann kynnti börnum sínum fyrir tónlist, list og hugsun sem mótaði þau djúpt.

Í minningum barnanna lifir mynd af pabba sem dekraði við þau, eldaði góðan mat, gaf ráð, hrósaði og var alltaf til staðar.
Pabba sem skammaði aldrei — og þótt hann hafi síðar stundum verið fjarlægur, þá var hann alltaf til staðar þegar á þurfti að halda.

Þegar tölvubyltingin kom, kynnti hann sér forritun og sat með varla læsum sex ára syni sínum eftir kvöldmat og um helgar — og bjuggu þeir saman til einföld forrit og leiki.
Það var ekki bara kennsla — heldur sameiginleg sköpun og tenging.

Hann kenndi ekki bara færni —
hann opnaði heim.

Siggi var einnig mikill fagurkeri og listamaður í eðli sínu — og ekki síst í eldhúsinu.
Hann kunni að skapa stemningu, gleði og veislu, og lagði metnað í að gera hlutina fallega.

Litlu augnablikin lifa líka áfram —
jólamatur sem beið, tónlist sem hljómaði, teikning á pakka sem varð að dýrmætri minningu.

Eftir tímabil þar sem lífið reyndi á hann kom tími umbreytinga — meiri ró, meiri kærleikur og ný tenging við lífið.

Hann vann við hellulagnir með listrænni nálgun, elskaði að vera úti, hjólaði hvert sem hann fór og synti nánast daglega.
Þetta voru tímar sem fjölskyldan minnist með hlýju.

Síðar tók við hans dýpsta vegferð.
Hann eyddi meira en áratug í sjálfsvinnu, í að skilja lífið, sjálfið og fyrirgefninguna —
og á þeirri leið hjálpaði hann mörgum.

Þrátt fyrir allt sem á gekk, lifði alltaf í honum kjarninn —
hlýjan, sköpunin og kærleikurinn.

Lífssaga Sigurðar Konráðssonar var ekki löng í árum talin.  En hún markar vissulega djúp spor í vitund og líf ástvina.  Hér verður ekki viðhöfð öllu lengri eða ýtarlegri orðræða frá minni hendi, um hans persónu, hans mörgu góðu einginleika, hans vanda og birgðar, þann mótbyr eða með-byr sem hann fann fyrir á sinni lífs-vegferð.  Þið gott fólk sem eruð hér saman komin á kveðju stundu, eigið ykkar minningar og hugans myndir sem ég veit að þið varðveitið í hug og hjarta um ókomin ár.  Við kveðjum Sigurð með þökk og virðingu.

Óskað hefur verið eftir því að það komi fram að Halldór, Dóri vinur hans sem lést rétt á undan honum var Sigga einstakur, tryggur og góður vinur í gegnum öll árin. Og þakkir eru til Gullu, eiginkonu Dóra fyrir allt sitt. Þá eru einnig nefndar hér þakkir til Egils og Ella, en þeir voru saman allir á Bifröst og hringdu oft í Sigga.

Við trúum því að Siggi sé nú laus úr viðjum,
laus við þjáningu og þunga,
og að hann gangi frjáls inn í birtuna —
léttur, bjartur og í friði.

Fyrir hönd okkar allra….
takk fyrir að hreyfa við okkur.
Fyrir innblásturinn.
Fyrir hláturinn.
Fyrir það að láta okkur líða vel —
og já… stundum pirra okkur í spað. :D

Við dveljum við hið bjarta og fagra,
og látum minningarnar lýsa leiðina heim… að eilífu.

eins og í því sem er stærra en við skiljum

Gef mér í dag það sem ég þarf til að nærast

og að ég er hluti af því sem ég skapa

Gunnar Ágúst Beinteinsson

Gústaf Adolf Björnsson

Góður drengur fallinn frá...vorum samferða upp alla yngri flokka Fram í fótbolta...hvíl í friði...Gústi Björns

[DEFAULT]

Þetta hafa verið þungir og erfiðir dagar síðan þú kvaddir, alls konar hugsanir og tilfinningar sem ég hef aldrei upplifað áður.

Söknuðurinn er mikill pabbi og ég og við börnin þín höfum verið að hlýja okkur við allar fallegu og góðu minningarnar.

Þú varst svo ótrúlega góður pabbi. Elskaðir okkur útaf lífinu, endalaust stoltur af okkur, fyndinn, meistara kokkur, hlýr, skilningsríkur og vildir gefa okkur allan heiminn.

Svo komu barnabörnin og ó hvað þú elskaðir þau mikið, ég vildi óska þess að þau hefðu kynnst þér betur og fengið meiri tíma með þér.

Þú varst ótrúlega klár, hæfileikaríkur, skemmtilegur og myndarlegur.

Mikill húmoristi eins og ég, en ég þó með grófari húmor og hafði mjög gaman að því að stríða þér með það. Slá þig aðeins útaf laginu.

Harðjaxl, hraustur og lést fátt stoppa þig. Ég man þegar það var einu sinni keyrt á þig, þú hjólandi og þú stóðst upp, veittir bílstjóranum áfallahjálp með þinni góðmennsku og mættir aftur til vinnu, rifbeinsbrotinn og laskaður.

Alltaf góður við alla og öllum sem kynntust þér þótti vænt um þig og margir höfðu orð á því hvað þú værir mikill krúttkarl. Alla vega mínar vinkonur og vinir.

Ég vildi óska þess að við hefðum eytt meiri tíma saman síðustu ár en hugga mig við það að við áttum fullt af góðum tíma saman, skemmtileg spjöll og góð pabbaknús.
Ég er þakklát fyrir hvað samtölin okkar voru heiðarleg og við töluðum um allt á milli himins og jarðar.

Kristófer hefur verið að skora og skora í boltanum undanfarið og þakkar þér alfarið fyrir það, langar að verða jafn góður og afi Siggi í fótbolta.

Hann elskaði þig svo mikið, átti margar góðar stundir með þér. Þið tveir saman í Nexus að kaupa alls konar nördadót, burger á eftir og strætóferðir hingað og þangað.

Núna ertu frjáls og ég veit að þér líður betur.

Þú varst heimsins ljúfasti og besti pabbi og ég veit að þú virkilega reyndir þitt besta.

Þú varst mjög góður og gafst mér allt sem ég vildi. Mér finnst leiðinlegt að ég hitti þig ekki oftar því þú varst svo skemtilegur og mig langar vera eins og þú í fótbollta að því þú komst í ulingalandsliðið. Þú varst fyndin og þú vildir gera allt og mér fannst mjög skemmtilegt þegar þú komst að sækja mig í leiksólan og við fórum að gera eitthvað skemmtilegt og bara takk fyrir að byrja með ömmu Bryndísi og takk fyrir að vera mjög góður afi og þú hefðir viljað gefa okkur heiminn ef þú gætir og þú varst góður við alla í kringum þig. Ég vildi að ég hefði kynnst þér miklu betur þú varst alltaf í flottum fötum og fínn og með flott hár og þú átt mjög góð börn.



Sigurður Konráðsson f. 7. maí 1957, lést 11. apríl 2026

Elsku Siggi
Minn fyrrverandi eiginmaður, lést 11. apríl s.l. 
Við áttum 36 ár saman, mörg góð og önnur ekki eins góð. Við eignuðumst þrjú dásamleg börn, sem hafa alltaf verið stoltið okkar. 
Eins ljúfur og þú varst, mikill listamaður, fagurkeri, góðum gáfum gæddur og hæfileikaríkur þá fórst þú illa með þig.
Og eins ástfangin og við vorum þá var skilnaður óumflýjanlegur. 
En okkur auðnaðist að fyrirgefa hvort öðru og er fyrirgefningin besta gjöfin í lífinu, jafn góð og ástin og kærleikurinn.

Við fylgdum þínum besta og tryggasta vini 10. apríl s.l. (lést 21. mars) og þú varst dáin 11. apríl. Það voru aðeins þrjár vikur á milli ykkar, báðir bráðkvaddir og báðir 68 ára. 
Lífið er oft svo undarlegt og sárt. 
Ég sagði strax að kannski náði þinn besti vinur bara í þig, eða kannski voru þið búnir að ákveða að fylgjast að í sumarlandið áður en þið komuð í þetta líf. 
Við vitum svo lítið, en samt vitum við líka svo margt. Þurfum bara að hlusta í kyrrðinni.

Það er alltaf sárt að kveðja, en okkur finnst ljúft að hugsa núna, að við sjáum þig glaðan og frelsinu fegin, laus við þennann harða sjúkdóm og veikindi undanfarin ár. Það gefur okkur styrk. 

Ég kveð þig að sinni og þakka fyrir það góða elsku Siggi minn. Takk fyrir að hafa alltaf elskað mig. Ég veit að stóru englarnir munu umvefja þig og allt yndislega fólkið okkar mun umvefja þig líka. 
Blessuð sé minning þín og góða ferð.
Megi gæfan þig geyma,
megi Guð þér færa sigurlag.
Megi sól lýsa þína leið,
megi ljós þitt skína sérhvern dag.
Og bænar bið ég þér,
að ávallt geymi
þig Guð í hendi sér.
             Texti, Bjarni Stefán Konráðsson 

Elsku börnin mín, innilegar samúðarkveðjur. Elska ykkur.

Kær kveðja,
Bryndís 


Minningarsíður

Nýleg andlát

Útfarir

Hlaðvarp

Þjónustusíða

Fræðsluefni

Sigurður Konráðsson

Andlátstilkynning

Útför

Aðstandendur

Þakkir

Frá Bryndísi Erlu

Frá Kristófer afastrák

Sigurður Konráðsson f. 7. maí 1957, lést 11. apríl 2026