Sigurður Jónsson  fæddist þann 13. desember 1946. Hann lést eftir snörp veikindi í faðmi ástvina sinna á heimili sínu Mýravegi 113, laugardaginn 17. ágúst s.l.

Sigurður Jónsson eða bara „Siggi Jóns“ eins og við hestamenn kölluðum hann alltaf, var og stundaði hestamennsku í áratugi. Ungur kynntist hann hestum og unni þeim alla tíð í góðra vina hópi og var hestamaður góður.

Siggi Jóns  var einn af „strákunum“ sem stofnuðu hestafélagið Fjölni á sjöunda áratug síðustu aldar og var í þeim hópi ungra drengja er fyrstir fóru í hestaferð um austurveg í paradís  okkar hestamanna, að Sörlastöðum í Fnjóskadal.

 Ófáar ferðirnar hafa  Siggi og Júlía Sjöfn Sigurjónsdóttir „Didda Dúdda“ kona hans farið ríðandi í góðra vina hópi  allar götur síðan austur að Sörlastöðum, í vinnuferðir til að ditta að og laga og bæta, sem og í skemmtiferðir, þar mun handverk Sigga og félaga ylja okkur hestamönnum  hér eftir sem hingað til og um langa framtíð. Það þökkum við nú.

Já, Siggi var svo sannarlega einn af ungu hestastrákunum og allar götur síðan hefur Siggi verið í góðum hópi „strákana okkar“ sem svo  hafa lagt  þunga sinn á vogaskálarnar þegar til þeirra hefur verið leitað við smærri sem stærri verk fyrir hestamenn. Nú síðast var Siggi í strákahópnum góða sem kom að verkefnum í reiðhöllinni okkar fyrir 90 ára afmæli félagsins s.l haust, sem og síðasta verk Sigurðar í hópnum góða var að smíða nýtt svið í félagsheimili okkar, Skeifuna í febrúar s.l.

Já „strákarnir okkar“ mættu til „starfa“  með hamar og sög þegar kallað var og mikið var oft hlegið og mikið var oft gaman.

Sigurður Jónsson var sæmdur silfurmerki Léttis 2011.

Það var alltaf gaman að hitta Sigga og Diddu. Það var engin drungi yfir þeim hjónum, stutt í glens og  spaugilegar hliðar lífsins séðar, oft mergjuð, stundum tvíræð  athugasemd bóndans  og óborganlegur hlátur frúarinnar kryddaði tilveruna svo um munaði. Það leiddist engum í návist þeirra hjóna.

Þannig mynd munum við nú eiga í hugskoti okkar.

Við  hestamenn á Akureyri  lútum nú höfði í þakkarskuld.

Góður drengur, félagi og vinur hefur verið kallaður til annarra verka of  fljótt,  og  lúti ég  dómi almættisins, en um leið þakka ég  samfyldina góðu við Sigurð Jónsson.

Ég sendi eftirlifandi eiginkonu Sigurðar, Júlíu Sjöfn Sigurjónsdóttur, börnum,tendabörnum, barnabörnum sem og öðrum ástvinum öllum innilegar samúðarkveðjur. 

Blessuð sé minning Sigurðar Jónssonar.

Minningarsíður

Nýleg andlát

Útfarir

Hlaðvarp

Þjónustusíða

Fræðsluefni

Sigurður Jónsson

Útför

Ertu með minningargrein?