Sigurður Finnbogason fæddist á Ísafirði 10. janúar 1946. Hann lést á Ísafirði 12. desember 1998, aðein 52 ára að aldri. Forldrar hans voru Sigríður Þórarinsdóttir og Finnbogi Pétursson frá Hjöllum í Skötufirði. Systur hans eru Sigrún Steinunn fædd 1942, Stefanía fædd 1950 og Hallveig fædd 1951. Hann kvæntist Signýju Björk Rósantsdóttur, fædd 12. nóvember 1945, frá Ási í Hörgárdal, 9. september 1967. Þau bjuggu allan sinn búskap á Ísafirði. Börn þeirra eru Ólafur Rósant fæddur 11. september 1965, Sigrún fædd 30. janúar 1968 og Sigþór fæddur 18. desember 1973. Ólafur er kvæntur Gíslu Björgu Einarsdóttur og eiga þau tvær dætur, Hafrún Huld og Hörpu Björk. Sigrún á þrjú börn með Ólafi Ármanni Óskarssyni, Signýju Rós, Sigurð Boga og Grétu Þóreyju.  Sigþór á dóttur, Öddu Steinu og fósturdóttur, Helgu Rós, með Hafdísi Helgadóttur. 

Siggi, eins og hann var alltaf kallaður, ólst upp á Ísafirði en dvaldist flest sumur í æsku að Hjöllum í Skötufirði hjá afa sínum og ömmu, Pétri og Stefaníu. Hann byrjaði ungur til sjós og stundaði sjómennsku alla ævi, þó í hjáverkum síðustu 10 árin sem hann veitti forstöðu Gúmmíbátaþjónustunni á Ísafirði, sem hann átti að hálfu með Netagerð Vestfjarða. Hann stundaði grásleppuveiðar öll sumur frá 1973 á eigin bátum. Hann var 23 vertíðir á Guðnýju ÍS 266, oftst landformaður. Hann starfaði mikið í Sjómannafélagi Ísfirðinga og gegndi þar mörgum trúnaðarstörfum, meðal annars í samninganefndum. Hann gekk í Lionsklúbbinn á Ísafirði 1979 og var mjög virkur félagsmaður til dauðadags.  

[DEFAULT]

Minningargrein þessi birtist 19. desember 1998 í Morgunblaðinu.

Orgelið þitt í stofunni er þagnað. Nýju flókaskórnir þínir standa tómir. Brúni leðurstóllinn sem afi átti er einmana við sjónvarpið. Fyrir utan húsið stendur Bangsi litli, grásleppubáturinn þinn, sem þú siglir ei framar. Pollýana, kisan okkar, gengur um allt húsið og leitar að þér. 

Elsku pabbi! Ég er ekki lengur sterka og duglega dóttir þín sem gat ávallt framkvæmt það sem ég ætlaði mér. Mér finnst ég vera orðin litla stelpan þín. Finn fyrir yfiþyrmandi vanmætti gagnvart almættinu og bíð þess að þú komir og takir mig í fang þér og berir mig í gegnum þetta svartnætti. Þessa fyrstu nótt án þín ligg ég í þinni holu, við hliðina á mömmu og Sigþóri eins og ég gerði sem lítil stelpa, er við biðum þess að þú kæmir heim af sjónum í fárviðri sem nú. Ég held utan um þau eins og þú varst vanur að gera, ég reyni að hugga þau en tár okkar blandast saman. 

Þinn persónuleiki var einstakur og einkenndist af yfirnáttúrulegum innri frið og ró, blandað vel saman með yndislegum húmor. Þessum eiginleikum deildir þú með hverjum sem þú hittir. Það var ekki hægt að vera reiður eða æstur nálægt þér, því sál þín lægði þá storma. Þú varst faðir sem tókst manni eins og maður var, sama hvernig á stóð. Sá sem var svo notalegt að setjast hjá og þegja með, því þögnin í kringum þig var svo friðsæl og gefandi. 

Húmorinn þinn var sérstakur og þú gast gert ólíklegustu hluti fyndna, ef þeir voru ekki fyndnir hló maður að dillandi hlátri þínum sem smitaði svo út frá sér. Þú varst þessi mjúki maður sem sýndir aldrei hörku. Þú varst næmur á fólk og skynjaðir vel persónuleika þess. Þú varst berdreyminn og sagðir frá merkilegum draumum sem höfðu einhverja merkingu. 

Þú varst alltaf svo mikill strákur í eðli þínu, ég gat aldrei séð þig fyrir mér sem virðulegan eldri mann, því þú hegðaðir þér alltaf eins og táningur þótt árin færðust yfir. Fyrir vikið varstu svo miklu meiri félagi og það þótti mér vænt um. Þú varst náttúrubarn í eðli þínu, elskaðir hafið og varðst þeirrar gæfu aðnjótandi að starfa við sjómennsku eða annað því tengt allt þitt líf. Það var þitt líf og yndi að fara eftir vinnu í Gúmmó á Bangsa litla og leggja eða draga grásleppunet. 

Þú hafðir mikið dálæti á tónlist. Þú gast spilað eftir eyranu á munnhörpu, harmoniku og orgel. Sama hvaða lag við báðum þig að spila, þú prófaðir það og það kom. Þú gast einfaldlega gert næstum allt sem þú tókst þér fyrir hendur. 

Fyrir um 17 árum byggði fjölskyldan draumahúsið á einum fallegasta stað í Holtahverfinu. Þar vorum við komin í sveitina með túnið fyrir neðan, heyskapinn og kindurnar á beit. Húsið stendur á einum sólríkasta staðnum í bænum og hefur ávallt verið sólskin þar innan dyra sem utan. Svo óendanlega margar góðar og hamingjuríkar stundir höfum við fjölskyldan átt hér saman. 

Það var mikil hamingjustund á heimjlinu fyrir rúmum átta árum þegar Ólafur og Gísla eignuðust sitt fyrsta barn og þú varðst afi. Þá kom enn einn lítill sólargeisli inn í fjölskylduna, Hafrún Huld. Þú hafðir svo gaman af börnum og var gaman að fylgjast með hve mikla gleði hún veitti. Það er því dapurlegt að hugsa til þess að þú fáir ekki að njóta þess að vera hér þegar þú átt von á öðru barnabarni eftir um tvo mánuði. Engan hefði heldur órað fyrir því að þú yrðir ekki hér þegar Sigþór, yngsti sonur þinn, verður 25 ára, daginn áður en þú verður jarðsunginn. 

Draum þinn léstu verða að veruleika sumarið '97 er þú ásamt fjölskyldu þinni byrjaðir að byggja sumarbústað á æskuslóðum þínum fyrir neðan Hjalla í Skötufirði. Þar hafðir þú dvalið flest sumur er þú varst ungur hjá ömmu þinni og afa. Þar blómstraðir þú því ekki var hægt að komast í nánari tengsl við náttúruna en þar. Sumarbústaður við sjóinn, ekkert rafmagn, enginn sími og vatnið úr bæjarlæknum. 

Mér er sérstaklega minnisstætt er við vorum þar fjölskyldan sl. sumar. Þar sátum fram eftir nóttu, horfðum á spegilsléttan sjóinn og þú bentir okkur á hrefnurnar og fiskana stinga nefjum sínum upp á vatnsyfirborðið, hlustuðum á fuglana syngja í kyrrðinni og horfðum á kvöldsólina detta ofan í hafið. Á daginn fórum við út á sjó á slöngubátnum og drógum netin. Á þessum stundum fann ég hversu sterkar rætur þínar liggja þarna, þú geislaðir af æskuljóma og varst svo hamingjusamur. 

Það er sorglegt að þú skulir ekki fá að eyða meira af ævi þinni þar, því þarna vildir þú að þið mamma eydduð ævidögunum saman. Það var þinn draumur að komast aftur í samfélagið á Hjöllum og það varð, en með óðrum hætti en þú hafðir ætlað þér. 

Þú trúðir á líf eftir dauðann og að hinir látnu væru hér á meðal okkar í anda. Þú sagðir ávallt að lífið væri fyrir fram ákveðið og það væri aðeins einn sem réði. Það er einnig mín trú og þess vegna veit ég að þú ert hér í anda á meðal okkar. Sá eini sem öllu ræður hefur ætlað þér önnur mjög mikilvæg hlutverk á öðru tilverustigi, þar sem vel mun vera tekið á móti þér af foreldrum þínum og öllum ættingjunum frá Hjöllum. 

Elsku pabbi. Þú varst mjög heppinn er þú náðir í mömmu, því yndislegri konu hefðir þú ekki getað fengið. Þið voruð ákafiega samrýnd og náðuð að mynda þetta jafnvægi sem þarf til að tveir einstaklingar nái saman. Þó að þú hafir kvatt þtta líf svo allt of, allt of fljótt munum við systinin ævinlega vera þakklát fyrir að hafa fengið kærleiksríkt, hlýtt og friðsælt uppeldi hjá ykkur mömmu, sem er ómetanlegt veganesti út í lífið. 

Við þökkum þér fyrir allt sem þú hefur kennt okkur og gefið okkur og þitt framlag sem þú áttir í að gera okkur að því sem við erum í dag. Megi Guð og allir englarnir á himnum geyma þig, elsku pabbi minn, og gefa mömmu styrk í þessari þungu sorg og mikla missi. 

Minningarsíður

Nýleg andlát

Útfarir

Hlaðvarp

Þjónustusíða

Fræðsluefni

Sigurður Finnbogason

Útför

Til elsku pabba. Þín dóttir Sigrún