Ástkær móðir mín
Sigríður Bjarney Einarsdóttir
frá Varmahlíð
heimilisfræðikennari
Árskógum 6, Reykjavík
lést á Landspítalanum í Fossvogi miðvikudaginn 30. apríl.

Útförin fer fram frá Seljakirkju föstudaginn 16. maí kl. 13:00. 

Alúðarþakkir fær allt starfsfólk Landspítalans á B7 sem kom að umönnun hennar.

Sigríður Bjarney Einarsdóttir fæddist 7. júní 1927 í Varmahlíð, V-Eyjafjallahreppi í Rangárvallasýslu. Hún lést miðvikudaginn 30. apríl 2025 á Landspítalanum í Fossvogi.

Foreldrar hennar eru Einar Sigurðsson f. 4. apríl 1894, d. 19. júlí 1981 og Ingibjörg Bjarnadóttir f. 17. feb. 1895, d. 25. maí 1980.

Systkini Sigríðar eru: Þóra Dóra f. 3. des. 1918, d. 25. jan. 2013, Bjarni f. 3. mars 1923, d. 28. júní 1990, Hólmfríður f. 19. maí 1925, d. 6. mars 2002, Einar Ingi f. 15. des. 1931, d. 27. júní 1996 og Guðný Svana f. 31. okt. 1934, d. 20. feb. 2024.

Uppeldisbróðir Sigríðar var Guðmundur Óskar Sigurðsson sjómaður, f. 28. apríl 1919, d. 20. júlí 1996.

Barn Sigríðar er Einar Eysteinn Jónsson f. 27. nóv. 1950, barnsfaðir Jón Bragi Eysteinsson f. 6. feb. 1928, d. 14. nóv. 2013. 

Sigríður giftist þ. 12. maí 1957 Ásmundi Guðmundssyni (f. 8. okt. 1929, d. 10. apríl 2012), skipstjóra frá Flateyri í Önundarfirði.

Sigríður ólst upp í Varmahlíð og vann þar við almenn sveitastörf. Hún stundaði nám hjá séra Sigurði Einarssyni og Hönnu Karlsdóttur í Holti 1947-1949 og fór þaðan í húsmæðraskólann á Varmalandi (1949-1950). Eftir það fór hún í Húsmæðrakennaraskóla Íslands og lauk þaðan prófi sem húsmæðrakennari árið 1954.

Árið 1955 flutti hún til Reykjavíkur og varð forstöðukona mötuneytis stjórnarráðsins í Arnarhvoli, en þar starfaði hún í fimm ár. Árið 1960 hóf hún kennslu í Gagnfræðaskóla Austurbæjar og kenndi þar heimilisfræði í sex ár. Þá færði hún sig yfir í Langholtsskóla árið 1966 og kenndi þar heimilisfræði allt til ársins 1996 þegar hún hætti störfum.

Sigríður og Ásmundur fluttu árið 1958 í Goðheima 5 í Reykjavík sem þá var nýbygging. Þar bjuggu hjónin til ársins 1993 þegar þau fluttust í Árskóga 6 í Reykjavík.

Sigríður og Ásmundur ferðuðust mikið saman, bæði innanlands og utan. Þau fóru mjög víða um Ísland og gerðu einnig víðreist erlendis, mikið á eigin vegum á bíl og eins nutu þau talsvert sólarinnar á Spáni.   

Árið1999 réðust þau hjónin ásamt Einari í að byggja sér sumarbústað í Helludal, rétt við Geysi í Haukadal. Í þeirri náttúruparadís áttu þau margar ánægjustundir og dvöldu langdvölum á sumrin.

Sigríður var mjög virk í félagsstörfum, sat í mörg ár í stjórn kennarasambandsins (sem síðar rann inn í BSRB). Þá var hún formaður kennarafélags Langholtsskóla um árabil og lét breyta félaginu í starfsmannafélag Langholtsskóla. Þá söng Sigríður í Alþýðukórnum og í kirkjukór Áskirkju til margra ára.

Þegar Sigríður flutti í Árskógana, þá lét hún til sín taka í stjórn húsfélagsins og stóð reglulega fyrir viðburðum af ýmsu tagi fyrir íbúana í Árskógum 6 - 8, s.s. samkomum og dagsferðum út á land með leiðsögumönnum.

Sigríður stóð líka fyrir spilamennsku þar sem vikulega var spiluð félagsvist á mörgum borðum.  Um tíma var hún einnig drifkrafturinn í Boccia spilamennsku í Árskógum.

Útför Sigríðar fer fram frá Seljakirkju í dag, 16. maí, og hefst klukkan 13:00.

Minningarsíður

Nýleg andlát

Útfarir

Hlaðvarp

Þjónustusíða

Fræðsluefni

Sigríður Bjarney Einarsdóttir

Andlátstilkynning

Útför

Aðstandendur

Þakkir

Ertu með minningargrein?