Elskulegi pabbi, tengdapabbi, afi og langafi Sang Hoa Ly lést þann 28. Júlí á Landspítalanum Fossvogi. Útför hans fer fram mánudaginn 10.ágúst í Grafarvogskirkju kl. 13.

Elskulegi pabbi, tengdapabbi, afi og langafi lést á Landspítalanum Fossvogi 28.júlí. Jarðarför fer fram mánudaginn 10.ágúst kl.13.00


Sang Hoa Ly


Sang Hoa Ly fæddist í Suður-Kína 5. mars árið 1930. Hann lést á Landspítalanum í Fossvogi þann 28. júlí síðastliðinn, 96 ára að aldri.


Sang átti 4 systkini, 3 bræður og 1 systur. Faðir hans ásamt tveimur bræðrum hans fórust úr hungursneyð vegna langvarandi þurrkutíðar og var systir hans gefin til ættleiðingar. Sang flúði með móður sinni ásamt eftirlifandi bróður yfir til Suður-Víetnam árið 1943 og settust þau að í Saigon.


Sang giftist Thanh Tran þegar hann var 23 ára. Saman eignuðust þau 8 börn, 5 syni og 3 dætur. Þau ráku saman matarvagn rétt fyrir utan heimili þeirra, sem náði miklum vinsældum. Sang var sendur í Víetnamstríðið árið 1968 þegar Thanh var ólétt af yngsta barninu þeirra.


Eftir stríðslok þegar Norður- og Suður-Víetnam sameinuðust árið 1975, byrjuðu margir að flýja úr landi. Sang fór úr herklæðunum og hóf berfættur að finna leiðina heim til fjölskyldu sinnar. Hann var mjög ratvís og honum tókst að finna leiðina til baka til fjölskyldunnar eftir 7 ára fjarveru.


Sang og Thanh hvöttu börn sín til að finna betra líf í öðru landi. Öllum börnum þeirra tókst að flýja til annarra landa. Þrjú þeirra búa á Íslandi, tvö í Japan, tvö í Bandaríkjunum og eitt í Þýskalandi.


Sang og Thanh komu til Íslands sumarið 1991. Þau settust að í Vesturbænum og bjuggu þar til æviloka. Sang vann hjá Olís til 70 ára aldurs. Sang og Thanh ferðuðust um heiminn til að heimsækja börnin sín, barnabörn og aðra ættingja. Árið 2009 fóru Sang og Thanh síðustu ferðina saman, þar sem Thanh var komin með nýrnabilun. Þegar Thanh lést árið 2016, bjó Sang með Árna barnabarni sínu, sem var honum innan handar.


Sang fór með hluta af fjölskyldunni í minningarferð til Víetnam í lok árs 2016, til að minnast konu sinnar. Eftir það hélt hann áfram að ferðast með fjölskyldunni til ýmissa landa. Síðasta ferð hans til Víetnam var fyrir tveimur árum en það var hans draumur að komast þangað aftur, þar sem hann heimsótti ættingja, búddhahof og fór með peningagjafir til þeirra sem hann gat hjálpað.


Sang var góðhjartaður, hógvær, nægjusamur og með góða nærveru. Hann hugsaði alltaf um aðra, var fólki til staðar, var hjálpsamur og gjafmildur. Sang tók brosandi á móti öllum, hann hafði léttan húmor, þótti vænt um að vera umkringdur fólkinu sínu og var alltaf spenntur að fá símtöl frá börnunum sínum erlendis frá. Hann hafði gaman af því að segja sögur af sér og fjölskyldunni þegar hann bjó í Víetnam og Kína.


Sang var í góðu formi langt fram eftir aldri og honum þótti gott að fara í göngutúra. Hann vann ekki í langan tíma eftir komuna til Íslands en hann var úrræðagóður og tók upp á því að safna flöskum í göngutúrunum sínum. Ágóðann setti hann í góðgerðarfélög. Á síðustu árum fór hann í styttri göngutúra og var aðeins farinn að styðjast við göngustaf. Hann hvatti aðra til að ganga líka. Hann var mjög klár, með skýran huga og hafði gaman af því að spila við fjölskylduna og horfa á kínverska sápuóperu.


Sang hafði mikinn áhuga á kínverskum lækningajurtum og notaðist við jurtir til heilsubóta. Hann náði að halda góðri heilsu langt frameftir aldri. Hann var með sykursýki og passaði vel upp á mataræðið. Hann var samt lúmskur sælkeri og þótti vestrænn skyndibitamatur góður eins og KFC og Domino’s pizzur sem hann leyfði sér til hátíðabrigða.


Eftir innlögn á spítalann hélt hann áfram að leggja áherslu á við börnin sín og barnabörn að halda áfram að vera góðar manneskjur, að vera góður við alla og bera virðingu fyrir öllum. Gera góðverk til að hjálpa öðrum að öðlast betra líf, án þess að búast við einhverju til baka.





[DEFAULT]

Nú þegar ég kveð þig, er mér efst í huga þakklæti. Ég er virkilega þakklát fyrir að hafa átt þig sem afa í öll þessi ár. Ég minnist róandi nærveru þinnar, lífsgleði, húmors, hlýju og góðmennsku. 

Ég er þakklát fyrir minningarferðina sem við fórum saman ásamt móður minni og bræðrum mínum tveimur til Víetnam eftir fráfall ömmu árið 2016. Gleðin sem ríkti þegar þú og mamma hittuð ættingja okkar var dýrmæt upplifun og mun seint gleymast. Þá var langt um liðið síðan þið hittuð þau síðast og fyrsta skipti okkar systkina. Búddahofin sem við heimsóttum ásamt fólkinu sem við kynntumst voru eftirminnileg. Þú réttir öllum sem við hittum rautt umslag sem innihélt peningagjöf. Þitt mottó var að ef maður getur bætt líf einhvers, skipti ekki máli hver það væri, þá gerir maður það. Þú þurftir ekki mikið,  varst alltaf svo nægjusamur og vildir frekar nota peningana til að hjálpa öðrum. Þú spurðir ekki spurninga og bjóst aldrei við neinu til baka. Það sem var líka eftirminnilegt í ferðinni var hvað þú varst í góðu formi, 86 ára að aldri. Við gengum mikið í ferðinni, upp og niður misbrattar tröppur að búddahofum sem við heimsóttum. Við höfðum áhyggjur af því hvort þú kæmist upp allar þessar tröppur en þú sýndir okkur að það var alveg óþarfi, því þú varst alltaf kominn fyrstur upp. Þér tókst meira að segja að koma fararstjóranum okkar á óvart, hann hafði ekki farið með fólki á þessum aldri í svona ferðir og ætlaði ekki að trúa því hve hraustur þú varst.

Þú varst alltaf svo barngóður. Hjörtur Smári og Harpa Dís barnabarnabörn minnast þín sem góðan, hlýjan og gjafmildan langafa og var ávallt gott að koma í heimsókn. Þrátt fyrir tungumálaörðugleika tókst þú alltaf brosandi á móti öllum, sýndir hlýju og góða nærveru. Í gegnum veikindin þín á spítalanum í sumar, var alltaf stutt í brosið þitt og húmorinn. Starfsfólkið á spítalanum talaði um hve brosmildur þú værir. Styrkurinn sem þú hafðir var aðdáunarverður.


Þitt fallega hjartalag og góðmennska mun halda áfram að lifa í hjörtum okkar allra og leiða okkur áfram í gegnum lífið. Nú hafið þið amma verið sameinuð á ný. Amma átti það til að grínast í þér og þú tókst því alltaf svo góðlátlega. Það var léttur húmor á milli ykkar, sem hefur smitast yfir til barnanna ykkar, barnabarna og barnabarnabarna. Lífsgleðin og seiglan sem ríkti hjá ykkur ömmu mun lifa áfram. Með söknuði og þakklæti kveð ég ykkur. Hvíl í friði í faðmi hvors annars elsku afi og amma. 

Minningarsíður

Nýleg andlát

Útfarir

Hlaðvarp

Þjónustusíða

Fræðsluefni

Sang Hoa Ly

Andlátstilkynning

Útför

Aðstandendur

Elsku afi minn