Sævar Guðmundsson. Ástkær eiginmaður, faðir, afi og langafi lést eftir erfiða baráttu á Landspítalanum þann 26.apríl 2022.

Útför fer fram þann 6.maí kl.12 í Keflavíkurkirkju.

﻿Sævar Guðmundsson var fæddur á Akureyri 9.maí 1962. Hann er sonur hjónanna Guðmundar Haukssonar (f.24.okt.1934-6.okt.1996) og Theódóru Káradóttur (f.31.mars 1935). Systkini Sævars eru Kári Guðmundsson (f.11.feb.1959), Haukur Guðmundsson (f.19.júlí1960) og Sigrún Guðmundsdóttir (f.8.des.1965). Sævar kvæntist Öddu Þorbjörgu Sigurjónsdóttur 6.júlí 1985. Dætur þeirra eru Þórdís Katla Sævarsdóttir fædd 9.febrúar 1983 og Brynhildur Gugja Sævarsdóttir fædd 3.júní 1986. Sævar flutti 3 ára til Keflavíkur með foreldrum sínum og bjó í Reykjanesbæ fram að lokabaráttunni. Hann hóf búskap snemma (18 ára) og starfaði mestan hluta ævinnar við smíðar og viðhald. Hann stundaði veiðar og útivist og hafði mikla ánægju af því að ferðast bæði innanlands og erlendis. Hann var einstaklega virkur maður og byggði stóra sjúkraþjálfunarstöð með hjálp góðra vina auk þess að byggja sér heimili. Hann keypti sumarbústað ásamt tengdaforeldrum og byggði við hann. Þar naut hann sín best, helst út á vatni á kajaknum sínum að veiða.

Anna Helga Líf Sigurbjargard.

Elsku þórdís Katla ég minnis pabba þinn hann var góður faðir og hjartahlýr ég samhryggis þér innilega ég mun geyma minningar um okkur og þig í hjarta mínu missir þinn er mikill meigi ljósið í hjarta þínu ætíð loga þín vinkona um eilíf Anna Helga Líf Sigurnjargadóttir þverholt 23 nún í Reykgjavík

Högni Róbert Þórðarson

Ást og innilegar samúðarkveðjur til ykkar allra. Dásamlegur maður hann Sævar.

Lovísa Sveinsdóttir

Elsku fjölskylda við sendum ykkur öllum innilegar samúðarkveðjur

Lovísa Sveins og fjölskylda

Sigurður Böðvarsson

Innilegar samúðarkveðjur. Guðrún Bragadóttir og Sigurður Böðvarsson.

Jóhanna Oddný Sveinsdóttir

Elsku Bogga, dætur og fjölskyldur.

Innilegar samúðarkveðjur.

Jóhanna Oddný Sveinsdóttir

Þórdís Þorbjörg Þormóðsdóttir

Elsku Bogga, dætur og fjölskyldur.

Ég sendi ykkur öllum innilegar samúðarkveðjur vegna andláts ykkar elskaða Sævars.

Bestu kveðjur,

Dísa Þormóðs.

[DEFAULT]

Kær vinur okkar, Sævar Guðmundsson, er fallinn frá langt fyrir aldur fram. Þessi sómadrengur háði harða og langa baráttu við illvígan sjúkdóm en varð að lokum að láta í minni pokann. Hann hélt þó alltaf í vonina því lífslöngunin var sterk og til staðar þótt á brattann væri að sækja.

Sævar var einstaklega skemmtilegur maður. Lífsgleðin, glaðværðin og smitandi hláturinn voru einkennandi í fari hans enda hló hann með öllu andlitinu. Að sama skapi hafði hann einnig þægilega og góða nærveru. Það var gaman að spjalla við hann og hann hafði alltaf frá einhverju skemmtilegu að segja. Ef maður þurfti að ná í Sævar var best að hringja. Það þýddi ekkert að senda skilaboð eða tölvupóst, hann kunni ekkert á svoleiðis. Það var líka svo miklu ánægjulegra að tala við hann beint.

Allt lék í höndum Sævars enda maðurinn einstaklega handlaginn. Hann var frábær smiður, gat smíðað allt. Ekkert verkefni var honum ofviða. Ekki vöfðust raf- eða pípulagnir heldur fyrir honum. Ef leita þurfti til hans með ýmis verkefni var hann alltaf boðinn og búinn að aðstoða. Sagði aldrei nei. Kom meira að segja óbeðinn ef því var að skipta ef hann hafði frétt að þörf væri á aðstoð eða ráðleggingum.

Veiðieðlið var Sævari í blóð borið. Þegar líða tók á sumar fór hann að ókyrrast. Það þurfti að hafa allt klárt fyrir rjúpuna. Hann fór gjarnan í margar veiðiferðir og fuglunum fjölgaði hægt og rólega í kistunni. Ekki skemmdi svo fyrir hvað hann var duglegur að elda dýrindis máltíðir úr öllu sem hann veiddi. 

Það er mikil eftirsjá af þessum góða manni. Hann gerði tilveru allra samferðamanna sinna betri og bjartari. Hans er sárt saknað. 

Við vottum Boggu og allri fjölskyldunni okkar dýpstu samúð. Megi allar góðu minningarnar lýsa upp huga ykkar.

Eftirfarandi texti, eftir Braga Valdimar Skúlason, á vel við á þessari stundu.: 

“Life is what happens while you are busy making other plans” skrifaði John Lennon á sínum tíma og það er svo sannarlega heilmikill sannleikur í því. 

Það var eins og að fá högg í magann þegar fréttir bárust af því að baráttu Sævars væri lokið.  Þótt þetta væri búið að vera yfirvofandi þá hélt maður alltaf í vonina um kraftaverk. Vonina um að hann myndi ná yfirhöndinni og komast aftur upp í bústað og út á vatn að veiða. En það gekk ekki eftir þrátt fyrir hetjulega baráttu, bæði Sævars og ekki síður Boggu sem æðrulaus stóð alltaf eins og klettur við hlið hans og var bæði skjólið hans og styrkur. 

En þótt plönin gangi ekki alltaf upp þá er ekki hægt annað en að þakka fyrir allt sem lífið hefur gefið. Um leið og ég kveð fyrrverandi mág og yndislegan vin þá þakka ég ómetanleg kynni í rúm 45 ár. 

Sú gæfa að hafa kynnst Sævari á unga aldri og fá að vera samferða honum og Boggu í gegnum lífið er eitthvað sem verður aldrei metið til fjár.  

Þessi dásamlegi einstaklingur, þessi ótrúlega skemmtilegi hrakfallabálkur sem bjó iðulega til sína eigin málshætti okkur vinunum til mikillar gleði, var algjörlega ómissandi í öllum ferðum og mannfögnuðum og litaði líf okkar allra með sinni einstöku nærveru. 

Sævar var mikið náttúrubarn.  Hann elskaði að fara á veiðar og var listakokkur en hann hafði líka mjög ákveðnar skoðanir á mat og það eru ekki miklar ýkjur að segja, að ef lambið jarmaði ekki þegar það var tekið af grillinu þá taldi Sævar nokkuð víst að það væri ofeldað.  

Í “Saumó og Smíðó” vinahópnum var hann sannkallaður gleðigjafi og svo sannarlega einn af skemmtilegustu mönnum sem ég hef kynnst. Enginn annar en Sævar mun hlaupa upp um “fjöll og fiðrildi”, fótbrotna við “að bera kratadóttur yfir sést-varla-læk í Þórsmörk”, lýsa háum rómi ákveðnu karlkynsbragði af hreindýrakjöti á virðulegum veitingastað á Akureyri, borða humlana í bjórkynningunni (sem átti alls ekki að gera) eða hoppa milli báta á fleygiferð í miðjum Eyjafirði – já, alveg eins og James Bond!   Nei, það var aldrei nein lognmolla í kringum Sævar og ekki hægt annað en að brosa í gegnum tárin. 

Minningar, sem eru margar hverjar sameign okkar vinanna, líða hver af annarri í gegnum hugann. Af nógu er að taka; Þórsmerkurferðirnar og blár varðeldur, danskólinn og gönguskórnir,  bústaðaferðirnar, þorrablótin og fræsidansinn, rjúpnaferðirnar og öll spilakvöldin ýmist á Garðaveginum eða Lyngmóanum. 

Luxembourg, Spánn, Eagles tónleikarnir í London og svo Tenerife 2019 þar sem við áttum svo yndislegt spjall um lífið og tilveruna.

Stórt skarð er komið í vinahópinn okkar. Skarð sem verður aldrei fyllt en minningarnar munu svo sannarlega ylja okkur sem eftir sitjum þar til við hittumst aftur hinum megin.  

Elsku Bogga, Dódí, Gugja og fjölskyldur. 

Innilegustu samúðar- og kærleikskveðjur  

Sit hérna á fallegum vordegi sólin skín, fuglasöngurinn  hljómar og ég með sorg í hjarta hugsa til góðs vinar hans Sævars sem kvaddi alltof snemma eftir harða og snarpa baráttu við erfið veikindi með Boggu sína sér við hlið.

 Elsku skemmtilegi, uppátækjasami, duglegi og trausti vinur sem elskaði lífið, náttúruna og fólkið sitt. Hann var vinur vina sinna alltaf tilbúin að hjálpa og koma öllum í gott skap með húmor sínum og smitandi dillandi hlátri.

 Vinátta okkar hófst á unglingsárunum og allt frá þeim tíma höfum við verið í stórum og dásamlegum vinahóp sem tengist sterkum vináttuböndum. Hópurinn okkar saumó og smíðó sem samanstendur af æskuvinum og mökum þeirra. 

Sævar átti risastórt pláss í hópnum og við eigum ótalmargar dýrmætar minningarperlur frá okkar samverustundum. Allar Þórsmerkurferðirnar, sumarbústaðaferðirnar, veiðiferðir hvort það var í Heiðarvatn eða í rjúpnaveiðar þar sem svokallaðir labbakútar fengu stundum að koma með og margt fleira skemmtilegt kemur upp í hugann.

Takk fyrir allt kæri vinur það var sannarlega gott og gefandi að vera samferða þér í lífinu, þín verður sárt saknað.

''Það þarf fólk eins og þig fyrir fólk eins og mig''  

Elsku Bogga, Þórdís, Gugja og fjölskyldur megi ljós og friður vera með ykkur öllum á erfiðum tímum. 

Minningarsíður

Nýleg andlát

Útfarir

Hlaðvarp

Þjónustusíða

Fræðsluefni

Sævar Guðmundsson

Andlátstilkynning

Útför

Aðstandendur

Minning um góðan dreng

Kærleikskveðja

Kæri vinur.