Ragnhildur Eyja Þórðardóttir fæddist að Kirkjubóli, Hvítársíðu, í Borgarfirði 10. september 1924. Hún lést á Landspítalanum 9. júní 2016. Foreldrar hennar voru Þórður Lárentíus Jónsson, bóndi, f. 1884, d. 1938, og Gunnvör Magnúsdóttir, f. 1882, d. 1972. Systkini Ragnhildar Eyju voru: Ragna, Jón, Guðný, Sigríður, Guðrún, Lára og Magnús. Þau eru öll látin.Ragnhildur Eyja giftist Sigfúsi Kristni Gunnlaugssyni viðskiptafræðingi, 31. júlí 1953. Sigfús var fæddur á Dalvík 22. júlí 1924 og lést 22. júní 1970. Foreldrar hans voru Gunnlaugur Sigfússon, smiður, f. 1883, d. 1959, og Sigríður Sigurðardóttir, f. 1892, d. 1970. Börn Ragnhildar Eyju og Sigfúsar eru: 1) Sigríður Elín viðskiptafræðingur, f. 24.8. 1955, gift Oddi Carli Einarssyni. Þau eiga þrjú börn; a) Sigfús Ragnar, kvæntur Eddu Björk Agnarsdóttur og eiga þau tvær dætur: Elínu Ósk og Ástu Sif. b) Einar, í sambúð með Helgu Rán Sigurðardóttur. c) Þórdís Anna, í sambúð með Henning Jónassyni. Sonur Þórdísar er Elías. 2) Arnór Þórir dýrafræðingur, f. 7.11. 1958, kvæntur Gunnhildi Óskarsdóttur. Þau eiga þrjú börn; a) Óskar Örn, kvæntur Öglu Sigríði Egilsdóttur og eiga þau Magnús. b) Ragnhildur Erna. c) Snorri Már, í sambúð með Chanel Björk Sturludóttur. 3) Gunnlaugur Sigfússon, læknir, f. 23.2. 1961, kvæntur Sólveigu Kristjánsdóttur. Gunnlaugur var kvæntur Jóhönnu Sólveigu Lövdahl. Börn þeirra eru: a) Eva Ýr. Hún á þrjú börn: Aldís Eyja, Bjarni Magnús og Grímur Kári. b) Sigfús Kristinn, kvæntur Unni Ágústu Guðmundsdóttur og þau eiga Kolbein Kára. c) Einar Lövdahl í sambúð með Heiðdísi Hilmarsdóttur.Ragnhildur Eyja ólst upp í Reykjavík hjá fósturforeldrum sínum Arnóri Sigmundssyni, sjómanni, f. 1891, d. 1944, og Þórdísi Magnúsdóttur, f. 1887, d. 1962. Að námi loknu vann hún í félagsmálaráðuneyti frá 1944-1958. Þegar eiginmaður hennar lést árið 1970 fór hún að vinna hjá nýstofnuðu heilbrigðis- og tryggingamálaráðuneyti og var þar deildarstjóri þar til hún lét að störfum vegna aldurs 1994. Á unga aldri var Ragnildur Eyja mikið í íþróttum, æfði fimleika með ÍR og sýndi m.a. með úrvalsflokki á lýðveldishátíðinni á Þingvöllum 1944. Ragnhildur Eyja tók virkan þátt í félagsmálum, sat í stjórn starfsmannafélags stjórnarráðs og sinnti fleiri trúnaðarstörfum á vegum þess. Hún var meðlimur í Kvenfélaginu Hringnum og styrktarfélaginu Göngum saman.

[DEFAULT]

Eyja var einstök kona. Hún var móðir vina minna og heimili hennar stóð okkur vinum barna hennar opið meðan þau bjuggu í Hvassaleitinu hjá móður sinni. Þetta voru skemmtilegir tímar.

Eyja sagði mér einhverju sinni að eftir að hún hefði orðið ekkja þá hefði hún tekið þá ákvörðun að einbeita sér að því að halda utan um börnin sín og koma þeim til manns. Og það gerði hún svo sannarlega.

Það hefur örugglega ekki verið auðvelt að vera útivinnandi einstæð móðir með þrjú börn. En hjá Eyju kom ekki annað til greina en að halda heimili áfram í Hvassaleitinu. Og þangað var gott að koma. Ég var þar tíður gestur ásamt vinum Gulla á menntaskólaárunum. Eyja tók okkur alltaf fagnandi. Hún var glöð og hress og deildi skoðunum sínum með okkur umbúðalaust. Hún rökræddi við okkur á jafnréttisgrundvelli og það urðu oft hressileg skoðanaskipti. En enginn fór skaðaður frá því spjalli sem oftar en ekki leystist upp í hlátrasköllum.

Við Eyja vorum sérstakir bandamenn. Hún lét mér a.m.k. líða þannig. Á æskuárum sínum hafði Eyja oft komið til ömmu á Urðarstíginn, en móðir hennar og amma voru vinkonur. Og þar sem Eyja þekkti til fólksins míns, og við bæði Fríkirkjufólk af eðalkrataættum, þá vorum við á sama báti. Ég lét mér það vel líka og naut þess alla tíð, en ég veit að fleiri vinir barna Eyju áttu við hana náið samband. Þannig manneskja var Eyja.

Eyju var annt um vinahóp barna sinna og hún fylgdist með okkur og fjölskyldum okkar. Þó fundum okkar Eyju hafi fækkað eftir því sem árin liðu þá var alltaf gaman að hitta hana við ýmis tækifæri. Undanfarin ár tókum við hjónin upp á því að heimsækja Eyju á aðventunni og áttum einstaklega skemmtilegar og nærandi stundir með henni og Gunnhildi.

Það var gaman að rifja upp góðar stundir með Eyju og nú þegar við kveðjum þessa góðu vinkonu þá er gott að eiga þessar fallegu minningar.

Eyja var sannkölluð ættmóðir. Hún var stolt af börnunum sínum, tengdafólki og afkomendum sínum öllum. Og það mátti hún svo sannarlega vera. Hún fylgdist náið með öllu sínu fólki og þeir voru örugglega ekki margir dagarnir sem hún heyrði ekki í börnunum sínum.

Ég veit ég tala fyrir hönd stórs hóps sem þótti afar vænt um Eyju og við kveðjum í dag einstaka konu og góðan vin sem vildi öllum vel.

Við Linda sendum Ellu, Adda, Gulla og öllu þeirra fólki okkar innilegustu samúðarkveðjur.

Minningarsíður

Nýleg andlát

Útfarir

Hlaðvarp

Þjónustusíða

Fræðsluefni

Ragnhildur Eyja Þórðardóttir

Útför

Kveðja frá Boga