﻿Óskar fæddist í Reykjavík 18.okt.1955.  Hann var sonur hjónanna Valgerðar Björgvinsdóttur frá Garði í  Mývatnssveit f.1922 og Björns Bjarnasonar f. 1918 á Mýrum íHrútafirði.  Óskar var fjórði í röð þeirra bræðra Björns f. 1945, Stefáns Björgvins f.1946 og  Bjarna Gunnars f. 1949 yngst var svo systirin Hólmfríður Steinunn f.1958. Óskar ólst upp á Hellisgötu í Hafnarfirði og gekk í Lækjarskóla og lauk svo gagnfrprófi í Flensborg. Hann hóf störf hjá Eimskip í Hafnarfirði og færði sig svo til Reykjavíkur.  Árið 1977 hóf hann sambúð með Ásdísi Sigurðardóttur frá Húsavík, þau giftu sig í Húsavíkurkirkju 17.des. 1977, þau byrjuðu búskap í Hafnarfirði. Þann 18.maí eignuðust þau dótturina Sólveigu Ósk. Fjölskyldan flutti til Húsavíkur í ágúst 1979 og hóf Óskar störf hjá rafveitu Húsavíkur sem tækjamaður og vann þar til dánardags. Óskar féll af bifhjóli á móts við bæinn Héðinshöfða norðan Húsavíkur og slasaðist illa á höfði. Óskar var fluttur með sjúkraflugi sama kvöld 25.mars 1982 og lá á gjörgæslu Borgarspítalans uns hann lést af meiðslum sínum þann 2.apríl. Útför Óskars var gerð frá Húsavíkurkirkju 10. apríl 1982.

[DEFAULT]

40 ÁR - ótrúlegt hvað tíminn líður hratt - öll þessi ár liðin síðan þú flaugst inn í sumarlandið elsku Óskar minn.

Það var erfið vikan frá 25.mars þegar þú slasaðist og til dagsins í dag, 2.apríl,  þegar öndunarvélin dró síðasta andardráttinn fyrir þig og líkaminn gaf sig. Þú varst búinn að yfirgefa hið jarðneska líf þegar ég kom til þín upp á spítala, en mér fannst samt gott að geta faðmað þig aðeins lengur en svo varð ég að yfirgefa þig- það tók á.

Elsku vinur minn sem varst alltaf hraustur og hugsaðir vel um þig, varst nú allur.  Hvernig átti ég að segja litlu stelpunni okkar henni Sólveigu Ósk frá þessu ? og hvað nú með litla barnið sem ég gekk með ? það mundi fæðast föðurlaust. En tíminn beið ekki eftir því að ég gæti hugsað um allt, ég hafði kveðjuathöfn í Fossvogskapellu þar sem um 100 manns mættu, þú varst vinamargur og vel liðinn. Við flugum saman norður ég með Sólina okkar í fanginu en þú í kistu. Það var erfið heimkoman þar sem pabbi og fleiri tóku á móti okkur - mér fannst að ég yrði að fara heim með þig aftur, þótt þú hefðir alltaf búið í Hafnarfirði.  Jarðsungið var frá Húsavíkurkirkju 10.apríl 1982 - fjölmenni mikið var við athöfnina og fólkið þitt kom með flugvél að sunnan.  Þessir dagar voru allir í móðu og liðu bæði hægt og hratt.  

Við Sólveig héldum áfram að búa í húsinu okkar fram á haustið en fórum þá til pabba og mömmu í kjallarann, ég fór svo suður í ágúst og þann 11.september fæddist lítill drengur sem ég gaf nafnið Óskar Björn.  

Árin hafa nú flogið við leik og störf og margt gerst en þín hefur ávallt verið saknað. Börnin okkar tvö búa erlendis og hafa hvort eignast eitt barn, 2 litla drengi sem heita Ragnar Flóki Elliott f. 2018 og Óskar Loki f. 2020, yndislegir guttar sem fá að vita af Óskar afa sínum þegar þeir hafa skilning á dauðanum.  

Ég veit ekki hvað bíður okkar þegar dauðinn bankar uppá en ég vona svo sannarlega að ef það er mögulegt að fylgjast með okkur sem eftir erum á jörðinni þá hafir þú getað fylgst með börnunum okkar og glaðst yfir öllu því sem hefur vel farið, þrátt fyrir smá hikst hér og þar, þá hefur mér tekist með góðri hjálp frá Bjarna Ómari manni mínum frá 1993 að gera mitt besta. Hann gekk þeim í föðurstað og hefur ávallt sýnt þeim ást, skilning og kærleika, eins og þau væru hans eigin og svo gætir hann mín þegar sorgin sækir að. 

Takk ástin mín fyrir árin 5 sem við áttum saman, þau voru mjög góð og takk fyrir börnin sem þú gafst mér til að ala upp og elska.

Þegar upp er staðið er það kærleikurinn og hlýjan sem kemur okkur gegnum lífið og að hugsa vel um samferðamenn okkar.  

Takk elsku Óskar fyrir ást þína og gjafir í lífi mínu.

Minningarsíður

Nýleg andlát

Útfarir

Hlaðvarp

Þjónustusíða

Fræðsluefni

Óskar Björnsson

Útför

40 ár