Ástkær faðir okkar, tengdafaðir, afi og langafi, Ölver Benjamínsson frá Ystu-Görðum, lést á gjörgæsludeild Landspítalans laugardaginn 2.desember

Útförin fer fram frá Borgarneskirkju fimmtudaginn 14.desember kl. 14:00.

Fjölskyldan þakkar auðsýndan hlýhug og vináttu. 

Ölver Benjamínsson, fæddist á Ystu-Görðum í Kolbeinsstaðahreppi, þann 24. maí 1945. Hann lést á gjörgæsludeild Landspítalans við Hringbraut, þann 2.desember 2023 eftir mjög bráð veikindi.

Foreldrar hans voru Benjamín Markússon og Arndís Þorsteinsdóttir bændur á Ystu-Görðum. Systkini Ölvers eru Markús, Rut, tvíburasystir Ölvers sem er látin, Þrosteinn Gunnlaugur, Rebekka og Guðmundur.

Ölver ólst upp við að þurfa að vinna ýmis sveitastörf og sótti farskóla um sveitina eins og tíðkaðist þegar hann var unglingur. Hann fór í fyrsta skipti til Reykjavíkur þegar hann var 17 ára og komin með bílpróf, til þess að kaupa sér Wolksvagen bjöllu biðfreið. En hann hafði alltaf mikinn bílaáhuga. Sem ungur maður fór Ölver á sjó, vann m.a. í sláturhúsi, tók meirapróf og keyrði mjólkurbíl.

Það var einmitt á brúsapallinum við Saura í Hraunhreppi sem hann hitti unga snót sem varð síðan kona hans, en þann 6.maí 1967 giftist Ölver, Ragnhildi Andrésdóttur frá Saurum. Þá höfuð þau þegar eignast sinn elsta son Óskar. 

Raggý og Bói eins og þau voru oftast kölluð, hófu búskap í Stóra-Langadal á Skógarströnd sama ár, og árið 1973 þegar þau fluttu að Ystu-Görðum til að taka við búi þar, höfðu Benjamín og Andrés líka bæst í barnahópinn.

Þau bjuggu fyrst með kindur en fljótlega byggðu þau fjós og hlöðu og hófu kúabúskap einnig. Björk og Björgvin bættust við og þá voru börnin orðin fimm á rétt rúmum 10 árum. 

Bói keyrði flutningabíla meðfram búskapnum en það var algengt eins og nú að bændur lifðu ekki á búskap einum saman.

Bói og Raggý voru dugleg að ferðast saman, innanlands og utan. Bæði með börnum sínum og vinum. En það má segja að varla sé til sá vegaslóði á Íslandi sem þau eru ekki búin að fara. 

Þau fóru fjölmargar ferðir með bændaferðum, um Evrópu og til Kína. Til Kanarýeyja fóru þau nánast á hverjum vetri í 20 ár. Þau eignuðust fjölmarga vini um allt land í ferðum sínum. 

En þau voru ekki bara vinamörg, heldur voru þau þekkt fyrir gestreisni sína og margir sem áttu leið hjá, komu við og þáðu kaffisopa. Alltaf mátti treysta á, að það væri til kaka með kaffinu í Ystu-Görðum eða að vera boðin biti ef komið var á matartíma.

Þau bjuggu á Ystu-görðum þar til um það leyti sem Raggý lést. En hún lést 8.nóvember 2020 á líknardeild Landspítalans í Kópavogi. Synir þeirri Andrés og Björgvin tóku þá við jörðinni. 

Bói og Raggý voru mjög samrýmd hjón og margir sem þekkja ekki að nefna annað þeirra nema í sömu setningunni. Bói upplifiði að hann væri bara hálfur maður eftir að Raggý lést, en bar auðvitað höfuðið hátt og hélt sér uppteknum við að aðstoða áfram í sveitinni og festi líka kaup á sumarbústað austur í Grímsnesi sumarið eftir. Til marks um dugnað og elju Bóa, þá stækkaði hann bústaðinn, lagði 500 fm. af þökum og gróðursetti fullt af trjám á þessum tveimur árum sem hann lifði eftir að hann eignaðist bústaðinn.

Bói var hjálpsamur og duglegur maður. Alltaf að og mikill verkstjóri. Hann var útsjónarsamur og laginn smiður sem gat smíðað bæði úr járni og tré. Í vélageymslunni unni hann sér við að smíða og laga allt milli himins og jarðar og það var sama hvort það var einhver með sprungið dekk eða heyvagn sem þurfti að smíða fyrir nágrannana, það var alltaf hægt að leita til Ölvers í vélageymsluna. 

Bói var nýjungagjarn og fylgist vel með tækni sem snéri að búskap og því umhverfi sem hann var í hverju sinni. Hann las allt sem hann komst yfir og var víðsýnn og fróðleiksfús.

Hann var rólegur og yfirvegaður að eðlisfari og hann var duglegur að hafa börnin með sér í útiverkum og í því sem hann var að gera. Þau lærðu því snemma að vinna og bjarga sér sem þau búa að sem fullorðið fólk.

Bói var barngóður og húmoristi og eftir því sem árin liðu varð hann líka mýkri og mýkri maður og afi sem naut þess að vera með börnum sínum og barnabörnunum.

Bói lést eins og áður sagði á gjörgæsludeild Landspítalans á Hringbraut eftir bráðveikindi þann 2.desember síðastliðinn. En við sem eftir lifum og þekktum hann vel, erum nokkuð viss um að hann hefði ekki viljað hafa þetta á neinn hátt öðrvísi en fljótt og örugglega. Því hann var ekki fyrir að láta aðra hafa fyrir sér eða hefði viljað eyða síðasta hluta ævi sinnar liggjandi aðgerðarlaus og hvað þá bjargarlaus inn á stofnun.

Ölver lætur eftir sig 5 börn: 1) Óskar, barn: Markús Loki. 2) Benjamín, börn: Jóhann Ólafur, Magnús og Jón Grétar. 3) Andrés, maki: Þóra Sif Kópsdóttir. Börn: Ragnhildur, Ársæll Dofri og Von. 4) Björk Ben, sambýlismaður: Svanur Már Scheving. Börn hennar: Snædís og Patrekur Alex og 5) Björgvin, maki: Margrét Kolbeinsdóttir. Börn: Andrea, Ölver og Emil. Langaafabörnin eru 3.

[DEFAULT]

Elsku Pabbi, ég vildi óska að ég hefði haft meiri tíma með þér. Þú fórst svo snöggt og án fyrirvara. Ég var ekki tilbúin!

Ég hugga mig þó við að þú ert nú komin til mömmu sem dó líka alltof snemma á lífsleiðinni. 

Ég man þegar ég var lítil og skreið upp í fangið hjá þér þegar þú komst inn í mat, annars varstu alltaf úti að vinna í mínum minningum. Það var svo mikil friðsæld og hlýja í fanginu þínu. Þegar ég varð eldri fór ég með þér út í verkin í sveitinni okkar. Þú kenndir mér svo margt og ég bý að því í dag. Þegar þú varst að gefa kindunum raulaðir þú oft lagstúf og ég raulaði með: ,,Kisa mín, kisa mín hvaðn ber þig að...“ var eitt þeirra. Það var aldrei leiðinlegt að eyða tíma með þér. 

Þið mamma hjálpuðuð mér svo mikið með börnin mín og ég á svo margar góðar minningar um samveru okkar bæði í sveitinni og eins á öllum ferðalögunum okkar um Ísland og þegar við komum með til Kanarý. 

Hluti af þér dó þegar mamma dó og síðasti hlutinn af mömmu dó með þér. Það er ótrúlegt að þið séuð bæði farin á aðeins 3 árum. En minningarnar lifa og ég bý að þeim, þótt ég sakni ykkar svo mikið.

Þú varst svo traustur elsku pabbi. Alltaf gat ég rætt allt við þig og leitað til þín. Þú varst kletturinn í mínu lífi. Ég var ekki alveg tilbúin að þú værir að fara strax.

Elsku pabbi ég trúi því að nú sé stiginn dans í sumarlandinu, þar sem þið eruð sameinuð á ný. Ég bý að því að hafa fengið að eiga þig sem pabba í mínu lífi og ég þakka þér fyrir það.

Hvíl í friði og kærleika og Guð geymi þig. 

Elsku afi, þú ert besti afi í alheiminum

Elsku afi, þú ert besti afi í alheiminum. 

Takk fyrir að vera svona góður við okkur.

Við vildum óska að við gætum gefið þér eitt knús í viðbót.

En við þekkjum að geta alltaf lokað augunum og þá kemur þú til okkar.

Nú ert þú engill á himnum eins og Amma sem vaka yfir okkur.

Patrekur Alex Ívarsson og Snædís Ívarsdóttir

Minningarsíður

Nýleg andlát

Útfarir

Hlaðvarp

Þjónustusíða

Fræðsluefni

Ölver Benjamínsson

Andlátstilkynning

Útför

Aðstandendur

Þakkir

Ég var ekki tilbúin pabbi!

Elsku afi, þú ert besti afi í alheiminum