Ástkær eiginkona mín, móðir okkar, tengdamóðir, amma og langamma Ólína Margrét Jónsdóttir lést í faðmi fjölskyldunnar, á Hrafnistu í Hafnarfirði 30. ágúst 2024.

Útför Ólínu fer fram föstudaginn 6. september kl. 11:00 í Fríkirkjunni í Hafnarfirði.

Fjölkyldan þakkar öllu starfsfólki dagvistunar Sólvangs og Ölduhrauns á Hrafnistu fyrir hlýtt viðmót, umhyggju  og góða umönnun á erfiðum tímum.

Ólína Margrét Jónsdóttir (Lína), fæddist í Hafnarfirði 1.ágúst 1945. Hún lést eftir nokkurra ára baráttu við Alzheimer á Hrafnistu í Hafnarfirði 30.ágúst 2024.

Foreldrar hennar voru Elín Friðjónsdóttir og Jón Þorbjörnsson.

Systkini Línu eru Birgir Örn, d.1970, Jón Ellert, Einar Kristján og Sturla.

Lína giftist Steini Sveinssyni 26.september 1970 þegar Elín var 7 ára. Saman eignuðust þau 2 dætur, Tinnu og Völu.

Börn Elínar eru Ólína Margrét f.1985, eiginmaður hennar Bjarni Birgir Fáfnisson, saman eiga þau 2 dætur Alexöndru Ester og Elísabetu Ýr. Steinn Alex f.1986, unnusta Cezara Kiss, Ragnheiður f.1992, eiginmaður Pedro Monsonis Aloy, saman eiga þau 2 syni, Pedro Rúnar og Manuel Óðinn, Bryndís f.1994 og unnusti Harvey Leponis Dean. Unnusti Elínar er David J. Dunbar.

Dóttir Tinnu er Þorgerður Vala f.2006. Unnusti Tinnu er Matthew Anthony Parsons.

Dætur Völu og Þorsteins Más Þorsteinssonar eiginmanns hennar eru Álfhildur Edda f.2008 og Eygló f.2012.

Lína ólst upp við Lækinn í Hafnarfirði og gekk í Lækjarskóla og Flensborg. Hún var félagslynd og vinamörg og stundaði m.a. ballett og fleiri íþróttir á yngri árum.

Hún og Steinn fundu hvort annað á Þjóðhátíð í Vestmannaeyjum 1969 og varð ekki aftur snúið. Þau giftu sig ári seinna, bjuggu fyrst á Sléttahrauni, síðan Miðvangi og Hjallabraut en lengst af á Sævangi í Hafnarfirði. Síðustu 12 árin áttu þau saman á Skipalóni.

Lína vann gegnum tíðina m.a. hjá Rafha, Félagsstofnun Stúdenta og Flutningsmiðluninni við ýmis skrifstofustörf. Síðustu 35 árin var hún heimavinnandi húsmóðir og sá alltaf vel um sig og sína. Alltaf glæsileg og vel til höfð og heimilið umvafið ástúð og elegans.

Helstu áhugamál hennar tengdust ástkærri fjölskyldu og góðum vinum. Hún hafði mikinn áhuga á fallegri tónlist, dansi, góðum mat og vínum. Hún var þekkt fyrir að vera smekkkona, elskaði falleg föt, að bera flottar töskur og vera í skóm í stíl, og hló mikið að því.

Henni fannst fátt skemmtilegra en að heimsækja börn og barnabörn sem bjuggu, og búa enn erlendis og njóta góðra stunda með þeim.

Lína elskaði samveru og ferðalög með fjölskyldunni, sem og vinahópum eins og Frænku- og frænkumannaklúbbnum, körfuboltafélögum Steins og mökum, Orginölunum svokölluðu, vinnufélögum Steins hjá Jónum, Brynjugenginu, árgangsfélögum úr Hafnarfirði og fleirum. Þau Steinn ferðuðust saman til yfir 20 landa, í 5 heimsálfum, ýmist tvö ein eða með fjölskyldu og vinum, og áttu ótal yndislegar og ógleymanlegar stundir í þeim ferðum.

Fjölskyldan þakkar auðsýndan hlýhug og vináttu. Einnig vill hún skila þakklæti til starfsfólks dagvistunar Sólvangs og starfsfólks Ölduhrauns á Hrafnistu fyrir hlýtt viðmót, umhyggju og góða umönnun á erfiðum tímum. 

Að lokum sérstakar þakkir til Alzheimersamtakanna og bendum við þeim sem vilja minnast Ólínu á styrktarsjóð Alzheimersamtakanna.

[DEFAULT]

Það streyma yfir mig minningarnar þessa dagana. Minningar frá því á meðan veikindum þínum stóð sem hafa vissulega verið yfirþyrmandi síðustu ár, en þær minningar eru núna að dvína þar sem þú elsku mamma mín, ert farin og frjáls frá þessum sjúkdómi, og nú fá að flæða yfir okkur aftur allar yndislegu minningarnar sem við áttum með þér. 

Ég var örugglega 5 ára þegar ég byrjaði að dressa mig upp í fínasta kjólinn minn til að plata ykkur pabba til að fara út að borða, því ég, eins og þú, elskaði og elska enn að fara á góða veitingastaði að borða góðan mat. 

Þú sagðir alltaf söguna af því þegar ég fór með Möllu vinkonu á þríhjólinu út í fjöru og við fylltum bakkann á hjólinu af svörtum sniglum og færðum þér svo, rétt þegar þú varst á leiðinni út að borða. Það voru víst ekki alveg réttu sniglarnir, en þitt uppáhalds á þeim tíma voru Escargots og þú misstir víst matarlystina við þessa sjón og gast ekki borðað snigla í soldinn tíma. En þér fannst þetta samt mjög fyndið… allavega seinna meir.

Allar frábæru samverustundirnar okkar Þorsteins með þér og fjölskyldunni á Sævangnum, í sumarbústaðnum, í Henley, London, Brighton, Amsterdam, Hilversum og mörgum fleiri stöðum. Þú komst líka alltaf til okkar þegar mikilvægir hlutir voru að gerast í lífi okkar þegar við bjuggum úti og studdir við okkur alla leið, og stundum komstu bara því að. Alltaf grétum við þegar við kvöddumst á flugvellinum þegar þú varst á leið heim frá okkur.

Það sem þú dekraðir við börnin mín og elskaðir að hafa þær hjá þér, það sem þú hlóst með þeim, fórst með þeim í sunnudagaskólann, lékst og söngst með þeim og flakkaðir með þær fram og til baka, þetta allt munu þær geyma í hjarta sínu alla ævi. Ég er svo þakklát fyrir að þær eiga svo margar minningar frá því áður en þú veiktist. En veikindi þín hafa líka kennt þeim og okkur öllum mikið, um þolinmæði, sorg, auðmýkt og samkennd. Stelpurnar mínar hafa einstakt lag á að bregðast við allskonar aðstæðum og halda ró sinni, og horfðu alltaf þolinmóðar og fallega í augun á ömmu sinni og brostu til hennar, þegar hún gat horft og dáðst endalaust að þeim. 

Takk fyrir traustið, takk fyrir frelsið, takk fyrir gleðina, takk fyrir gagnrýnina, takk fyrir öll ferðalögin okkar, leikhúsferðirnar, spjallið og hláturinn. Takk fyrir að taka Þorsteini mínum sem týnda syninum og takk fyrir allar minningarnar.

Mig langar að þakka þér fyrir yndisleg kynni og minnast þín með nokkrum orðum. 
Ég kom fyrst inn á heimili þitt fyrir um þrjátíu árum síðan, þá bjuggu þið á Sævanginum og eru ófáar minningarnar þaðan. 
Á tímabili voru minningarnar þaðan þó án þín, þegar Vala þín/mín bauð okkur stelpunum í smá partý eða við fengum að gista, og þá stundum yfir heila helgi, þegar þið Steinn fóruð erlendis. 
Það situr mér fast í minni, þegar við höfðum gist og haft gaman í heila helgi, fórum við að þrífa eftir okkur og ganga frá. Ég var nánast með tannbursta að þrífa eins vel og ég gat!
Þá sagði Vala: „Þú þarft ekkert að gera þetta svona vel, mamma á pottþétt eftir að þrífa aftur eftir okkur hvort sem er, henni mun ekki finnast þetta nógu vel gert.“ Ég hélt nú ekki! Ég fór í enn meira stuð og þetta varð bara meiri áskorun. En allt kom fyrir ekki, turtildúfurnar mættu heim, þú og elsku Steinn þinn. Ég var enn á staðnum, og ég spurði eitthvað á þessa leið: „Finnst þér ekki allt fullkomlega fínt“? Og þú svaraðir: „Jú rosa fínt, takk elskan, en ég klára þetta svo bara sjálf“. Ég hélt ég yrði ekki eldri hahahaha...

Elsku Lína, þegar ég var ein með Ciöru mína (hún þá tæplega 2ja ára) og þráði ekkert heitar en að hún fengi góðan pabba og ég góðan mann. Þá stappaðir þú í mig stálinu og sagðir mér svo fallegar sögur af því þegar Ellý þín og Steinn hittust fyrst og hversu fallegt samband þeirra væri, varð og er. Þú varst einstaklega dugleg að gefa af þér og veita manni von, innblástur og trú á að allt yrði í lagi.

Takk fyrir öll samtölin, „naslið“, hughreystingarnar og umhyggjuna. Takk fyrir Völu þína, Tinnu og Ellý, þvílíkir gullmolar sem þú hefur gefið af þér, sem og dásamlegu barnabörnin og barnabarnabörnin, sem væru ekki hér án þinnar tilvistar.
Það hefur verið einstaklega fallegt að fylgjast með ykkur Steini í gegnum tíðina, svo samstillt, dugleg, góð og falleg hjón. Alltaf gaman að hitta ykkur, spjalla við ykkur, hlýjan og umhyggjan allsráðandi. 

Miðjublómið mitt hún Áróra fékk þann heiður að fá að vera þér til staðar þína síðustu mánuði. Það gaf henni svo mikið og erum við mæðgur mjög þakklátar fyrir þann tíma sem þið áttuð saman, þó svo að hún hafi ekki kynnst sömu Línu og ég, þá kynntist hún yndislegri og ljúfri konu sem hún mun aldrei gleyma og er afar þakklát fyrir þau kynni.

Takk fyrir þig elsku Lína. Megi allt gott vernda og styrkja elsku Stein þinn, Völu, Tinnu, Ellý og fjölskylduna alla uns þeirra tími kemur og þið sameinist öll á ný og njótið samverunnar í sumarlandinu bjarta.

Kærleiksknús,
Halla Eyberg Þorgeirsdóttir

Minningarsíður

Nýleg andlát

Útfarir

Hlaðvarp

Þjónustusíða

Fræðsluefni

Ólína Margrét Jónsdóttir

Andlátstilkynning

Útför

Aðstandendur

Þakkir

Elsku mamma mín

Elsku Lína