Í dag er til grafar borinn frá Saurbæjarkirkju á Rauðasandi,  Ólafur Jónsson frá Hvalskeri,er lézt bann 19. Þ. m. 93 ára að aldri. 

Ólafur Jónsson fæddist í Króki á Rauðasandi 26. des.1853. 

Hann var sonur hjónanna Jóns Ólafssonar bónda á Sjöundá, Sigmundssonar bónda í Króki, Jónssonar og Guðbjargar Magnúsdóttur, Einarssonar, bónda á Hvalskeri og víðar. Voru ættir beggja þeirra hjóna breiðfirzkar.

Ólafur var með foreldrum sínum þar til hann kvæntist 10. okt. 1879. Kona hans var Guðbjörg Árnadóttir Thoroddsen bónda á Hvallátrum vestra.

Þau Ólafur og Guðbjörg eignuðust 9 börn. Dóu 5 þeirra ung. Hin 4 náðu fullorðinsaldri og eru 3 þeirra á lífi: Sigurjón Árni alþingismaður, kvæntur Guðlaugu Gísladóttur, Ólafía, gift Stefáni hreppstjóra Baldvinssyni í Stakkahlíð i Loðmundarfirði, og Sigríður Snæbjörg, gift Stefáni trésmíðameistara Magnússyni í Reykjavík. Fjórða barnið, er fullorðinsaldri náði, var Stefán bóndi á Hvalskeri við Patreksfjörð, kvæntur Valborgu Pétursdóttur fræðimanns frá Stökkum. Stefán lézt 3. mai 1942, fimmtugur að aldri. Ólafur dvaldist lengi hjá Stefáni og Valborgu, meðanþeir feðgar lifðu báðir og síðan hjá Valborgu tengdadóttur sinni til dauðadags.

Fyrstu hjúskaparárin eru þau hjónin, Ólafur og Guðbjörg, á Sjöundá og Hvallátrum, en vorið 1835 byrja þau sjálfstæðan búskap í Króki. 

Sjö árum seinna, 31. júlí 1892 missir Ólafur konu sina, 34 ára gamla, ásamt yngsta barni þeirra, en 4 lifðu þá hin börnin, öll ung.

Ólafur býr enn 2 ár með ráðskonu, en hættir búskap 1894.

Eftir þetta gegnir Ólafur margs konar störfum, bæði fyrir sveitarfélag sitt og einstaklinga.

Hann er ráðsmaður, formaður á fiskibátum, hann stundar verzlunarstörf, er forðagæzlumaður,hreppsnefndarmaður og þá oddviti um nokkurt skeið, barnakennari er hann léngi og 1930 er hann skipaður í fasteignamatsnefnd Vestur- Barðastrandarsýslu, þá 76 ára gamall.

Ólafur Jónsson var hár maður vexti, mikill á velli og dökkur á brún og brá.

 Hann var bókhneigður og átti nokkurt bókasafn. Mun hann hafa búið yfir ríkari menntaþrá, en nokkur skilyrði voru til að fullnægja. Hann var heilsuhraustur til elliára, en siðustu árin blindur og farlama. 

Naut hann þá einstakrar umhyggju Valborgar tengdadóttur sinnar á Skeri. Afkomendur Ólafs eru 45 á lífi og enn lifir systir hans, Guðrún Jónsdóttir á Patreksfirði, 92 ára gömul.

Ævi Ólafs Jónssonar skiptist í tvo kafla, mjög ólíka. 

Hann elzt upp með foreldrunum og er með þeim til 26 ára aldurs. Þá kvongast hann og á ágæta sambúð með ungu konunni í 13 ár. Þau eignast mörg börn, en missa sum. En svo gerast þáttaskilin í lífi hans. Unga konan deyr og yngsta barnið. Ekkjumaðurinn, 39 ára, stendur eftir með 4 börnin ung. Þessi hörðu átök móta manninn að nýju. 

Hann sér fyrir börnum sínum í höndum hinna ágætustu manna. En grundvöllur heimilis og búskapar er hruninn til grunna. Hann snýr hönd og huga að nýjum viðfangsefnum. Hann leitast við að fullnægja þörfum annara, sveitarfélagsins og samferðarmannanna.

- Áhugamál hans verða sveitarmálin, landsmálin, almennar umbætur og menntun æskunnar. Sveitungar hans sýna honum verðskuldaða tiltrú með því að fela honum margs konar trúnaðarstörf. Enn öll þau störf rækir Ólafur af

þeirri samvizkusemi og trúmennsku, er einkenndi hann framar öðru. Honum var þó lítt að skapi að hagræða skoðunum sínum að vilja annarra. Þar stóð hann fastur fyrir, sterkur og stór. Frá fertugsaldri starfar hann í þágu sveitar sinnar fremur en sjálfs sín. Hann horfir ofar einkahagsmunum til þess, er til almennings gagns má verða. Hann er þéttur á velli og þéttur í lund, bognar aldrei og brotnar seint. 

Börn hans verða hin mannvænlegustu og fyrir löngu er sonur hans þjóðkunnur, Sigurjón Á. Ólafsson alþingismaður, sem gert hefir að ævistarfi sínu hagsmuna- og menningarmál þess fólks i landinu, sem skyldast er ekkjumanninum í Króki með 4 börnin ung.

Frændur og vinir kveðja Ólaf Jónsson með virðingu og þökk.

Þeir votta samúð sína börnum hans og afkomendum og síðast en ekki sízt fjölskyldunni á Hvalskeri, sem gerði honum elliárin svo mild og hlý. S. E.

Birtist í :Tíminn fimmtudaginn 2 7 . f e b r . 1947

Sett inn af: Ólafía Herborg Jóhannsdóttir.

Minningarsíður

Nýleg andlát

Útfarir

Hlaðvarp

Þjónustusíða

Fræðsluefni

Ólafur Jónsson

Útför

Ertu með minningargrein?