Elskulegur faðir & afi, Ólafur Garðarsson, tónlistarmaður og húsgagnasmiður, lést á Heilbrigðisstofnun Vesturlands 13.apríl 2025. Útför hans fór fram í kyrrþey í Hvanneyrarkirkju.

Ólafur Garðarsson, eða Óli Garðars eins og hann var oftast kallaður fæddist á Ísafirði þann 12. júlí árið 1950. Foreldrar hans voru Jóhanna Torfhildur Ólafsdóttir og Jón Gauti Jónatansson, kjörfaðir var Garðar Þorsteinsson. 

Bræður hans sammæðra eru Þórir Garðarsson og Þorsteinn Garðarsson. Systkini hans samfeðra eru fimm. Eftirlifandi er Guðrún Kristín Jónsdóttir, en látin eru Jón Gauti Jónsson, Þórdís Helga Jónsdóttir Osterhorn, Sigríður Kristjana Jónsdóttir og Svanhildur Erna Jónsdóttir. Blessuð sé minning þeirra. 

Óli bjó á Ísafirði til tveggja ára aldurs en flutti þá með móður sinni til Reykjavíkur og eftir nokkra flutninga endaði loks á Laugarásveg 53 1960. Í íbúð sem hann átti eftir að kalla heimili sitt með hléum allt fram til ársins 2017 þegar móðir hans dó. 

Óli kláraði Grunnskólagönguna frá Langholtsskóla, en það var þar sem hann gekk í hljómsveitina Tempó sem átti aldeilis eftir að gera garðinn frægann. Hljómsveitin var stofnuð af nemendum Langholtsskóla og voru meðlimir allir ungir að árum, enda spiluðu þeir mestmegnis á skemmtunum innan skólans til að byrja með. Það var svo árið 1964 sem hjólin fóru að snúast fyrir alvöru þegar sveitin fór að koma fram víðsvegar um borgina. Stóra tækifærið kom svo þegar sveitin var fengin til að hita upp fyrir bresku bítlasveitin Swinging Blue Jeans sem kom til landsins í febrúar 1964. Aftur hituðu þeir félagar upp fyrir breska bítlasveit um sumarið 1965 þegar Kinks komu til landsins.

Um haustið árið 1965 lá leið Óla á slóðir frumbernskunnar vestur á firði, þegar hann fór í Héraðsskólann að Núpi í Dýrafirði. Þó hann væri orðinn þekktur tónlistarmaður þá, búinn að hita upp fyrir breskar stórhljómsveitir og spila víðsvegar um borgina, þá var hann mjög hógvær, eins og góður vinur hans og skólabróðir sagði: ,,Óli var alltaf mjög látlaus og flíkaði þessum tónlistarhæfileikum aldrei á neinn veg. Hann sýndi okkur samnemendum sínum tökin þegar kom að árshátíð skólans. Og þegar hljómsveitin Noise Makers frá Ísafirði komu á skólaskemmtun fengu þeir Óla til að setjast við settið í nokkrum lögum og það gerði hann með ógleymanlegum snilldarbrag.” 

Hvílík upplifun fyrir skólafélaga hans á Núpi!

Óli starfaði sem trommuleikari frá táningsaldri. Sveitir sem hann trommaði meðal annars með voru Ernir, Tónar, Tempó, Pónik, Sálin, Óðmenn, Trúbrot og Náttúra. Trommuferill Óla átti eftir að endast ævina út - með hléum þó - en nú síðast spilaði hann með hljómsveitinni Forsælu hér í Borgarfirði. 

Nafnið Forsæla - tilbrygði við Skugga - sem er íslenska orðið yfir Shadows. Að tillögu Óla. Það er óhætt að segja að hljómsveitin hafi verið vinsæl hér um slóðir. Öruggar heimildir herma að það var alltaf húsfyllir þegar þau komu fram á sviði. Síðustu tónleikar sveitarinnar voru í júní árið 2023. 

Minningarsíður

Nýleg andlát

Útfarir

Hlaðvarp

Þjónustusíða

Fræðsluefni

Ólafur Garðarsson

Andlátstilkynning

Útför

Aðstandendur

Ertu með minningargrein?