Ögmundur Jónsson, Ásnesi, Ölfusi, lést á Landspítalanum sunnudaginn 28. ágúst. Útför frá Hveragerðiskirkju miðvikudaginn 7. sept. kl. 14. Streymi frá útför: streymi.syrland.is

Ögmundur Jónsson húsasmíðameistari fæddist í Hveragerði 5. október 1979. Hann lést á krabbameinsdeild Landspítalans 28. ágúst 2022.

Foreldrar hans eru Jón Ögmundsson frá Vorsabæ í Hveragerði, bóndi að Hjallakróki í Ölfusi, f. 12. september 1956, og Guðrún Sigurðardóttir frá Hveragerði, f. 14. desember 1961, d. 29. júní 2006.

Bróðir Ögmundar er Þorbjörn vélaviðgerðamaður, f. 10.3.1984, kvæntur Vigdísi Önnu Kolbeinsdóttur leikskólakennara, f. 14. október 1981. Börn þeirra Daníel Örn, f. 10.2.2002, Elínborg Katla, f. 25.3.2004 og Helga Guðrún, f. 14.3.2012. 

Ögmundar kynntist 1999 Idu Løn framhaldsskólakennara frá Asnes í Danmörku, f. 24. desember 1979, dóttur Eriks Løn dýralæknis, f. 1952, og Anne Marie Løn rithöfundar, 1947.

Ögmundur og Ida bjuggu saman til 2020. Börn þeirra eru Jónatan Leví, f. 6. júlí 2011, og Embla, f. 23. apríl 2017.

Ögmundur ólst upp í Hveragerði til fermingaraldurs en flutti með foreldrum sínum 1994 að Hjallakróki. Hann og Ida keyptu land í Ölfusi, sem þau nefndu Ásnes. Byggðu þar íbúðarhús ásamt útihúsum og fluttu þangað 2007.

Ögmundur gekk í Fjölbrautaskóla Suðurlands, lærði húsasmíði og útskrifaðist sem húsasmíðameistari 2005. Vann mest við sína iðn.

Frá 2015 rak hann ásamt öðrum fuglabú samhliða sínu starfi.

[DEFAULT]

Við spyrjum drottin særð, hvers vegna hann

Okkur fer jafnan svo að við stöndum ráðvillt þegar gangverk tilverunnar bregður út af réttum takti, svo sem þegar ástvinir okkar eru hrifnir brott í blóma lífsins. Við leitumst gjarnan við að sættast við slíka framvindu með því að reyna að finna einhvern tilgang í henni og þá stundum haft á orði að þeir sem guðirnir elska deyi ungir. Einhver huggun kann að felast í þeirri hugmynd, sbr. orð Tómasar: „Og skín ei ljúfast þeirri ævi yfir / er ung á morgni lífsins staðar nemur...?“

Ögmund Jónsson, sem við kveðjum í dag rétt liðlega fertugan að aldri, er auðvelt að sjá í þessu ljósi. Allt frá bernsku umlék hann sérstök ára glaðværðar og hlýju, sem aflaði honum velvildar og vinafylgis hvar sem hann fór. Hann fylgdi snemma Jóni föður sínum mikið við hans daglegu og margvíslegu störf og lærði þá til flestra verka er lutu að landbúnaði, ræktun og umhirðu véla. Hann var afa sínum og nafna í Vorsabæ mikill gleðigjafi síðustu búskaparár hans og er ekki að efa að rætur hans má að nokkru rekja til veru hans þar sem barn. Ögmundur var á fimmtánda ári þegar foreldrar hans hófu búskap að Hjallakróki. Allt það mikla uppbyggingarstarf sem þar fór í hönd var mjög mótandi fyrir hann og Þorbjörn bróður hans, ásamt því sem aðstæður heima fyrir hvöttu mjög til sjálfsbjargarviðleitni. Ögmundur var með öllu ólatur og hjálpsemi var honum í blóð borin. Hann varð fljótt eftirsóttur til verka og handlagni hans og úrræðum við brugðið.

Hugurinn stóð fljótt til smíða og hóf hann iðnnám við FSU og fór brátt á samning hjá hinu ágæta byggingarfyrirtæki Stoðverki. Þar lauk hann húsasmíðanámi sínu og öðlaðist meistararéttind 2005. Eftir það stundaði hann iðn sína að mestu sjálfstætt, enda skorti hann aldrei verkefnin.

Ögmundur kynntist Idu Løn, yndislegri danskri stúlku sem var hér við störf, og felldu þau hugi saman og hófu sambúð 1999. Með Idu bættist ný vídd í tilveru hans. Sjóndeildarhringurinn stækkaði og ekki fór milli mála að dönsku fjölskyldunni urðu mannkostir Ögmundar fljótt ljósir. Þau Ida keyptu land í Ölfusi og reistu þar nýbýli sem þau nefndu Ásnes. Þau reistu íbúðarhús ásamt útihúsum af miklum myndarskap og fluttu þangað 2007. Fyrst um sinn var um hrossabúskap að ræða en fljótlega hóf Ögmundur rekstur kjúklingabús í félagi við Kristján nágranna sinn og góðvin á Rauðalæk. Öll þessi störf voru innt af hendi meðfram fullri vinnu við smíðar lengst af.

Sambúðin við Idu stóð í tvo áratugi og eignuðust þau saman börnin tvö, Jónatan Leví og Emblu. Þótt sambúðinni lyki fyrir tveimur árum var það á eins friðsamlegum nótum og hugsast gat og hagsmunir barnanna voru sannarlega hafðir að leiðarljósi. 

Nú hefur krabbameinið lagt þennan góða dreng að velli. Æðruleysi hans í veikindunum var með ólíkindum. Brosið hans hlýja mun ylja okkur öllum sem nutum þeirrar gæfu að þekkja hann og umgangast. Við vottum aðstandendum hans samúð okkar af öllu hjarta.

Minningarsíður

Nýleg andlát

Útfarir

Hlaðvarp

Þjónustusíða

Fræðsluefni

Ögmundur Jónsson

Andlátstilkynning

Útför

Aðstandendur

Ögmundur Jónsson, Ásnesi, Ölfusi