[DEFAULT]

Mágur minn, Oddur Þór Sveinsson, er fallinn frá langt fyrir aldur fram. Oddur var fæddur í Hafnarfirði 14. júní árið 1961 og ólst upp á Holtinu til 10 ára aldurs, nánar tiltekið á Þúfubarði 1, en þá flutti fjölskyldan til Neskaupstaðar, þar sem Sveinn Halldór Sveinsson pabbi hans var ráðinn sem yfirverkstjóri hjá Bátastöð SVN , en það var gamli Slippurinn á Eyrinni, sem nú er horfinn. Fjölskyldan ætlaði aðeins að vera eitt ár í Neskaupstað og flytja síðan aftur í Hafnarfjörðinn, en þau áform breyttust og í Neskaupstað byggðu þau sér hús að Nesgötu 27 og það varð síðan þeirra framtíðar heimili. 

Foreldrar Odds, Sveinn Halldór Sveinsson skipasmiður, fæddur 8.júlí 1932, dáinn 16. maí 2000 og Guðrún Árnadóttir húsmóðir og matráðskona, fædd 24. maí 1937, eignuðust fjögur börn, Sigurlaugu, Árna, Odd Þór og Ásrúnu Björgu, en fyrir átti Sveinn Halldór tvö börn, Svein Bjarna og Laufeyju Þóru, en þau ólust upp hjá móður sinni á Eskifirði.

Eftir því sem mér hefur verið sagt, var oft mikið líf og fjör á Þúfubarðinu þegar Oddur Þór og systkini hans voru að alast þar upp, mikið af krökkum og nóg við að vera og síðan sjórinn ekki langt undan og sóttu bræðurnir Árni og Oddur mikið þangað, enda var Sveinn pabbi þeirra með bátasmíðastöð sem hét Báran, niðri á Eyrinni í Hafnarfirði, og þar var auðvelt að ná sér í eitthvað sem hægt var að láta fljóta og síðan var bara ýtt frá landi.

Eftir að fjölskyldan flutti til Neskaupstaðar héldu bræðurnir áfram sjómennskunni og kornungir voru þeir farnir að róa til fiskjar, fyrst á árabátum, en síðan á trillum, fyrst með öðrum og síðan einir. Árni eignaðist bát, sem hann skírði Dóru, og stundaði sjóinn af kappi. En aðeins 19 ára gamall veiktist hann skyndilega af bráðahvítblæði og lést eftir stutt veikindi. Fráfall Árna varð þungt högg fyrir fjölskylduna og vinina og þarna missti Oddur eldri bróður sinn og fyrirmyndina, en Árni hafði alltaf verið foringinn og Oddur litið upp til eldri bróður síns og fylgt honum. En Oddur hélt áfram á sömu braut og Árni bróðir hans hafði gert og ekki leið á löngu þar til hann var kominn með bát og byrjaður að gera hann út og hét sá bátur Gylfi, en þennan bát hafði Oddur keypt af frænda sínum Gunnari Jósepssyni.   Oddur var hörku sjómaður og stundaði sjóinn vel og var fiskinn. Pabbi hans stóð þétt við bakið á honum við útgerðina á Gylfanum og í sameiningu gerðu þeir bátinn upp, enda hafði Sveinn pabbi Odds smíðað þennan bát í upphafi í húsgrunninum á Þúfubarði 1 í Hafnarfirði og þekkti því vel til bátsins.

Oddur var alla tíð glaðlyndur og skemmtilegur, hann gat alltaf svarað fyrir sig og var hnyttinn í tilsvörum og lét engan eiga inni hjá sér. Hann var vinamargur og vinur vina sinna og alltaf tilbúinn að rétta öðrum hjálparhönd. Oddur var líka einstaklega barngóður og þess nutu börnin okkar Laugu systur hans og einnig önnur systkinabörn hans alla tíð og síðan börnin hans og barnabörnin, sem hann var afar stoltur af og talaði mikið um. Ég held að Oddur hafi bara átt einn óvin í lífinu, en það var Bakkus konungur. En sem betur fer komst hann oft og lengi undan valdi hans, þó oft hafi munað litlu að illa færi í samskiptum þeirra, en þessi kynni þeirra urðu Oddi samt dýrkeypt.

Oddur giftist Kristínu Nielsen og hófu þau búskap í Neskaupstað. Þau eignuðustu þrjú börn, Súsönnu, Árna og Oddnýju Halldóru, en fyrir átti Oddur soninn Svein Halldór, en hann ólst upp hjá móður sinni á Vopnafirði. Frá Neskaupstað fluttust Oddur og Kristín með börn sín til Raufarhafnar og bjuggu þar í nokkur ár og var Oddur þar á togara. Þaðan fluttust þau til Reykjavíkur og þar fór Oddur í Stýrimannaskólann og útskrifaðist þaðan. Eftir Stýrimannaskólann fór Oddur aftur á sjóinn og stundaði alls konar sjómennsku. Síðan hóf hann aftur nám við Stýrimannaskólann og tók þá Farmanninn og eftir að hafa lokið því námi var hann um tíma stýrimaður á fraktskipum sem sigldu á milli Íslands og Ameríku, var á togurum og togskipum, sigldi sem skipstjóri með ferðafólk frá Djúpavogi á Papeyjar ferjunni og á hvalaskoðunarskipum í Reykjavík, svo eitthvað sé nefnt. Oddur og Kristín slitu samvistum og eftir það bjó Oddur nokkur ár í Neskaupstað, var þar á togara þangað til hann slasaðist úti á sjó og þurfti að fara í land. Það varð honum mikið áfall að geta ekki lengur stundað sjóinn eins og hann hafði í rauninni alltaf gert og þurfti nú að breyta öllu sínu lífi. Hann flutti þá í Garðinn, keypti sér þar hús og bjó þar í nokkur ár, en flutti síðan til Reykjavíkur þar sem hann bjó eftir það í Ásholti 2. Já sjómennskan varð hans ævistarf og mér er sagt af þeim sem sigldu með honum að hann hafi verðið góður og traustur sjómaður. En Oddur hafði áhuga á fleiru en sjómennskunni, hann var einstaklega laghentur, var fljótur að redda málum, hvort sem var við smíðar eða bílaviðgerðir og ég get staðfest að Oddur var alla tíð með mikla bíladellu. Hann lagði metnað sinn í að vera á flottum bílum svo eftir var tekið og hann var líka lunkinn við að kaupa, selja og gera upp bíla og var fljótur að sjá út hvort hægt var að gera peninga úr því sem var í boði. Einu sinni heimsótti ég Odd þegar hann bjó í Garðinum og þegar ég kom upp að húsinu hans var þar fullt af bílum og ætlaði ég að snúa frá, því ég hélt ég að þarna stæði yfir fjölmenn veisla. En þá birtist Oddur í bílskúrsdyrunum, sagðist vera einn heima og bauð mér inn. Þegar ég spurði hann hver ætti alla þessa bíla sagði hann ,,Ég á þá alla og líka þessa tvo sem standa þarna ofar í götunni.“ Seinna fékk hann áhuga á mótorhjólum og þá kom ekkert annað til greina en að kaupa Harley-Davidson og það var ekki geymt í bílskúrnum eins og venjan er, nei, það fékk að vera í stofunni í húsinu hans í Garðinum, stífbónað og glansandi, þannig að hægt var að spegla sig í króminu. Já, Oddur mágur minn var mikill snyrtipinni í öllu sem hann tók sér fyrir hendur, flottur í tauinu og lagði metnað sinn í að kaupa flotta og vandaða hluti, þótt hann hafi kannski ekki alltaf haft efni á því, en þá sagði hann ,,Það er seinni tíma vandamál að borga, þetta reddast allt“ og yfirleitt fór það svo! En það voru ekki bara bílar sem hann keypti og seldi, því um tíma vann Oddur sem sölumaður á fasteignasölu í Reykjavík og ég er viss um að þar komu söluhæfileikar hans við að kaupa og selja bíla honum að góðum notum. 

Í byrjun janúar 2022 fréttum við Lauga systir hans af því að Oddur væri að leggja upp í ferð til Danmerkur til að sækja skip sem hann ætlaði síðan að sigla á sem skipstjóri með félögum sínum frá Grenaa í Danmörku heim til Íslands. En þetta varð hans síðasta ferð, því snemma morguns 12. janúar vorum við Lauga systir hans vakin upp og okkur færðar þær hörmulegu fréttir að Oddur væri dáinn, hefði orðið bráðkvaddur þá um nóttina í Grenaa, en þann sama dag ætluðu hann og skipsfélagar hans að leggja af stað með skipið heim til Íslands.

Ég minnist Odds mágs mín með hlýhug og virðingu og þakka honum allar þær ánægjulegu stundir sem við áttum saman og fyrir að vera hjálpsamur og traustur og góður frændi barna minna og Laugu systur hans.

Börnum hans, barnabörnum, tengdabörnum, Guðrúnu móður hans, Deliu sambýliskonu hans, systkinum hans og fjölskyldum þeirra sendi ég mínar innilegustu samúðarkveðjur.

Útför Odds Þórs Sveinssonar var gerð frá Norðfjarðarkirkju mánudaginn 7. mars sl. að viðstöddum nánustu ættingjum hans og vinum.

Blessuð sé minning Odds Þórs Sveinssonar.

Minningarsíður

Nýleg andlát

Útfarir

Hlaðvarp

Þjónustusíða

Fræðsluefni

Oddur Þór Sveinsson

Útför

Minningargrein um Odd Þór Sveinsson