Matthías stundaði almenna verkamannavinnu til sjávar og
sveita framan af ævinni og var m.a. á togurum. Lagði stund á tónlist í
frístundum og lærði á orgel og tónfræði hjá einkakennurum. Matthías samdi
nokkur lög og útsetti, hann stjórnaði Lögreglukórnum um tíma og raddæfði í mörg
ár.

Matthías hóf störf í lögreglunni í Reykjavík þann 1. janúar 1930 og starfaði
þar samfellt í 44 ár eða til 1. janúar 1974 er hann lét af störfum fyrir aldurs
sakir. Var sendur árið 1936 á vegum embættisins í lögregluskóla í Noregi og var
þar með einn af fyrstu lögregluþjónunum sem lærðu fagið erlendis. Árið 1940 var
Matthías skipaður varðstjóri á einni af þremur aðalvöktum lögreglunnar og
gegndi hann því starfi til 1. desember, 1961, en þá var hann skipaður
aðalvarðstjóri við lögreglustöðina við Síðumúla sem þá tók til starfa.

Öll sín störf vann hann af samviskusemi og nákvæmni og rækti starf sitt af
slíkri trúmennsku að betur var ekki gert. Hann var prúðmenni hið mesta,
grandvar í orðum og lagði ætíð gott til hvers máls. Hann var mjög farsæll í
sínu starfi og var virtur af samstarfsmönnum og samborgurum.sínum.

Matthías var lagtækur teiknari og gerði nokkrar vatnslitamyndir.

Matthíasar er getið í bókinni Gúttóslagurinn 9. nóvember eftir Ólaf Einarsson
og Einar Karl Haraldsson en villa er í bókinni þar sem inngangur sem er
grundvallaður á skýrslu Matthíasar. Er hún kennd við nafna hans Guðmundsson sem
er ekki rétt. (M.G. rotaðist í upphafi óeirðanna ).

Matthías hlaut heiðurspeninga frá öllum höfðingjum norðurlandanna að meðtöldum
forseta Íslands.

Matthías tók mikinn þátt i félagsmálum lögreglunnar og var einn af stofnendum
Lögreglufélags Reykjavíkur og fyrsti ritari þess. Ennfremur var hann einn af
stofnendum lögreglukórsins og í fyrstu stjórn hans og virkur félagi til hinstu
stundar.

Matthías var mikill tónlistarunnandi og söngmaður góður og var alla tíð ein
styrkasta stoð Lögreglukórsins bæði sem söngmaður, raddþjálfari og stjórnandi.
Hann lék vel á orgel og samdi mörg lög og var tónlistin honum einkar kær sem
veitti honum margar unaðsstundir. Á sjötugsafmæli Matthíasar var hann kjörinn
heiðursfélagi Lögreglukórsins, Hann tók þátt í söngferðum Lögreglukórsins á
lögreglukóramótum i höfuðborgum Norðurlanda allt frá fyrsta mótinu sem haldið
var í Stokkhólmi 1950 og að síðustu til Kaupmannahafnar 1974.

‏Hann hafði til að bera skapfestu og lét gjarnan ekki sinn hlut ef honum fannst
réttu máli hallað. Formfastur og nákvæmur stjórnandi var hann og stundum svo að
sumum fannst nóg um. En hann lét það ekki á sig fá, því Matthíasi var umhugað
um að skila starfa sínum með trúmennsku.

Í hugum okkar verður hann ávallt hinn heiðarlegi og grandvari maður.



Minningarsíður

Nýleg andlát

Útfarir

Hlaðvarp

Þjónustusíða

Fræðsluefni

Matthías Sveinbjörnsson

Útför

Ertu með minningargrein?