Í dag er mín elskulega og kæra vinkona María Hreiðarsdóttir borin til grafar eftir stutt veikindi.

Lífið er sannarlega hverfult og kveðjustund sár. Skilningur okkar á tilverunni er takmörkum háður en ég trúi að María mín fái góðar móttökur.

Árið 2012 kynnist ég Maríu þegar ég réð mig sem aðstoðarkonu til hennar í NPA þjónustu. Með okkur Maríu tókst strax góð vinátta sem óx og dafnaði með árunum. Í starfi mínu hjá Maríu varð ég þess fljótt áskynja að á ferð var mikil baráttukona fyrir málefnum og réttindum fatlaðs fólks, mikil fyrirmynd sem lagði sitt af mörkum í allri þeirri réttindabaráttu.

Ekkert í heiminum skipti hana samt meira máli en velferð Ottó Bjarka, augasteinsins hennar og einkasonar. Hann hvatti hún með ráðum og dáðum í hvívetna, til náms, sjálfstæðis og heiðarleika. Samband þeirra var fallegt og kærleiksríkt með dass af húmor og glettni. Stolt hennar og gleði yfir dugnaði og elju Ottó Bjarka í öllu sem hann tók sér fyrir hendur leyndi sér ekki enda á ferð duglegur og natinn ungur maður sem á framtíðina fyrir sér. María mín er án efa stoltust mæðra yfir nýútskrifuðum stúdentinum Ottó Bjarka, sem lauk sínum prófum eftir fráfall móður sinnar, einbeittur í sorginni að halda áfram, viss um að ekkert hefði glatt móður hans meira. Styrkur hans er mikill og segir meira um hann sem manneskju en margt annað.

María elskaði ferðalög, sumarbústaðaferðir, kaffihús og stuttar dagsferðir. Ottó Bjarki og vinur þeirra Björgvin voru ferðafélagar okkar og oftar en ekki var mikið fjör, spilað, hlegið og haft gaman. Að ekki sé minnst á grill og góðan mat, sem alltaf var nóg af hjá Maríu minni. Síðast liðið sumar ákvað María að taka stefnuna á Vestfirði og gista meðal annars í Hænuvík. Eftir að hafa keyrt um holóttan, nánast einbreiðan og snarbrattan veg Hafnarmúla á leið okkar til Hænuvíkur, sagðist hún aldrei aftur fara þangað þó fallegt væri, hvort stjórnvöld vissu ekki að þar byggi fólk og börn þyrftu í skóla. Þetta væri engan veginn boðlegt sagði mín kæra vinkona. Akureyri var í uppáhaldi hjá henni og þangað var stefnan tekin eftir Vestfirðina. Þar naut hún sín vel sem og Ottó Bjarki, líf og fjör, gott veður og stutt í áhugasama staði.

Til Grenivíkur var ferðinni heitið í sumar eftir Tenerife ferð sem við vinkonurnar ætluðum að njóta saman og var mikil tilhlökkun í gangi. Sumarlandið á án efa eftir að bjóða okkur upp á gott ferðalag saman þegar við hittumst þar elsku vinkona.

Margar góðar stundir áttum við María í leikhúsi, tónleikum, kaffihúsaferðum, keilu og mörgu öðru sem hún var búin að skipuleggja í tíma. María var mjög menningarlega sinnuð og voru tónleikar og leikhús í sérstöku uppáhaldi. Jólatónleikar Siggu Beinteins og Björgvins Halldórssonar var fastur liður í jólahaldi Maríu og að þeim loknum máttu jólin koma.

Fjölskylda og vinir skipuðu stóran sess í lífi Maríu, hún var vinamörg og ræktaði vinagarðinn vel, minnug á afmæli ættingja og vina og alltaf  kort eða gjafir á takteinum. Jólahátíðin skipaði stóran sess í hennar lífi, allt var fagurlega skreytt, ekkert til sparað í mat eða drykk og menn sem málleysingjar fengu sínar jólagjafir og hátíðinni fagnað með stórfjölskyldunni á heimili Maríu.

Fjölskyldu Maríu kynntist ég mjög vel á þessum 10 árum, foreldrum hennar, systkinum og systkinabörnum, þau urðu mín hliðar fjölskylda og veit ég að sorg þeirra, harmur og missir er mikill, eins elskuð og hún var. 

Minni hjartans vinkonu þakka ég samfylgdina, vináttuna og allra góðu stundanna sem við áttum saman. Ein kær og góð minning er frá árshátíð Sameykis nú í ár þegar við María dönsuðum saman langt fram eftir kvöldi, hlógum eins og stelpur og nutum samverunnar með góðu fólki.

Elsku vinkona ég eins og aðrir er harmi slegin yfir skyndilegu fráfalli þínu en um leið þakklát fyrir að hafa fylgt þér síðasta spölinn, haldið í hönd þína og sagt þér hversu vænt mér þætti um þig. Þú varst einstök elsku vinkona.

Elsku Ottó Bjarki, María og Hreiðar, Björgvin, Birgitta, Hulda og fjölskylda, Þorleifur og fjölskylda, mínar dýpstu samúðarkveðjur til ykkar allra.

Elsku María mín, hafðu þökk fyrir allt og allt. Ég sakna þín vinkona og okkar samverustunda. Hvíldu í friði.

Minningarsíður

Nýleg andlát

Útfarir

Hlaðvarp

Þjónustusíða

Fræðsluefni

maría þorleif Hreiðardóttir

Útför

María Þorleif Hreiðarsdóttir