Elskuleg móðir okkar, tengdamamma, amma og langamma, María Friðriksdóttir (Dúlla) lést á heimili sínu 18 febrúar 2022. Eiginmaður Maríu var Bergvin Oddsson f.22.04.43 d.22.04.2018 

Útför Maríu fer fram frá Landakirkju í Vestmannaeyjum laugardaginn 12. mars n.k. kl. 14:00.

Maríu Friðriksdóttur (Dúllu) frá Vestmannaeyjum.

María Friðriksdóttir (Dúlla) útgerðarkona fæddist á Skálum á Langanesi þann 1. mars 1943. Hún varð lést á heimili sínu þann 18. febrúar s.l.

Foreldrar Maríu voru Friðrik Jóhannsson, f. 1. febrúar 1917, d. 17. febrúar 1948 og Jóhanna Soffía Hansen, f. 26. maí 1921, d. 5. apríl 1992, öll frá Skálum. Stjúpfaðir hennar og seinni maður Jóhönnu var Lúðvík Jóhannsson, f. 23. nóvember 1913, d. 13. október 1979.

Systkini Maríu voru Jóhann Friðjón Friðriksson, f. 29. september 1939, d. 3. apríl 2021, Samúel Maríus Friðriksson, f. 25. júní 1941, d. 4. september 1995, Ásdís Han¬sen Lúðvíks¬dótt¬ir f. 15. októ¬ber 1944. d. 11. júní 2019.

María giftist Bergvin Oddssyni f. 22. apríl 1943, d. 22. september 2018.

Börn þeirra eru 1) Lúðvík f. 29. apríl 1964 kvæntur Þóru Gunnarsdóttur f. 16. mars 1965.  Börn þeirra eru Jóhanna Lea f. 10. desember 2002 og Bjarni Þór f. 27. júlí 2004.  2) Magnea f. 9. maí 1965 kvænt Þorvarði Æ. Hjálmarssyni f. 9. október 1962.  Börn Magneu af fyrra hjónabandi eru Tómas Ingi f. 22.12.1995 og María f. 22.12.1995. Dóttir Maríu og Valgeirs Þórs er Magnea Björg f. 30. september 2021.  3) Haraldur f. 21. ágúst 1972 í sambúð með Sigurlínu Guðjónsdóttur, fædd 23. mars 1976. Synir Haraldar frá fyrra hjónabandi eru Bergvin f. 24. október 1994, Baldur. f. 17. janúar 1999 og Birkir f. 20. október 2004.

María, eða Dúlla eins og hún var jafnan kölluð, var útgerðarkona og húsmóðir í Vestmannaeyjum. Hún kynntist eiginmanni, sínum Bergvin Oddssyni frá Neskaupstað, árið 1962. María lauk námi frá Húsmæðraskólanum á Laugalandi árið 1962. María og Bergvin giftu sig þann 21. nóvember 1964. Það sama ár fluttu þau Bergvin til Eyja og bjuggu þar allan sinn búskap. Meðan börn þeirra hjóna voru lítil var María mikið heimavinnandi, auk þess sem hún vann hin ýmsu störf í fiskvinnslu.

Árið 1974 stofnuðu Bergvin og María ásamt öðrum útgerðafyrirtæki sem rak Glófaxa VE 300. Á árunum 1986 til 2017 ráku þau hjón, ásamt börnum sínum fyrirtækið.  María tók fullan þátt í útgerðinni og sá m.a. um bókhald ásamt því að fella net og skera af þeim. 

María var mikill stuðningsmaður ÍBV íþróttafélags og fylgdist einnig alla tíð náið með þeim íþróttum sem börn hennar og barnabörn stunduðu.

María var félagi í Sinawik-klúbbnum í Eyjum, auk þess að starfa náið með félagi eldri borgara, þ.m.t. að syngja með kór félagsins sjálfri sér og öðrum til ánægju.

[DEFAULT]

Þetta lagabrot sem samið var um þig fyrir 150 ára afmæli þitt og pabba hljómar í huganum þegar ég er að reyna að setja niður einhverjar línur um þig elsku mamma. Elsku mamma mín það verður tómlegt núna þegar þið bæði eruð farin í sumarlandið. Það er víst alveg á hreinu að ég vann í foreldra lottóinu, og erfitt að hugsa til þín án þess að hugurinn leyti líka til pabba. Þið voruð svo skemmtileg hjón með sterkar skoðanir og hreinskilin að það var alltaf á hreinu hvar maður hafði ykkur. Sú hugsun að geta hvorki hitt þig né kíkt í kaffi er erfið og nánast óbærileg. Þið pabbi voruð ólík að mörgu leyti en samt var fjölskyldan alltaf í fyrsta sæti hjá ykkur. Stolt varst þú af barnabörnunum þínum 7 og svo varst þú ekki síður montin þegar langömmuprinsessan kom í heiminn síðasta haust.

Mamma fylgdist náið með þeim íþróttum sem börn hennar og barnabörn stunduðu og hin seinni ár fór hún að hafa áhuga á íþróttum og eins og hjá pabba var ÍBV og Tottenham hennar lið. Þar sem ekki voru margir sem héldu með Tottenham bætti hún þeim í aðdáendahópinn sem ekki höfðu þegar skoðanir á liðum enska boltans og hringdi svo í viðkomandi til þess að tilkynna þeim nýjustu úrslitin hvort sem þau voru góð eða ekki.

Mamma lauk námi frá Húsmæðraskólanum á Laugalandi árið 1962 og kynntist pabba það ár. Heimili þeirra bar alltaf vott um myndarskap hennar, og bæði eldamennska og hannyrðir léku í höndunum á henni. Öll áttum við peysur og föt sem hún hafði gert og var eftir því tekið hversu vel þetta var gert. Ef eitthvað var rifið eða þurfti að gera við gat maður alltaf leytað til hennar og hún reddaði málunum.

Þótt þú hafir fæðst og alist upp á Skálum þá voru Eyjarnar þitt heimili. Illugagatan var sá staður sem þú vildir eyða þínum tíma á og tilhugsunin um að fara eitthvað annað var ekki til umræðu hjá þér þó að heilsan hafi ekki verið upp á sitt besta svona undir það síðasta. En eftir að pabbi dó og þitt síðasta áfall þar sem þú þurftir að ganga með göngugrind varst þú ekki sátt. Samviskusamlega mættir þú í sjúkraþjálfun til Ella 3 sinnum í viku til þess að gera þitt besta með von um að ná því að geta gengið aftur og jafnvel keyra bíl. Ég veit að þessi draumur þinn rættist ekki en þú gerðir þó þitt til þess að svo yrði. Þessar stundir í þjálfuninni voru þér líka mikilvægar vegna þess að þar hittir þú fullt af fólki og gast spjallað um það sem þér lá á hjarta hverju sinni. Minningin um þig um lifa með okkur um ókomin ár.

Þá skar hún af netum og bakaði brauð

Og bjargaði öllu sem að þurfti að laga.

Þetta brot úr textanum sem að Snorri Jónsson samdi um mömmu í tilefni stórafmælis þeirra hjóna eru mér ofarlega í huga þessa dagana þegar maður er að hugsa til baka og reyna að skrifa einhver fátækleg orð um magnaða konu.

Það var nefnilega þannig á Illugagötunni að mamma gekk í öll verk sem þurfti að gera þar sem að pabbi var mikið á sjó. Hún var skipstjórinn þar og gerði það mjög vel.

Það var mikið áfall þegar símtalið kom um morguninn þann 18 febrúar og mér var tilkynnt að þú hafir orðið bráðkvödd að heimili þínu þá um morguninn og ég var rétt kominn til Reykjavíkur. Ég hafði talað við þig í síma kvöldið áður og ekkert sem benti til þess að þetta væri í vændum. En ég veit að þú hefðir ekki getað skrifað betra handrit sjálf, því á Illugagötunni hafðir þú alltaf búið og þar vildir þú vera og gast ekki hugsað þér að fara eitthvað annað.

En maður getur yljað sér við góðar minningar um einstaka móðir og einstakan karakter. Hún var ekkert að fara í kringum hlutina heldur sagði þá beint og oftast lá henni heldur hátt rómur þannig að mun fleiri heyrðu en stóð til. Heiðarleiki skipti Dúllu miklu máli þegar kom að því að meta fólk.

Mamma var einstaklega traust. Hún var alltaf akkeri heimilisins. Það kom í hennar hlut að ala okkur systkin upp og fara með okkur í gegnum grunnskólann þar sem pabbi var lítið sem ekkert heima. Hún sá nánast ein um heimilið þar til við gátum farið að leggja henni eitthvert lið. Mamma var í rauninni kletturinn á heimilinu. Hún var mjög mikil saumakona og saumaði hún öll föt á okkur krakkana lengi vel, einning var hún mjög góður kokkur.

Mamma hét María en var alltaf kölluð Dúlla og fékk maður oft þessa spurningu ,“hvað heitir hún mamma þín eiginlega?“ En nafnið Dúlla fékk hún strax við fæðingu, en vegna þess að hún var ekki skírð fyrr en hún var 5 ára gömul þá þótti það ekki við hæfi að segja frá nafni hennar fyrr en við skírnina sjálfa og var því kölluð Dúlla alla sína ævi.

Mamma hafði aldrei mikinn áhuga á íþróttum, þó hún hafi kannski aðeins fylgst með börnum og barnabörnum í gegnum tíðina í þeim íþróttum sem þau stunduðu. En tók upp á því á efri árum að fylgjast með íþróttum í sjónvarpinu, einkum fótbolta, og var dyggur stuðningsmaður ÍBV sem þau hjóninn voru mjög dugleg að styrkja í gegnum tíðina. En um 75 ára aldurinn fór hún að fylgjast mjög mikið með ensku deildinni og þar var hennar lið Tottenham Hotspur og hrindi hún eftir hvern leik hjá þeim til að segja hvernig þeir hefðu staðið sig.

Söknuðurinn er mikill en ljúfar minngingar um einstaka konu munu lifa að eilífu. Farðu í friði elsku mamma mín.

Minningarsíður

Nýleg andlát

Útfarir

Hlaðvarp

Þjónustusíða

Fræðsluefni

María Friðriksdóttir

Andlátstilkynning

Útför

Aðstandendur

Dúlla

Mamma