Margrét Eyrún Hjörleifsdóttir fæddist í Reykjavík þann 27.júní árið 1935 og lést á Landspítalanum þann 6.október 1997. Margrét eða Maddý eins og hún var alltaf kölluð átti alla tíð heima á Grettisgötu 20a. Hún var dóttir Ágústu húsmóður og Hjörleifs bónda en hann var síðasti starfandi bóndinn í miðbæ Reykjavíkur. Bróðir Maddýjar var Guðmundur sem einnig er látinn, Maddý vann lengi í fatahreinsuninni Úðafoss og einnig við önnur þjónustustörf.

Bernharð Guðnason fæddist á Berserkseyri í Eyrarsveit þann 10.nóvember árið 1929 og lést á hjúkrunarheimilinu Eir þann 20.september 2012. Bernharð eða Benni eins og hann var alltaf kallaður flutti frá Grundarfirði til Reykjavíkur árið 1969 og hóf búskap með Maddý á Grettisgötunni. Hann var sonur Guðrúnar húsmóður og Guðna bónda á Berserkseyri. Benni átti fjóra bræður sem einnig eru látnir. Benni var smiður en starfaði einnig á yngri árum við múrverk og á sjónum.

Maddý og Benni gengu í hjónaband þann 11.desember árið 1971 og eignuðust þau þrjú börn, Hjörleif, Ágústu og Bernharð en fyrir átti Benni dótturina Hrönn. Barnabörnin eru sex: Birkir Freyr, Sölvi Leví, Patrekur Árni Leví, Þorsteinn, Margrét Erla og Aron Ingi. 

Maddý og Benni voru ákaflega samrýnd hjón, miklir vinir og var fjölskyldan þeim allt. 

[DEFAULT]

Kveðja til mömmu frá ungri dóttur frá árinu 1997

Elsku mamma mín, það er ekki hægt að lýsa þér, hetjunni minni, í einni stuttri minningargrein, enda held ég að þess sé ekki þörf hér. Þínir ástvinir þekkja þig og vita hversu yndisleg og gefandi manneskja þú ert. En við einar vitum að engin orð eru nógu sterk til að lýsa vináttu okkar og sambandi. Þú ert ekki bara mamma mín heldur einnig besta vinkona mín. 

Þú ert mér allt, elsku mamma, og hjarta mitt er fullt af sársauka og sorg. Ég veit hins vegar að þú ert hjá mér og munt gefa mér allan þinn styrk til að hjálpa mér að takast á við þennan mikla sársauka. Þú hafðir áhyggjur af mér þar sem ég tek allt svo inn á mig en það er erfitt að gera það ekki þegar maður horfir á þig takast á við erfið og sár veikindi og veit hvað bíður. 

Þú hugsaðir alltaf fyrst um alla aðra en sjálfa þig og þú áttir það til að gleyma sjálfri þér elsku mamma mín. Ég reyndi allt til að endurgjalda þér þann stuðning og þá ást sem þú veittir mér. Ég veit að þessi nístandi sársauki hverfur aldrei en ég læri kannski að lifa með honum. 

Minningarnar um okkar fallega samband munu lifa áfram. Ég veit þú ert hérna hjá mér og munt fylgja mér hvert fótspor og það er það sem mun leiða mig áfram í lífinu. 

Elsku besta og yndislega mamma mín, ég kveð þig með sárum söknuði. Ég á bara svo erfitt með að sleppa þér en ég veit við munum sjást síðar. Minningin um yndislega og hjartahlýja konu lifir í hjarta mínu og mun aldrei hverfa þaðan.

Mér finnst ég varla heill né hálfur maður

ef værir þú hjá mér vildi ég glaður

Því eitt sinn verða allir menn að deyja

ég harma það en samt ég verð að segja

Kveðja til pabba frá dóttur frá árinu 2012

Hver minning dýrmæt perla að liðnum lífsins degi,

hin ljúfu og góðu kynni af alhug þakka hér.

Þinn kærleikur í verki var gjöf sem gleymist eigi,

og gæfa var það öllum, er fengu að kynnst þér.

Elsku pabbi minn, mikið finnst mér þetta sárt, en að sama skapi finn ég fyrir vissum létti. Létti að þú skulir ekki lengur þurfa að þjást. Ég sé þig núna fyrir mér með veiðistöngina að renna fyrir fallegan og stóran lax með mömmu og bræður þína hjá þér. Sú hugsun hjálpar mér mikið að takast á við þessa miklu sorg. 

Þú varst yndislegur pabbi og skemmtilegur afi. Þú vílaðir ekkert fyrir þér að leggjast í gólfið að leika við börnin enda voru þau komin í fangið á þér úti á plani þegar þau sáu þig koma. Þau kölluðu þig gamla afa með miklu stolti. Þú spilaðir við þau fótbolta í sveitinni og varðir stundum heilu tímunum í að spjalla við þau og fíflast með þeim. Þau elskuðu að koma í sveitina til þín enda móttökurnar alltaf svo góðar. 

Ég tel mig endalaust heppna að hafa átt þig sem pabba, svo hlýr og gefandi. Þú varst alltaf tilbúinn að styðja við bakið á mér og í raun að styðja mig í öllu því sem ég tók mér fyrir hendur. Ég átti alltaf öruggt skjól hjá ykkur mömmu. Svo varstu svo geðgóður, fyndinn og með eindæmum lyginn, það var dásamlegt. Sögurnar sem við krakkarnir ólumst upp við ylja okkur nú um hjartarætur. Ef við fórum að efast þá kom alltaf sama svarið; spurðu bara Jón bróður. Ekki var nú líklegt að þar kæmi sannleikurinn frekar fram.

Þetta eru dýrmætar minningar, þvílíkur gleðigjafi sem þú varst. Þér tókst að heilla alla upp úr skónum með skemmtilegum sögum og fyndnum tilsvörum. Sögur um röndótta árabátamálningu og heybaggabyssu í Þýskalandi koma núna ljóslifandi fram.

Þvílík forréttindi að hafa átt ykkur mömmu sem foreldra. Ég hefði ekki getað hugsað mér betri mömmu og pabba. Þið hugsuðuð alltaf fyrst um okkur og hag okkar. Fjölskyldan var ykkur allt.

Elsku pabbi, ég kveð þig með sárum söknuði og með svo miklu þakklæti. Minningin um yndislegan og góðhjartaðan mann lifir áfram. Knúsaðu mömmu fyrir mig, ég þarf á því að halda.

Kveðja til gamla afa frá Margréti Erlu og Aroni Inga frá árinu 2012

Elsku besti gamli afi, við erum svo sorgmædd og söknum þín sárt. Við erum búin að kvíða þessum degi. Okkur fannst alltaf svo gaman að leika við þig. Þú gafst þér alltaf tíma til að fíflast með okkur, hvort sem það var úti í sveitinni eða á gólfinu heima. Skemmtilegast var samt að spila svartapétur eða golsa eins og þú kallaðir hann þar sem þú reyndir oft að plata okkur og við hlógum svo mikið. 

Það var alltaf gaman að vera með þér, þú sagðir okkur svo skemmtilegar sögur sem við vitum að voru ekki alltaf sannar en það var bara fyndið. Við vildum alltaf vera hjá þér í sveitinni því þá gátum við spilað, spjallað og leikið okkur allan daginn með þér. Við vitum að ekki margir afar hoppa á trampólíni eða róla sér með börnunum, en þú varst líka bara öðruvísi afi. Þú varst svo góður við okkur og alltaf svo stoltur af okkur.

Elsku afi, okkur finnst þetta svo sárt en við vitum að þú heldur áfram að passa okkur og vernda. Nú ertu örugglega glaður að veiða með ömmu guði. Við höldum svo áfram að spila golsa fyrir þig.

Minningarsíður

Nýleg andlát

Útfarir

Hlaðvarp

Þjónustusíða

Fræðsluefni

Margrét Hjörleifsdóttir og Bernharð Guðnason hjónaminning

Útför

Kveðja til mömmu frá ungri dóttur frá árinu 1997

Kveðja til pabba frá dóttur frá árinu 2012

Kveðja til gamla afa frá Margréti Erlu og Aroni Inga frá árinu 2012