lést á heimili sínu, Skogsbrynet, Svíþjóð, þriðjudaginn 1. febrúar.

Magnús verður jarðsunginn frá Skärvs kyrkan, Svíþjóð, fimmtudaginn 24. febrúar.

 fæddist 24. apríl 1949 á Ísafirði. Hann lést á heimili sínu í Skärv, Svíþjóð 1. febrúar 2022.

Foreldrar Magnúsar voru hjónin Sigurrós Jónsdóttir hárgreiðslumeistari Þjóðleikhússins, f. 14. september 1912, d. 17. maí 1993 og Sigurður Halldórsson skrifstofumaður f. 5. desember 1909, d. 23. maí 1965. Bæði voru þau fædd og uppalin í Reykjavík, Sigurrós í Lambhóli í Skerjafirði og Sigurður á Laufásvegi. Magnús ólst upp í Reykjavík.

Magnús var yngstur fjögurra systkina. Þau voru: Halldór Gunnar Sigurðsson, f. 7. desember 1936, d. 26. ágúst 1962, kona hans Anna Sigurjónsdóttir, f. 2. ágúst 1935, d. 17. júlí 2007. Ragnhildur Jónína Sigurðardóttir f. 5. nóvember 1941, maður hennar Jes Einar Þorsteinsson f. 5. september 1934. Guðrún Sigurðardóttir 20. júlí 1944. Fyrri maður hennar Jónas Georgsson, f. 29. nóvember 1942, seinni maður hennar Bjarni Haraldsson, f. 23. nóvember 1947.

Fyrri eiginkona Magnúsar var Guðbjörg Jónsdóttir, f. 26. júní 1953. Gengu þau í hjónaband 8. ágústu 1970 og skildu 1981. Þau eiga tvo syni: Hrafn Magnússon, búsettann á Íslandi, f. 12. apríl 1970. Á hann þrjú börn: Freyju Sjöfn, f. 27. október 1988, Svein Magnús f. 15. apríl 1991 og Guðbjörgu Svölu f. 16. maí 1999. Sölva Snæ Magnússon, búsettan á Íslandi f. 8. apríl 1972. Hann á fjögur börn: Bessa, f. 12. apríl 1996, Daða Stein f. 28. mars 2002, Elísabetu Önnu, f. 3. maí 2009 og Friðrik Hrafn 25. júlí 2014.

Eiginkona Magnúsar er Kicki Borhammar, f. 31. ágúst 1955. Þau gengu í hjónaband 31. desember 1984. Eiga þau tvo syni: Emil Magnúsarson Borhammar, búsettur í Svíþjóð, f. 27. maí 1982, hans kona er Isa Kristina Helena Andersson f. 7. desember 1983. Þau eiga tvær dætur: Lo, f. 3. september 2014 og Siri, f. 9. apríl 2017. Einar Magnúsarson Borhammar, búsettur í Svíþjóð, f. 8. febrúar 1984, hans kona er Gabriella Jakobsson, f. 22. júní 1983. Þau eiga þrjú börn: Ágústu Lo, f. 12. desember 2011, Sigrid Sól, f. 4. október 2013 og Levi Ask, f. 2. júní 2017. 

Magnús var menntaður prentari og lærði iðn sína í prentsmiðjunni Odda á árunum 1968-72 og starfaði þar til 1976 er hann flutti til Borås í Svíþjóð. Þar starfaði hann hjá prentsmiðju Västgöta-Demokraten í Borås til ársins 1979 er hann flutti til Íslands á nýjan leik. Hann starfaði hjá prentsmiðju Þjóðviljans árið 1988 og prentsmiðju Morgunblaðsins 1988-1990. Árið 1991 flutti hann á nýjan leik til Svíþjóðar og starfaði hjá Götene Trykkeri árin 1991 til 1992.

Magnús var mjög virkur í félagsmálum og varði stórum hluta starfsævi sinnar í þeirra þágu. Magnús hóf afskipti af félagsmálum prentara strax á námsárum sínum. Hann var formaður Prentnemafélagsins í Reykjavík 1968-1969, formaður Iðnnemasambands Íslands 1969-1970 og 1971-1972, ritari Hins íslenska prentarafélags (HÍP) 1973-1976, varaformaður HÍP 1980, fyrsti formaður Félags bókagerðarmanna 1980-1988, ritstjóri Prentarans 1980-1988, í stjórn deildar 47 Skara, formaður bókagerðarmanna í Västra Götlanda og í stjórn Grafiska Fackförbundet, Svíþjóð. Síðustu ár starfsferils síns var hann starfsmaður félagsins. Hann var kjörinn heiðursfélagi Grafíu stéttarfélags 2018.

[DEFAULT]

Magnús Einar Sigurðsson f. 24. apríl 1949 d. 1. febrúar 2022

Þar sem ég sit hér og skrifa minningarorð um þig elsku móðurbróðir minn gnauðar vindurinn. Gnauðið lýsir ágætlega hvernig sálarlífið hefur verið á þessum dögum síðan þú kvaddir okkur allt of fljótt. Þrátt fyrir þessa miklu sorg sem nístir hjarta mitt og depurð í sinni rifja ég upp góðu stundirnar sem við áttum saman og fyrir þær er ég þakklátur.

Þakklátur fyrir að hafa getað heimsótt ykkur svona oft til Svíþjóðar og fengið að upplifa lífið ykkar þar. Skemmtilegu fótboltaleikina sem við lékum oft langt fram á kvöld þar sem afleiðingarnar urði í eitt skipti þær að ég var sundurétinn á fótleggjunum af mýi. Eins var það ævintýri líkast þegar við fórum í lautarferð í hellirigningu þar sem það varð að gefa svöngu fólki að borða. Þarna skyldi ég notagildi regnhlífa í fyrsta sinn, komandi frá Íslandi. Indælu skoðunarferðirnar um svæðið ykkar þar sem ýmis kennileiti suður Svíþjóðar voru skoðuð. Að auki má ekki gleyma öllum skógartúrunum og sundferðunum í vötnunum í kringum ykkur. Allt gladdi þetta mig en mest gladdi mig samveran með ykkur og spjallið um heima og geima.

Þakklæti er mér líka efst í huga þegar ég hugsa til allra heimsóknanna ykkar til Íslands. Þá var gaman að geta hýst ykkur í Grjótó hjá mömmu og pabba. Mikið gátum við spjallað og drukkið kaffi sitjandi við borðstofuborð foreldra minna. Nokkrar ferðir um nágrenni höfuðborgarinnar koma líka upp í hugann. Skemmtilegu sumarbústaðaferðina, ferð að Gullfossi í klakaböndunum, bæjarferðir og að sjálfsögðu all nokkrir fótboltaleikir sem leiknir voru. Hlýjasta minningin er þessa stundina þegar þið Kicki komuð til okkar hér á Selfoss. Það var töfrum líkast hvað þið náðuð góðri tengingu við syni okkar Guðbjargar og fyrir það er ég yfirmáta þakklátur. Þið eigið stóran stað í hjarta þeirra.

Þakklátur fyrir að hafa fengið að kynnast þér sem mjög skapandi ljóðskáldi. Það er ómetanlegt að hafa staðið í bréfaskriftum öll þessi ár. Þú handskrifaðir öll þín bréf en ég tölvunördinn skrifaðu þau í tölvu. Við ræddum margt bréfleiðis og það þroskaði ungan mann að standa í bréfaskriftum við þig. Bréfin þín innihéldu ætíð ljóð og oft fleiri en eitt. Ljóðin þín tóku á öllu sem var að gerast í samfélaginu og þú kjarnaðir ástandið vel í knöppu formi ljóðsins. Á mínu heimili var hvert ljóð eftir þig lesið upphátt og oftar en ekki nokkrum sinnum. Upplestrinum fylgdi iðulega umræða um efni þess. Þú varst líka mjög frambærilegur teiknari og málari. Myndirnar þínar hanga uppi á vegg hjá mér og öllum þeim sem þykir svo vænt um þig. Myndirnar þínar bera keim af ljóðlist þinni, í þeim ert þú oftar en ekki að taka á samfélagsmeinum. Þú gafst mörgum mikið með list þinni.

Þakklátur fyrir að hafa kynnast þér sem fjölskyldumanni. Þú varst mikill pabbi. Studdir drengina í því sem þeir voru að gera og greipst þá þegar gaf á bátinn. Þú naust þess líka að vera afi og sinntir barnabörnum þínum af alúð og ást. Þú varst líka ástríkur eiginmaður og það var unaður að fylgjast með samheldni ykkar Kicki. Samband ykkar var dásamlegt og alltaf gott að vera í návist ykkar. Eins og ég segi, ein af mínum stærstu áhrifavöldum.

Mikill er missir Kicki og strákanna þinna. Það er hörmulegt að missa þig svo fljótt en ég er þakklátur fyrir að hafa verið þátttakandi í lífshlaupi þínu. Ég sendi Kicki, strákunum, tengdadætrunum, barnabörnum og barnabarnabörnum mínar innilegustu samúðarkveðjur.

Minningarsíður

Nýleg andlát

Útfarir

Hlaðvarp

Þjónustusíða

Fræðsluefni

Magnús Einar Sigurðsson

Andlátstilkynning

Útför

Aðstandendur

Magnús Einar Sigurðsson f. 24. apríl 1949 d. 1. febrúar 2022