Elsku faðir okkar, tengdafaðir og afi lést á hjúkrunarheimilinu Grund síðastliðin sunnudag. Útförin fer fram í kyrrþey. 

Það eru margar fallegar minningar sem koma upp við fráfall Kristmanns. Hann var húmoristi, einstakt góðmenni og mikill dugnaðarforkur. Hann gat verið sérvitur, hafði skoðanir á nánast öllu og var vanafastur. Það kom bersýnilega í ljós á vali hans á veitingastöðum. Hann var sannfærður um að bestu veitingastaðir  landsins væru Kentucky Fried Chicken og Sprengisandur. Reyndar taldi hann að talsverður gæðamunur væri á milli Kentucky staðanna og kom ekki annað til tals en að fara í Kópavoginn. Þá var hann dyggur aðdáandi Elvis Presley og pílagrímsferð hans til Graceland var einn af hápunktum lífsins. Ef til vill syngja þeir nú saman “Return to sender”. 

Kristmann fæddist í Vestmannaeyjum árið 1945 og hafði gaman að segja sögur af sínum yngri árum þegar hann sinnti sjálfboðastörfum fyrir Viðlagasjóð í kringum gosið í eynni á árinu 1973. Þar starfaði hann við hlið bandarískra hermanna sem komu dælum fyrir í höfninni á elleftu stundu. Þannig náðist að tryggja lífsnauðsynlega opnun hafnarinnar. Hann sinnti einnig ýmsum störfum fyrir Ístak í uppbyggingu á eyjunni fögru eftir gos.

Fyrstu tvo áratugina, ólst Kristmann upp í kringum Skólavörðuholtið, gekk í Austurbæjarskóla, síðar í Iðnskólann og eignaðist þar trausta vini. Hann hafði brennandi áhuga á ljósmyndun og eignaðist ungur myndavél sem var ekki algengt á þessum árum. Þúsundir ljósmynda voru hans dýrmætasta eign og færði vinum og börnum fallegar minningar í gegnum árin. Hann lærði húsgagnasmíði og síðar húsasmíði. Starfaði við byggingu Tollstöðvarinnar, Kaupgarðs og fleiri stórhýsa, ásamt því að starfa við stækkun Mjólkárvirkjunar. Þessir tímar voru Kristmanni minnistæðir og var hann eftirsóttur í ýmsa verkstjórn, enda einstaklega handlaginn og útsjónasamur. Hann var frímúrari í 50 ár og alltaf stoltur þegar hann klæddist kjólfötunum sínum.

Margir muna eftir Kristmanni á skerpingaverkstæði sínu í Skeifunni og síðar á Smiðjuveginum með London Docks vindil, leikandi við hvern sinn fingur. Það hentaði honum vel að starfa sjálfstætt og rak hann verkstæði í um fjóra áratugi. Kristmann var soldið lúinn undir það síðasta og tilbúinn fyrir sumarlandið, þar sem afi og amma taka honum fagnandi. Hann var sáttur við lífið og þakklátur þeim sem stóðu honum næst. Hann kvartaði aldrei og var einstaklega harður af sér, jafnvel einum of. 

Minningin um einstakt ljúfmenni mun lifa. Fyrir þá sem vilja minnast hans er bent á að renna við á Kentucky í væng eða tvo og skola niður með góðum Elvis slagara.  

Kristmann fæddist þann 5. janúar 1945 í Vestmannaeyjum og lést 22. maí síðastliðinn á hjúkrunarheimilinu Grund. Hann eignaðist fjögur börn: Guðnýju Þórunni, Elísu, Halldór og Fanney og átti 10 barnabörn. Útför Kristmanns fór fram 27. maí 2022. 

Minningarsíður

Nýleg andlát

Útfarir

Hlaðvarp

Þjónustusíða

Fræðsluefni

Kristmann Þór Einarsson

Andlátstilkynning

Útför

Aðstandendur

Ertu með minningargrein?