Kristinn Þór fæddist á Selfossi 25. ágúst árið 2000. Foreldrar hans eru Kristín Erla Ingimarsdóttir og Styrmir Þór Þorsteinsson. Kristinn var miðjubarnið í systkinahópnum. Systir hans Anna Dagbjört er fædd árið 1997 og er sambýlismaður hennar er Ástþór Arnar Bragason. Yngri bróðir Kristins er Þorsteinn Ingi fæddur 2007. Kristinn Þór ólst upp í Hrunamannahreppi og gekk Flúðaskóla. Hann æfði m.a. körfubolta og fótbolta með Hrunamönnum á yngri árum og var virkur meðlimur í golfklúbbnum á Flúðum.  Eftir grunnskóla lá leið Kristins Þórs í Menntaskólann að Laugarvatni þar sem hann tók m.a. þátt í kóra- og leiklistarstarfi. Eftir stúdentspróf fór Kristinn Þór í lýðháskóla í Danmörku þar sem hann lagði stund á leiklist og sirkus. Árið 2021 hóf Kristinn Þór nám í viðskiptafræði við Háskóla Íslands þar sem hann var á öðru ári þegar hann lést. Kristinn Þór var virkur í pólitísku starfi og var flokksbundinn Viðreisn. Hann var í 4. sæti á  L- listanum  í Hrunamannahreppi í síðastliðnum sveitastjórnarkosningum og var formaður umhverfisnefndar sveitafélagsins. Frá unglingsaldri stundaði Kristinn Þór ýmis störf á sumrin og með skóla. Síðustu árin starfaði hann í Krambúðinni á Flúðum.

[DEFAULT]

Elskuelsku Kristinn minn. Ég er svo þakklát, þakklát fyrir að hafa kynnst þér, fyrir að hafa alist upp með þér, fyrir að hafa rifist við þig, þakklát fyrir að vera systir þín, þakklát fyrir þig. Ég elska þig svo ótrúlega mikið. 

Seinasta sumar bjuggum við tvö saman, engin orð geta líst því hversu þakklát ég er fyrir það. Öll systkina spilakvöldin, göngutúrarnir mínir í búðina bara til að hitta þig og spjalla, það var eitthvað svo huggulegt við að sjá þig þar. Öll þau skipti sem þú komst í heimsókn til okkar Ástþórs til Köben og hversu mikið þú elskaðir rejsekortið þitt. 

Ég á svo margar góðar minningar, ég vildi að þær yrðu fleiri, ég vildi að þær væru ekki alveg svona dýrmætar. Ég vildi að þær væru einfaldlega minningar sem við rifjuðum upp saman Kristinn, ég og þú.

Við vorum svo góð saman, við elskuðum að horfa á disney myndir, syngja lögin og dansa. Við elskuðum hljómsveitina kef lavík. Við tengdum við lögin þeirra og töluðum um textana „Djúpir dalir sem virðast dýpka stanslaust, en ég er okei, ég klæðist skartgripum fyrir karlmenn“ sungum við og þú veifaðir fína hringnum þínum. Við töluðum um þessa hluti, en aldrei leyfðiru mér að sjá eða heyra um þína djúpu dali. Þú vildir ekki taka þannig pláss. Þú vildir ekki láta fara fyrir þér. Þú vildir bara koma með gleði og vera til staðar fyrir aðra... Kristinn þú veist hvað ég hefði mikið viljað vera til staðar fyrir þig, þú veist að við hefðum öll svo mikið viljað vera til staðar fyrir þig. 

Við Steini munum aldrei gleyma þér, og við munum aldrei hætta að sakna þín. Þú gerðir systkinahópin okkar að hópi, þú varst svo einstakur og ólíkur okkur að ég skil ekki hvernig við eigum að halda áfram án þín. Þú skilur eftir þig svo stórt skarð.

Kristinn Þór bróðir minn vildi ekki deyja, hann lifði góðu lífi og átti sér stóra drauma. En djúpu dalirnir dýpkuðu stanslaust, og bróðir minn leitaði sér ekki til hjálpar. Eins og hann orðaði sjálfur í kveðjubréfinu sínu þá tapaði hann bardaganum í hausnum á sér... Ég vona að líf hans geti kennt, og minnt okkur öll á að takast á við hausinn á okkur, mæta í bardagann og leita okkur hjálpar. Ég vildi að þú hefðir getað verið lengur hérna elsku Kristinn minn. Ég mun aldrei gleyma þér og aldreialdrei hætta að sakna þín. 

Takk fyrir þessi 22 ár <3 ég kann að meta hverja einustu sekúndu. 

Minningarsíður

Nýleg andlát

Útfarir

Hlaðvarp

Þjónustusíða

Fræðsluefni

Kristinn Þór Styrmisson

Útför

elsku litli bróður minn <3