Elskulegur faðir okkar, tengdafaðir, afi og langafi Jón Eggertsson lést á landspítalanum  19. janúar 2022. Útför fer fram frá Reykholtskirkju 5. febrúar 2022.

Útförin fer fram frá Reyholtskirkju laugardaginn 5. febrúar klukkan 14.00

Jón Eggertsson fæddist 21. nóvember 1925 á Kópaskeri. Hann lést á landspítalanum  19. janúar 2022.

Foreldrar hans voru, Eggert Ólafur Briem Einarsson læknir, f. 1.6.1894 d. 23.8.1974 og Magnea Jónsdóttir f. 22.2.1899 d.10.10.1975

Systkini Jóns eru: eftirlifandi: Ester (f. 1927) og Halldór (f. 1936), látin eru: Jóhanna  Katrín Kristjana (f. 1924 d. 1970), Anna Gunnlaug (f. 1928 d. 2019), Einar (f. 1930 d. 2014) og Eggert Ólafur (f. 1931 d. 2020) 

Jón var alinn upp á Þórshöfn til 15 ára aldurs. Þá fluttist fjölskyldan í Borgarnes. Jón stundaði sjómennsku til jafns fiskveiðar og  heimssiglingar. Árið 1962 flutti Jón heim í Borgarnes og stofnaði það efnalaug og verslun sem var hans lífsviðurværi til ársins 1988. Þá fluttist hann til Vestmannaeyja og bjó svo frá 2000 í Reykjavík. Börn Jóns eru: Magnea Heidi Grundt f. 18.6.1962 læknir í Stavanger gift Hans Jörgen (látinn) dætur þeirra eru 1) Cecilie f. 1992 2) Hilde f. 1996. Anna Gunnlaug f. 13.6.1963 húsfreyja, gift Ólafi Magnússyni bónda, f. 1961. Börn þeirra eru 1) Elva Guðrún f. 1983 2) Andrés f. 1985 3) Sigurður f. 1988, sambýliskona Dagný Vilhjálmsdóttir f. 1991. Börn þeirra eru Magnús, Jón (látinn) og Ólöf. 4) Einar f. 1990, sambýliskona Helga Rún Hjartardóttir f. 1988. Barn þeirra Ásgerður Glóð, barn hans, Greta Helene Osburg 5) Jóhannes f. 1992, sambýliskona Brynhildur Lea Ragnarsdíttir f. 1992 6) Sigrún f. 1999, gift Rabi Ulislam f. 1992 7) Steinunn f. 2003. Baldrún Kolfinna f. 19.5.1966 framkvæmdastjóri gift Allaoua Ægir Si Said rafverkfræðingur f. 1958. Synir þeirra eru 1) Jón Amar f. 1990 sambýliskona Ingibjörg B. Hjartardóttir f. 1989 f. 2) Eggert Djaffer f. 1992 sambýliskona Ríkey Konráðsdóttir f. 1993. Eggert Ólafur f. 28.3.1968 húsasmiður. Börn hans 1) Sævar Örn f. 1989 sambýliskona Hrefna María Ómarsdóttir f. 1983 2) Kolbrún Tanja f. 1992 gift Sigurði Rúnari Ingasyni f. 1989. Börn þeirra eru Mikael Óðinn og Arndís Mía 3) Arnrún Kolfinna f. 2005. Þórður f. 13.2.1970 húsasmiður, giftur Söru Stefánsdóttur húsmóðir f. 1982 barn þeirra 1) Jón Stefán. Jóhann f. 1.12.1972 matreiðslumaður giftur Hafdísi Harðardóttur kennara f. 1967. Dætur hans 1) Unnur Björk f. 1995 sambýlismaður Ingólfur Ólafsson f. 1987 2) Birgitta Eygló f. 1996 sambýlismaður Dagur Óttarsson  f.1998.  Barn hennar Kristján Breki, börn þeirra 1) Andri Már f. 2006 2) Selma Dögg f. 2010. Jóhanna Erla háskólanemi f. 25.9.1974 gift Ingvari Þór Jóhannssyni f. 1971. Börn þeirra eru 1) Arnar Freyr Briem f. 1992 sonur hans Þorgils Teitur Briem 2) Berglind Ýr f. 1995 sambýlismaður hennar er Jóhannes Guðmundsson f. 1991 sonur þeirra Elmar Darri 3) Hreiðar Þór f. 2001. Margrét sjúkraliði f. 2.10.1976. Börn hennar 1) Matthías f. 1997 2) Ásrún f. 2003.

Vigdís Auður Pálsdóttir

[DEFAULT]

Jón frændi í Borgarnesi hefur kvatt. Það var mikil væntumþykja á milli bræðranna pabba og Jóns. Þeir nutu þess að fara saman á veiðar þó Jóni hafi ekki fundist pabbi mikill veiðimaður. Þegar þeir hittust sátu þeir saman en þurftu ekki mörg orð í samræðum sínum. Fámálir, þögulir en nánir. Jón hafði hrjúft viðmót,  hlýjar hendur og kímni og húmor í augum.

Í minningunni er Jón óneitanlega tengdur jólunum og pakkanum úr Borgarnesi með rjúpunum, gæs og laxi sem hann hafði veitt. Það var alltaf sérstakt og gaman að koma í Borgarnes. Við vorum alltaf velkomin, vel tekið á móti okkur og mikið líf og fjör. 

Við kveðjum Jón með mikilli væntumþykju og þakklæti fyrir samfylgdina. Börnum hans, tengdabörnum og barnabörnum sendum við innilegar samúðarkveðjur. Minningin lifir.

Eggert Ólafur, Magnea, Unnur og Áslaug Einarsbörn

Jón Eggertsson, næstelstur sjö barna Magneu Jónsdóttur og Eggerts Einarssonar, ólst upp á Þórshöfn þar sem faðir hans var héraðslæknir í víðlendasta læknisumdæmi landsins en ekki að sama skapi þéttbýlu. Heimilið var fjölmennt því sjúkraskýlið var sambyggt læknisbústaðnum; auk fjölskyldunnar bjuggu þar oft tímabundið hjúkrunarkona, vinnumaður, fjósamaður, kennari barnanna, léttastúlkur, sjúklingar að jafna sig og fólk á framfæri hreppsins. Frú Magnea hafði í mörgu að snúast. Eggert átti kýr til heimilisnota, svín um tíma og jafnan hesta því oft þurfti hann í læknisvitjanir og ekki heiglum hent að fylgja honum; hann hætti að raka sig í september til að safna skjólgóðu skeggi fyrir vetrarferðir.

	Að vonum var heimilislífið fjörugt. Jón var út og suður í þorpinu að leika sér eða hjálpa til við heyskap, reka kýr, kraka upp kola við bryggjuna, safna hagalögðum til þess að geta keypt tóbak eins þá var í tísku! Eggert fékk Borgarfjarðarhérað 1941 og fluttist þá með fjölskyldu sína til Borgarness. Jón var þar um hríð, hugsaði sér að læra bifvélavirkjun, en úr því varð ekki; var með annan fótinn í Reykjavík hjá Páli föðurbróður sínum. Hann var nokkur sumur í síld fyrir Norðurlandi og á vetrarvertíðum í Eyjum, réð sig síðan á færeyskan línuveiðara við Grænland og sumarið 1948 á færeyska skútu sem legið hafði um hríð norður á Þórshöfn. Aflinn var lagður upp í Þórhöfn í Færeyjum og þá vildi svo til að háseta vantaði á norskt tankskip sem lá ferðbúið við bryggju. Jón réð sig í plássið – og þar með hófust siglingar hans um heimshöfin. Næstu 14 ár sté hann ekki fæti sínum á íslenska jörð. Hann sigldi á skipum sem fluttu járngrýti frá Svíþjóð, neyðarhjálp frá Bandaríkjunum til Indlands, banana frá Ekvador til Bandaríkjanna, kartöflur frá Kanada til Argentínu, súrál frá Suður-Ameríku til Bandaríkjanna, áfengi í tunnum frá Brasilíu til New York uns hann munstraði sig á stórskip sem sigldu umhverfis hnöttinn, losuðu og lestuðu oft við erfiðar aðstæður og tók hver ferð sex mánuði. Eitt og eitt póstkort sendi hann heim til að láta vita af sér. „Þau hefðu nú kannski mátt vera fleiri“ sagði hann. Þetta var ævintýralegt líf með „allra þjóða kvikindum, margir voru ágætismenn, aðrir andskotans gemlingar.“ Sumir reyndu að gera honum skráveifu – en aðeins einu sinni! Þegar komið var í höfn var lífið dans á rósum í nokkra daga; Beirut í Líbanon og Caracas í Venesúela voru fjörmiklar borgir á þá daga, sagði Jón. 

	Heim kominn 1962 settist hann að í Borgarnesi, opnaði þar þvottahús, efnalaug og verslun en fluttist til Vestmannaeyja 1988 og var þar á snærum Ísfélagsins uns hann fór til Reykjavíkur árið 2000, hafði keypt þar íbúð 1991 og 75 ára fékk hann vinnu hjá verktökum við byggingu HR o.fl. og lét af störfum 81 árs. Geri aðrir betur.

	Jón Eggertsson var ekki málgefinn en kjarnyrtur í tali, hreinskiptinn og einarður; kunni að tvinna ef þess þurfti með, t.d. þegar rætt var um kvótakerfið... Ánægjulegt var að rabba við hann því að maðurinn hafði frá mörgu að segja og var spjallgóður yfir kaffibolla. Hann var þrekvaxinn og hraustur vel á manndómsárum sínum, handstór með afbrigðum og óloppinn, glæsimenni á velli. Honum var ekki fisjað saman og varð nauðasjaldan misdægurt. Hann gat verið hrjúfur í viðmóti en var í raun afskaplega hlýr og góðviljaður, hlédrægur nokkuð og þó afar gestrisinn. Hann var skapfestumaður og enginn fékk hnikað ákvörðunum sem hann hafði tekið; öllum fortölum blés hann þá út í hafsauga; hláturmildur á glöðum degi. Átti lengi bát og hafði unun af veiðiskap hvort sem var á sjó eða landi; var í rauninni náttúrubarn og veiðikló. Ekki lét Jón Eggertsson skarðagolu eða misvindi aftra sjósókn. Hann var prýðilega búhagur og smíðaði t.d. húsgögn á heimili sitt og fyrir ýmsa aðra.

	Lífið verður kyrrlátt mönnum sem eru á tíræðisaldri og þeir fjarlægjast dunandi miðju dagsins. Jón hafði tapað miklu af heyrn sinni en sjónin var góð og vitið óskert og hann bjó á heimili sínu með dyggilegri aðstoð barna sinna. Líklega var hann saddur lífdaga undir lokin, og trúaður sem hann var á seinni tíð gat hann áreiðanlega tekið undir með Grími gamla Thomsen: „Verður skyggn, að sólu sestri / sál, er losnar holds við ok; / stjarnan skæra skín í vestri, / skoða eg hana í vökulok.“ Fari hann nú sæll í sína siglingu. Við Magnea sendum ástvinum hans öllum samúðarkveðju.

Minningarsíður

Nýleg andlát

Útfarir

Hlaðvarp

Þjónustusíða

Fræðsluefni

Jón Eggertsson

Andlátstilkynning

Útför

Aðstandendur

Þakkir

Kveðja til föðurbróður

Vinur og frændi kvaddur