Anna Olsen eins og hún var alltaf kölluð fæddist á Þórustíg 1 Ytri Njarðvík 13. Nóv 1956. Hún lést á heimili sínu þann 19 apríl 2021.

Foreldrar Önnu voru. Karl Hinrik Olsen forstjóri f. 29 okt 1926 d. 25. Feb 2013. Jakobína Anna Magnúsdóttir f.16. okt 1927.

Anna var 6. Í röð 9 systkina. Systkini hennar eru Jenný f.4 des 1944, Magdalena f 26. Mars 1948, Karl f. 15.des 1949, Rósbjörg f. 30. Sep 1953, Olav f. 23. Nóv 1954, Sólbjört f. 22. Júl 1959, Sara f.13 feb 1963 og Agnar f. 10 feb 1969. 

Anna giftist Tómasi S Guðlaugssyni 7. Júlí 1974 og eiga þau 3 börn

I Bjarnrún Magdalena f. 25. Jún 1975 gift Sveinbirni Gíslasyni og eiga þau 3 börn 1 Herdís Ósk og á hún synina Aron Dag og Róbert Þór. 2 Gréta Kristín. 3 Hafþór Gísli.

 II Guðlaugur f. 23 okt. 1978 giftist Árnýu Rós Böðvarsdóttir og eiga þau 2 börn 1 Þórður Breki 2 Gyða Karen. Fósturdóttir Guðlaugs er Svanfríður Erla. Guðlaugur og Árný eru skilin.

 III Anna Kristín f. 7. Júlí 1980 gift Sigurði Óla Kjartanssyni og eiga þau 4 börn. 1 Ásta Kristín2 Jón Óli, dáinn. 3 Tómas Snorri og 4 Ingólfur Helgi.

Anna ólst upp í Ytri Njarðvíkunum. Anna var félagslynd og mjög söngelsk, hún var í skátafélaginu Víkverjum og söng í barnakór Njarðvíkur skóla og kirkjunnar og seinna í Ytri-Njarðvíurkirkju. Anna var í píanó og söng námi í tónlystaskóla í Njarðvík.  Hún kláraði 4. Stig í söng á hálfum vetri en varð að hætta vegna krónisks ofnæmis, það varð henni mikil vonbrigði. Anna byrjaði snemma að vinna við barnapössun fyrir varnaliðs fjölskyldur og var eftirsótt til að hugsa um börn þar sem hún var mjög barn góð og fljót að læra enskuna. Síðan vann hún í fiskvinnslu og við afgreiðslu störf. Anna vann um skeið á elliheimilinu á Faxabraut í Keflavík. Anna vann sem dagmóðir í 7 ár og var í stjórn dagmæðra þar sem hún kom mörgu til leiðar eins og tryggingarmálum og fl. Anna rak verslunina Hjá Önnu frá 1990 til 2006 eða í 16 ár, samhliða rekstrinum var hún með föndurnámskeið og fl. Hún var í stjórn kaupmannasamtakana, í fulltrúaráði Sjálfstæðisflokksins, sat í stjórn Sjálfstæðiskvenna í Keflavík. Anna kom ínn í byggingarnefnd á miðju kjörtímabili á 10 áratugnum fyrir hönd sjálfstæðisflokksins og var með fyrstu konum ef ekki sú fyrsta til að sitja í byggingarnefnd. Anna var í málfundarfélaginu Freyja, hún var ein af stofnendum Bjargar og var fyrsti formaður félagsins. Á þessum tíma annaðist Anna heimilið og fór í 4 annir í smíðum og 4 annir í saum og hönnun. 

Jarðarför Önnu fer fram í Innri-Njarðvíkurkirkju föstudaginn 30. Apríl kl 13:00.  

[DEFAULT]

Elsku mamma. Hvorki eru til nægilega stór né sterk orð sem lýst geta hversu mögnuð kona þú varst og hversu sár sorg okkar er. Líkami þinn svo örþreyttur og smár þráði hvíld og náð. Sál þín þráði að komast aftur heim í ljósið og skil ég það svo vel.

Þitt lífsins hlutverk var stórt sem þú inntir af hendi vel. Hjörtu margra þú snertir af alúð og náð. Sem ljós á vegi okkar, áttir ávallt ráð. Nú ertu orðin engill Guði þínum hjá. Í draumi við munum hittast, hverja eina nótt. Alveg þar til ð þú getur okkur sótt. Við ætlum ekki að kveðja því við vitum þú ert hér, heldur þín minnast bæði oft og vel.

þarf ég bara að sitja og hugsa um þig

það er eins og þú sért hér hjá mér

Bjarnrún Magdalena Tómasdóttir og fjölskylda.

Það er mér svo óbærilega sárt að þú sért farin að ég er bara dofin af sorg. Tómleikinn í hjarta mínu er svo mikill að það er vont. Lífið verður aldrei samt án þín.

Hvernig á lífið að halda áfram án hlýju faðmlaganna þinna, brossins, hlátursins og kærleikans?

Sem lítil stúlka var minn draumur að verða eins og mamma mín. Mitt „idol“ varst þú. Ekki annað hægt en að dást að þér, elsku mamma. Mér fannst þú fullkomin á allan hátt. Alltaf svo fín og flott. Klassakona með allt á hreinu. Þú varst alltaf svo jákvæð, klár, hjartahlý, skilningsrík og þolinmóðari en góðu hófi gegnir.

Þú söngst svo fallega og man ég vel eftir stundunum okkar að syngja í takt við Tammy Wynette og Patsy Cline og fleiri.

Þú hefur alltaf verið stoð okkar og stytta í einu og öllu. Einhvern veginn hefur vegur okkar alltaf legið þétt saman, alveg sama hvað það var þá varst þú og pabbi þar. Við höfum búið, ferðast, prjónað, sungið, hlegið, grátið og djókað saman og svo miklu meira en það.

Þrátt fyrir þín veikindi í gegnum tíðina hefur þú alltaf sett allt til hliðar til að hjálpa þeim sem þurftu aðstoð. Það var alltaf eitthvað í gangi einhvers staðar og þú alltaf á fullu á öllum vígstöðvum.

Þegar ég varð ólétt að Ingólfi þá tókuð þið okkur öll inn á ykkar heimili, 5 manna fjölskyldu, það er ekkert smá dæmi. Þú sást um að klæða og fæða börnin mín og sjá um allt á meðan ég var föst í rúminu.

Þú varst hætt að vinna í búðinni vegna veikinda, en þú lést það ekki stoppa þig í því að taka okkur öll upp á arminn. Þú ólst upp börnin okkar með okkur. Takk fyrir allt, elsku mamma. Ekki veit ég hvernig þú fannst allan þann styrk og allt sem til þurfti til að vera hérna með og fyrir okkur öll. En þú settir alltaf alla fram fyrir þig og þína heilsu, því að ást þín á okkur öllum var svo mikil og sterk. Ákveðin hélstu áfram því að þú ætlaðir að vera alveg viss um það þegar þú myndir fara inn í svefninn langa. Að fólkið þitt væri alveg öruggt.

Það er svo margs að minnast, elsku mamma. Ég gæti skrifað endalaust.

Ég er svo eilíflega þakklát fyrir þig og okkar tíma saman. Og ég þakka þér fyrir alla þær fórnir og allt sem þú hefur gert fyrir okkur og með okkur.

Þú ert púslbitinn sem hélt okkur heilum. Án þín erum við orðin brotin og völt. En með tímanum, kærleika þínum, krafti og ljósi kemur þú okkur til bjargar enn á ný, elsku mamma. Og munt hjálpa okkur í gegnum þennan tíma eins og alla aðra tíma í gegnum árin. Þar sem ég veit að þú ert sko hvergi nærri hætt að vera ljós okkar í myrkrinu, þá veit ég að þú lýsir okkur á réttan veg enn á ný.

Takk fyrir allt, elsku fallegi ljósengillinn okkar.

Elska þig svo mikið og mun sakna þín sárt um alla tíð.

Elsku besta tengdamamma, það er með sorg og trega sem ég skrifa þetta stutta bréf til þín. Það er stórt skarð höggvið úr fjölskyldunni við fráfall þitt, skarð sem aldrei verður fyllt í aftur, þessu skarði má líkja við Miklagljúfur svo stór var persónuleikinn þinn. Ég vil þakka þér fyrir að taka mig inn í fjölskylduna frá fyrsta degi og gefa mér blessun þína að ganga að eiga dóttur þína.

Þú varst alltaf með ráð undir rifi hverju ef maður kom og leitaði ráða hjá þér sem ég gerði margoft og alltaf hafðirðu rétt fyrir þér því að ráð var aldrei gefið nema skoða í þaula.

Þú varst stoð og styttan okkar í gegnum súrt og sætt, einhvers konar ankeri okkar en núna ertu komin til sumarlandsins okkar og nú ertu úr fjötrum leyst.

Uns við hittumst aftur, elsku tengdamamma,

Elskum þig, elsku amma okkar. Þú varst best í heimi.

Þann 9. desember 1973 var upphaf sólarinnar í mínu lífi en það kvöld kynntist ég konunni minni. Frá þeirri stundu vorum við óaðskiljanleg. Við giftum okkur 7. júlí 1974 og hefðum því átt 47 ára brúðkaupsafmæli á þessu ári, en forlögin hafa kippt í spottann og sólin er sest í sálu minni.

Nú er þessi ljósgeisli okkar fallinn frá og stórt skarð komið í raðir okkar sem ekki verður fyllt. En minningin um góða konu, móður, ömmu og langömmu mun lifa. Alltaf gátu börnin okkar leitað með allt til þín. Síðan komu barnabörnin og langömmubörnin og öll gátu þau tjáð ömmu sín leyndustu leyndarmál og alltaf gastu hjálpað þeim. Alltaf tókstu svo vel á móti þeim með opinn og hlýjan faðminn og alltaf fannstu það á þér þegar þeim lá eitthvað á hjarta og þurftu að tala við þig í einrúmi.

Alltaf varstu boðin og búin að hjálpa öðrum, alltaf tilbúin að láta þig sitja á hakanum fyrir aðra. Allt sem þú tókst að þér lék í höndunum á þér. Sama hvort það voru hannyrðir, heimilið, félagsstörf eða að hjálpa mér í viðgerðum eða smíði, allt lék í höndunum á þér. Þú varst með afbrigðum dugleg og ósérhlífin og hreint ótrúlegt hverju þú áorkaðir og skilur eftir þig af hlutum eins og hannyrðum, skartgripum og hlutum úr tré. Eitt skiptið fórstu í trésmíði hjá Héðni og Stulla og smíðaðir útidyrahurð með karmi og öllu og var þetta hin vandaðasta smíði eins og allt sem þú gerðir.

Við lögðum af stað í ferðalag full bjartsýni og tilhlökkunar. Á leiðinni urðu ótal hindranir og torfærur sem við komumst í gegnum með óbilandi krafti og trú þinni á að við gætum þetta. En áföllin komu hvert á fætur öðru. Við lentum í bílslysi árið 2000 sem þú fórst illa út úr og náðir aldrei fullum bata eftir það. Þrátt fyrir það hélstu áfram að vinna þar til þú varðst að hætta vegna veikinda árið 2006. Með óbilandi viljastyrk og þrautseigju náðirðu smá bata og allt virtist vera á uppleið á ný, en svo kom enn eitt áfallið 2013 þegar þú fékkst inflúensu B. Þau veikindi urðu svo smám saman til þess að heilsunni hrakaði og gerði þig því sem næst rúmliggjandi.

Á þessari vegferð okkar áttum við margar góðar stundir þrátt fyrir allt. Stundir sem verða ógleymanlegar og munu lifa með okkur um ókomna framtíð. Öll erum við harmi slegin yfir því að missa þig frá okkur langt fyrir aldur fram.

Minningarsíður

Nýleg andlát

Útfarir

Hlaðvarp

Þjónustusíða

Fræðsluefni

Jakobína Anna Karlsdóttir Olsen

Útför

Anna Olsen

Konan mín Jakobína Anna Olsen