Ástkær faðir okkar Ingimundur Eymundsson áður til heimilis í Mosfellsbæ, lést þann 20. desember. Útförin fer fram frá Fossvogskirkju miðvikudaginn 3. janúar kl 15.


Útförin fer fram frá Fossvogskirkju miðvikudaginn 3 janúar 2024.

Ingimundur Eymundsson (Ingi) fæddist 24. ágúst 1935 á Vatnseyri við Patreksfjörð. Hann lést í faðmi barna sinna í Reykjavík þann 20. desember 2023.

Foreldrar hans voru Margrét Jóhannsdóttir, f. 12. mars 1905., d. 30.maí 1988, og Eymundur
Austmann Friðlaugsson, f. 20. júlí 1907, d. 2. júní 1988.
Eldri bræður Inga voru Jóhann Sigurður Eymundsson og Alfreð Eymundsson en þeir eru báðir látnir. Yngsti bróðir Inga er Kristinn Eymundsson f. 13. nóv. 1949.

Ingi og Elínborg (Ella) Guðmundsdóttur (f. 18. október 1935, d. 17. júlí 2022) giftust árið 1957. Þau skildu árið 2014.
Börn þeirra eru: 1) Ellert Austmann, f. 17. ágúst 1957, leikari, giftur Evu Karlsdóttur. Synir þeirra eru: a) Evert Austmann, giftur Helenu Hrund Ingimundardóttur. Synir þeirra eru Maron Logi og Grétar Nóel. Fyrir á Evert soninn Leonard Ben og Helena Hrund dótturina Rebekku. b) Aron Austmann, trúlofaður Arnfríði Ósk Jónsdóttur.

2) Annetta Austmann, f. 15. október 1960, iðjuþjálfi, para- og fjölskyldufræðingur MA og
handleiðari, gift Bjarna Þorsteinssyni. Dætur þeirra eru: a) Birta Austmann, gift Edward
Alexander Eiríkssyni. Synir þeirra eru Sölvi Leó og Elvar Leó. Fyrir á Edward soninn Róbert
Darra. b) Sunna Austmann.

3) Stúlka (Anna), f. 28. ágúst 1965, d. 29. ágúst 1965.

4) Rebekka Austmann, f. 12. júlí 1967, sviðshöfundur, gift Sigurði Guðmundssyni. Fyrir á Sigurður dótturina Aðalborg Birtu, gift Róberti Davíðssyni. Þau eiga börnin Nóa og Rán.

5) Elísabet Austmann, f. 7. nóvember 1968, markaðsfræðingur með MBA, gift Hilmari
Garðari Hjaltasyni. Synir þeirra eru tvíburarnir: a) Dagur Austmann, trúlofaður Birtu Skúladóttur og b) Máni Austmann. Fyrir á Hilmar dótturina Önnu Björk.

Sem ungur drengur flutti Ingi ásamt fjölskyldu sinni til Reykjavíkur þar sem faðir hans hóf störf sem bifvélavirki. Ingi fetaði í fótspor föður síns, lærði bifvélavirkjun og hóf störf hjá Ræsi og síðar öðrum bifreiðaverkstæðum. Ingi var glaðvær og hjálpsamur að eðlisfari og var mjög
farsæll í starfi sem bifvélavirki og síðar sem bifvélavirkjameistari og fékk fljótlega
stjórnunarstörf á þeim verkstæðum sem hann vann á. Samhliða starfi sínu sem bifvélavirki gerðist Ingi kvikmyndasýningamaður í Tónabíó eftir að hafa lært þá iðn. Starfið sem kvikmyndasýningarmaður heillaði Inga sem leiddi kl þess að hann tók við rekstri 
Bíóhallarinnar á Akranesi. Síðar gerðist hann yfirmaður í kvikmyndahúsi sem starfrækt var á svæði bandaríska hersins á Miðnesheiði.
Ingi starfaði um hríð hjá Bifreiðaeftirlitinu og í framhaldi af því stofnaði hann ásamt fleirum
einn fyrsta einkarekna ökuskólann á Íslandi. Síðar tók hann aftur upp þráðinn við að sinna
bílum, þá sem þjónustustjóri hjá Ræsi. Hann starfaði við bifreiðar þar kl hann lét af störfum rúmlega áttræður.

Ingi og Ella hófu búskap hjá foreldrum hennar í Stangarholk í Reykjavík. Síðar fluttu þau í
Kópavog en bjuggu þó lengst af með börnum sínum í Mosfellsbæ þar sem þau byggðu sér
fallegt einbýlishús. 

Helsta áhugamál Inga lengst af var hestamennska. Hann spilaði einnig á
gítar og hafði mikla unun af tónlist og kvikmyndum.

Ingi var ein helsta drifföðurin í Lionsfélaginu í Mosfellsbæ og var meðlimur í félaginu frá
árinu 1978. Á tímabili var hann formaður félagsins og hlaut ýmsar viðurkenningar frá
Lionshreyfingunni fyrir störf sín í þágu félagsins.

[DEFAULT]

Elsku pabbi minn, þá ertu farinn í þína síðustu ferð. Síðustu tvö árin voru búin að vera erfið fyrir þig alveg síðan þú fórst frá Hömrum en nú er bjart fram undan, minn kæri.

Margar minningar koma upp hjá mér verandi frumburðurinn ykkar mömmu og eini strákurinn í systkinahópnum og margar tengjast þær bílum enda vannstu alltaf við bíla og áttir þá marga um ævina.

Oft saknaði maður þess sem krakki að sjá meira af þér en þú varst alltaf í tveimur til þremur vinnum, en elsku pabbi, takk fyrir þær minningar og stundir sem við áttum saman, stundirnar þegar ég fékk að fara með þér í vinnuna þegar þú varst í Tónabíói og þegar þú sást um Bíóhöllina á Akranesi.

Einnig koma upp í hugann ferðir þegar þú keyrðir mig nokkrum sinnum ungan polla í sveit austur í Úthlíð og sóttir síðan þegar fór að hausta.

Takk fyrir hjálpina með bílana í gegnum tíðina og þá sérstaklega að hjálpa mér að skoða og velja bíla þegar bíladellan greip mig um tvítugt og hafðir þú þá sérstaklega gaman af t.d. Pontiacnum GTO, rauða Mustangnum og Challengerinum.

Takk fyrir að sjóða saman fyrsta hjónarúmið okkar Evu á Lindargötunni, það lagði greinilega góðan grunn.

Guð veri með þér elsku pabbi minn og skilaðu ástar- og saknaðarkveðju til afa, ömmu og bræðra þinna.

Ég kveð þig en sakna þín svo sárt, elsku eðaltöffarinn, pabbi minn. Ég kveð þig með þakklæti fyrir gleðina og úrræðasemina sem þú gafst mér og aldrei léstu þig vanta þegar dýrmætustu stundirnar voru hjá mér. Hvort sem þær voru hérlendis eða erlendis, hvort sem það var svo heitt að gleraugun þín hreinlega bráðnuðu í leikhúsinu í Tékklandi eða jakkinn þinn fraus úti á landi í Hollandi þegar þú ferðaðist um ókunnar slóðir til að sjá leikritin mín.

Alltaf samgladdist þú mér og ég fann stolt þitt og gleði. Aldrei varðstu hissa á því hverju ég tók upp á eða tók mér fyrir hendur. „Þetta kemur mér ekkert á óvart,“ sagðir þú, „þú finnur alltaf þínar eigin leiðir.“ Þú hafðir alltaf trú á mér og það veitir mér ómetanlegan styrk til að takast á við verkefni mín.

Þú kallaðir mig opna bók, enda varstu næmur á það hvar ég var stödd hverju sinni, þá þótti þér oft betra að ræða bara bílana og sjá hvort þetta liði ekki hjá.

Þú kenndir mér að vera ekki hrædd, opna bara húddið, skoða og spá og ganga svo í verkið. Greinum vandamálið, finnum lausnina og leysum þetta sem allra fyrst.

Ef ég lenti í vandræðum í vinnu eða verkefnum ráðlagðir þú mér að sýna öllum virðingu og kalla þau svo bara sir og madam, og það losnar um málin, sem reyndist alltaf rétt.

Þú skapaðir okkur fjölskyldunni framúrstefnulegt og fallegt heimili sem þú byggðir af mikilli úrræðasemi og þar sem þú fannst alltaf lausnir. Einnig byggðir þú hesthús sem var partur af okkar daglega lífi saman í nokkra áratugi. Þakka þér fyrir að kynna mig fyrir hestunum og hundunum okkar og njóta þess að vera úti í náttúrunni.

Engan hef ég þekkt sem er eins stundvís og þú varst. Í miklu uppáhaldi hjá mér er setningin: „Ég er hér, hvar ert þú?“ Hún var klassík í okkar samskiptum því tíu eða jafnvel tuttugu mínútum áður en áætlaður hittingur átti að eiga sér stað varstu farinn að bíða eftir mér. Mættur að sækja mig í bíltúrana, sem voru okkar bestu stundir í seinni tíð.

Snar varstu í snúningum og með eindæmum úrræðagóður, handlaginn, greiðvikinn og hjálpsamur.

Takk fyrir að bjóða mér inn í ævintýraheim kvikmyndahúsanna og kvikmyndanna. Takk pabbinn minn fyrir góðu stundirnar, gleðina og hláturinn og fallegasta brosið, minningarnar og gleðina sem við deildum saman.

Því eldri sem ég verð því meira kann ég alltaf að meta hversu lík ég er þér.

Þú ert pabbi minn, ég elska þig pabbi, ég er ávallt stolt af þér, þú ert næst hjarta mínu.

Þín dóttir með ást og virðingu út fyrir þennan heim og yfir í aðra, þín

Í dag kveð ég elsku hjartans pabba minn, Ingimund Eymundsson, sem stóð alltaf svo nærri hjarta mínu.

Hann pabbi minn var einstakur maður, ég minnist hans með miklum söknuði en mikilli hlýju; mannsins sem sá um að vekja mig í skólann alla mína tíð, hlusta á mig ef eitthvað bjátaði á, hjálpa mér á allan þann hátt sem hann gat, hvort sem það var varðandi hestana, bílana mína eða bara færa mér heitt kakó og smákökur í rúmið á jólum öll mín uppvaxtarár.

Pabbi vann alla tíð mikið, ég vandist því að hann væri oft í burtu á daginn og á kvöldin þar sem hann var iðulega í tveimur eða fleiri störfum. En hann og mamma fundu samt alltaf leiðir að því að fjölga samverustundum. Við fórum saman í ísbíltúr, á hestbak og hann tók okkur með í bíó þegar hann starfaði sem sýningarstjóri í hinum ýmsu kvikmyndahúsum. Eftirminnilegast var þegar við fengum að fara með upp á Keflavíkurvöll þegar hann var sýningarstjóri í ameríska bíóinu þar. Og hvað maður var stoltur af pabba þegar hann labbaði þar um, talaði óaðfinnanlega ensku, að mér fannst, kynnti okkur fyrir öllu starfsfólkinu og sá til þess að við fengjum amerískt popp og Coca Cola með bíómyndinni.

Ég vann með pabba mínum þegar hann stofnaði Ökuskóla Íslands ásamt fleiri góðum mönnum. Þar vann ég á skrifstofunni við að undirbúa meiraprófsnámskeiðin og hugsa ég með mikilli hlýju til þess tíma, að hafa fengið að vinna með pabba, kynnast honum í þeim aðstæðum og kynnast þar hans bestu vinum á þeim tíma.

Pabbi var duglegur til vinnu og oft þótti mér nóg um. Þegar hann fór á eftirlaun fór hann og aðstoðaði félaga sinn við að bóna bíla og þegar hann og mamma skildu, þá fór pabbi að keyra rútur. Hann vaknaði eldsnemma til að keyra, kominn á áttræðisaldur, en þá hætti hann. Það var mér mikill léttir þar sem mér fannst erfitt að vita af honum í þessum aðstæðum, á þessum aldri.

Við pabbi vorum náin og spjölluðum oft og eins og hann sagði einu sinni: „Lís mín, á milli okkar er ekkert drama“ sem var svo sannarlega ekki. Ég minnist með mikilli hlýju síðasta ísbíltúrsins sem við fórum síðasta sumar með Rebekku systur og hlógum endalaust að því hvað ísinn var vondur. Ég minnist með mikilli hlýju síðasta afmælisdagsins hans þegar hann varð 88 ára gamall í ágúst sl., þar sem við áttum góða stund með öllum í fjölskyldunni, borðuðum saman kökur, fórum út í göngu og hann fékk sér vindil í tilefni dagsins. Ég minnist með mikilli hlýju og ást samverustundanna sem við áttum uppi á bráðamóttöku og Landspítala í byrjun desember, í íbúðinni hans í Sóltúni eftir að hann kom af spítalanum og við grétum saman yfir ástandi hans. Og síðasta kaffibollans sem við áttum saman þann 18. desember. Þar var hann sjálfum sér líkur, hress miðað við aðstæður og var bara pabbi minn. Hann dó svo 20. desember þar sem ég hélt í hönd hans þegar hann fór.

Ég mun sakna hans pabba míns, þetta verður erfitt en það er ljúfsárt að hann hafi fengið að fara, hann var þreyttur og tilbúinn.

Minningarsíður

Nýleg andlát

Útfarir

Hlaðvarp

Þjónustusíða

Fræðsluefni

Ingimundur Eymundsson

Andlátstilkynning

Útför

Aðstandendur

Til elsku pabba okkar.