Hjartans ljúfi faðir okkar, tengdafaðir, afi og langafi Steinn Ólafsson lést á Heilbrigðistofnun Suðurlands - Vestmannaeyjum 19.desember S.l


Hjartans ljúfi og skemmtilegi faðir okkur  Ingi Steinn Ólafsson sem lést þann 19.desember S.l verður jarðsunginn frá Landakirkju í Vestmannaeyjum 4.desember 2023


Fjölskyldan þakkar hlýjar samúðarkveðjur.
Sérstakar þakkir fær starfsfólk Heilbrigðisstofnun Suðurlands í Vestmannaeyjum fyrir kærleiksríka og fallega ummönnun og vinarhug.

Ingi Steinn Ólafsson fæddist 22. apríl 1942 í Vestmannaeyjum. Hann lést 19.desember 2022 á Heilbrigðisstofnun Suðurlands í Vestmannaeyjum. 

Foreldrar hans voru: Ólafur Guðmundsson Vestmann sjómaður f. 1906 d.1970 og Þorbjörg Guðmundsdóttir húsmóðir f.1905 d.1960.


Hálfsystir Inga Steins sammæðra var Rósa Guðmunda Snorradóttir, f. 1927, d. 2015


Alsystkini Inga Steins eru Theodór Snorri, f. 1933, d. 2020, Sigurveig Þórey, f. 1935, d. 1935, Snorri Sigurvin Vestmann, f. 1938, d. 2022, Ellen Margrét, f. 1943, d. 2022 og Þór Guðlaugur, f. 1947.

Ingi Steinn giftist Guðnýju Stefaníu ( Gauju) 30.apríl 1965 í Vestmannaeyjum, en hún lést þann 8.mars 2022 á Hjúkrunarheimilinu Hraunbúðum í Vestmannaeyjum.

Börn þeirra hjóna eru: 1) Sigfríður Björg f. 1967. Maki Ómar Stéfansson. Dætur þeirra eru, Guðný Ósk, Linda Björg og Erika Ýr. 2). Árni Karl f. 1970. 3) Friðþór Vestmann, f. 1979. Maki Ragnheiður Jónsdóttir f. 1974. Börn þeirra eru Fríða Rún Vestmann og Ingi Steinn. Langafabörnin eru fjögur talsins.

[DEFAULT]

Elsku hjartans faðir og vinur er farinn og söknuðurinn er mikill. Við gamli brölluðum mikið öll árin okkar saman, Brekastígur 3 kemur sterkt inn í minningu mína þar sem mikið var gert og dunduðum við okkar mikið saman að tálga, smíða báta og gera hin ýmsu listaverk.

Pabbi var mikill lista- og hannyrðamaður og ekki má gleyma öllum þessum fallegu vísum sem þú ortir í gegnum tíðina. Vísurnar fjölluðu mikið um lífið, eyjuna þína fögru, náttúruna og barnabörn og barnabarnabörnin.

Ævintýrin sem gamli bjó til eru mér dýrmæt og einnig sögurnar sem þú sagðir svo skemmtilega frá, frá því þú varst á sjó eða í sveit undir Eyjafjöllum og ekki má nú gleyma Kalla sögunum, já um Kalla kanínu sem kætti mikið og mun aldrei gleymast. Oft hugsað af hverju þú gafst þær ekki út.

Kvöldin fyrir svefn sem ungur drengur að hlusta á þig eru mér kær. Kalla sögurnar voru aldrei eins því pabbi lá við hliðina á okkur systkinum og bjó sögurnar með sínu einstaka kærleik og enduðu þær alltaf fallega þrátt fyrir prakkarastrik Kalla.

Margs er að minnast á slíkum tímamótum þegar leiðir skilur og þakka ég fyrir hvern dag og hvern tíma sem við áttum saman sem voru ófáir. Hittingur var á hverjum degi í spjalli og hugleiðingum um hitt og þetta. Já okkur datt ýmislegt í hug, gamli var nú ekki alltaf hrifinn af hugmyndum mínum en eins og þú varst tókstu tillit til hugsana allra. Þannig var pabbi, alltaf tilbúinn að hugsa og rökræða og fá niðurstöðu. Ef okkur tókst það ekki, þá fór ég bara heim og við hittumst daginn eftir að ræða hlutina og fengum yfirleitt bestu niðurstöðu.

Pabbi var mikill sjómaður og verkstjóri góður og sem ungur drengur var pabbi lítið heima, en gaf sér þó alltaf tíma með okkur systkinum. Hann vildi alltaf að öllum liði vel. Pabbi og hjartans mamma sem fór frá okkur í mars sl. voru alltaf samstiga og er gott að hafa það veganesti inn í lífið og þó sérstaklega þegar við erum orðin fullorðnir einstaklingar.

Ég er þakklátur fyrir síðustu mánuði að hafa átt allar þessar stundir og þakka fyrir hversu góður og tryggur vinur þú varst, kvöldunum okkar gleymi ég ekki og síðustu mánuði að koma til þín rétt fyrir háttatíma að kanna hvernig þú værir er mér þakkarvert í dag.

Ég veit að ég sterkari er fyrir vikið

Takk fyrir stuðning og styrk þinn mikla,

sem ganga að hverjum þeim lás sem ég vil.

Takk fyrir allt, elsku pabbi, takk fyrir þína ljúfmennsku alla tíð.

Hjartans elsku pabbi sem var mér ávallt svo góður og vinur mikill, ekki einungis mér heldur tengdasyni sínum honum Ómari.

Það eru ófáar minningarnar sem rifjast upp nú hjá okkur, gleðidagar, sorgardagar, en fyrst og fremst skemmtilegu og kátu dagarnir.

Hvernig getur maður sett í orð lífshlaup okkar saman?

Hjartans pabbi var mér og mörgum öðrum mikil fyrirmynd og vinnuþjarkur mikill, hann var góður faðir, uppfullur af kærleika og mildi. Hann var svo stór maður þrátt fyrir að vera frekar lágvaxinn sem þó truflaði hann aldrei. Stundirnar okkar eru okkur nú dýrmætar.

Vinna var aðalmál pabba eins og sjá mátti alveg fram a síðasta dag, þegar hann var nú í huga sínum enn í vinnu að róa á Sæbjörgunni með bræðrum sínum og einnig með fyrirtækið sem hann átti. Alltaf var nóg að gera og kenndi hann mér mikið með að vera vinnusöm og gefast ekki upp, þó móti blási.

Gullið okkar hann pabbi var einstakur, einstakur að því leyti að hann kenndi manni gæsku, gleði, að rökræða og ekki kyngja endilega því sem lagt var á borð fyrir mann. Hann var einnig mikill listamaður, sögumaður, vísna- og ljóðamaður og hafði unun af hannyrðum og sköpun þrátt fyrir alla vinnuna sem hann vann í gegnum árin. Þrátt fyrir mikla vinnu þá gafstu mér, Ómari og börnunum mínum og barnabörnum mínum ómælda ást, gleði og má segja að á mörgum stundum varstu hreinlega skemmtikraftur.

Maður var stundum í varnarstöðu hverju pabbi myndi nú taka upp á, því sprellið var honum svo eðlislægt sama í hvaða umhverfi hann var, ég tel það vera vegna þess að hann var alltaf hann sjálfur sem er mikill og góður kostur, sem við mörg ættum að hafa í huga. Já, hann kom alltaf fram nákvæmlega eins og hann var klæddur.

Pabba þótti undurvænt um fólkið sitt og kom til okkar Ómars í Málmey næstum hvern dag, stoppið var ekki alltaf langt, en það að hitta okkur og fólkið sitt var honum mikilvægt.

Hann saknaði elsku hjartans mömmu mikið þegar hún fór frá okkur í mars sl. og talaði hann oft og mikið um hana enda búin að vera gift í rúm 50 ár. Við söknum hennar öll og söknum þín, elsku hjartans pabbi, en trúum líka um leið að þér líði vel og sért án þrauta og verkja líkt og þú varst síðastliðin ár vegna slits í líkamanum af allri vinnunni þinni í gegnum árin.

Við kveðjum þig með miklum söknuði og kærleik, og þökkum fyrir allt það góða. Megi það góða umvefja ykkur, elsku englar, með kærum þökkum fyrir allt og allt.

Hvernig byrjar maður á að skrifa um mann sem gaf manni mikið með sinni einlægni og gleði? Nú ertu með mömmu, sem þú saknaðir.

Elsku hjartans pabbi var maður sem gaf af sér til allra sem vildu, hörkuduglegur í öllu sem hann tók sér fyrir hendur og voru vinnudagar hans hér áður fyrr miklir og langir. Pabbi byrjaði ungur á sjó, 15-16 ára.

Nokkru seinna var hann kominn á sjó með bræðrum sínum og mági og mótaði það hann mikið þegar sjóslysin á bátnum Sæbjörg VE 56 urðu, en sem betur fer björguðust allir í þeim sjóslysum. Elsku pabbi ræddi oft og mikið um slysið sem varð við Hornsvík skammt austur af Stokksnesi og önnur sjóslys, en það slys tók alla tíð á hann þrátt fyrir giftusamlega björgun.

Nú þegar ég dreg upp minningar kemur upp hversu mikill karakter pabbi var, mildi hans og glaðværð þrátt fyrir allt, Hann missti móður sína ungur drengur og þurfti að takast á við lífið fljótt og örugglega og hélt alltaf ótrauður áfram. Pabbi bjó með föður sínum á Boðaslóð 3 fyrstu árin.

Sögurnar hans pabba voru margar, ein er mér þó afar eftirminnileg þegar hann hafði ásamt öðrum peyjum í Eyjum skorið á böndin á snúrustaur hjá konu á Boðaslóðinni, rétt hjá heimili hans, og náði pabbi rétt að hlaupa frá, en sú gamla kallaði í æsingi sínum: „Þú þarna Steini Ingi, sonur hans Vestmanns Ólafs, snúruskerari og glæparokkur, ég mun ná í þig einn daginn og flengja!“ Pabba þótti þessi setning alltaf skemmtileg enda hafði sú gamla snúið öllum nöfnum við í æsingi sínum.

Pabbi var hannyrðamaður mikill og eru til ótal mörg falleg verk eftir hann sem munu nú ylja okkur eins og fyrr og voru það aðallega útsaumaðar myndir sem eru algjör listaverk og púðarnir, svo fínn var saumurinn hjá honum þrátt fyrir grófar hendur og taldi hann út hvert spor og teiknaði upp. Ekki má gleyma öllum ljóðunum hans og vísum sem er mikill fjársjóður fyrir okkur systkinin og Eyjamenn.

Eitt ljóð og vísa sem er nú opinber heitir „Ennþá brenna augun mín“ sem hann orti sem þjóðhátíðarlag en náði því miður ekki atkvæðum um árið, þar munaði tveimur atkvæðum. Hann var mikið stoltur af þessum texta og átti Henry Ágúst Aberg Erlendsson plötusmiður og hljómsveitarmaður í Logum frá Eyjum lagið við textann hans pabba. Það var afar hlýtt á milli þeirra í gegnum árin og brallað mikið með texta og lög.

Seinni árin hans man ég varla eftir pabba nema með bók í hendi og svo var sagt frá hinu og þessu sem var í bókunum sem honum þótti spennandi og áhugavert, það var alltaf gaman að hlusta og finna hvað honum þótti vænt um bækur og sögu fólks. Honum fannst margt áhugavert hvað bókmenntir varðar, en fólk og saga þess fannst honum spennandi ásamt því að lesa um hin ýmsu lönd og atburði í lífi margra.

Farinn er góður faðir, ákveðinn, stríðinn og skemmtilegur, og þakka ég allar góðu stundirnar okkar, hjartans pabbi.

Megi ljósið lýsa ykkur mömmu og öllum englunum sem fóru frá okkur þetta árið, far þú í friði, friður guðs þig geymi.

Í dag 4.janúar 2023 kveðjum við elsku tengdapabba með miklum söknuði, hann var mikill húmoristi og alltaf tilbúinn í sprell. Ég kynntist þér árið 1999 þegar við Friðþór þinn byrjuðum saman, það varð strax mikill vinskapur á milli okkar sem varði alla tíð og heyrðumst við nánast daglega í síma fram að veikindum þínum. Það voru ófáar stundirnar sem við eyddum í spjall og hlátur, þegar þú heimsóttir okkur í Reyrengið.

Mér eru minnisstæðar allar læknisheimsóknirnar okkar saman, þar sem ég fékk að vera eyrun þín svo þú vissir nú örugglega hvað læknarnir voru að segja, þú kvartaðir oft yfir því hvað þeir töluðu lágt. Þessar heimsóknir enduðu iðulega með kaffihúsaferð og spjalli á eftir sem við nutum saman.

Ferðin okkar í Fly over Iceland í tilefni 80 ára afmælis þíns sem við fórum í í sumar stendur einnig upp úr, þar sem starfsfólkið stjanaði við þig eins og þú værir konungborinn og þú naust sýningarinnar í botn og hafðir á orði að þetta hafi verið frábær upplifun, enda heyrðust gleðiópin í þér langa leið meðan á sýningunni stóð. Ég gæti talið endalaust upp alla skemmtilegu samveruna okkar í gegnum árin en það er líka gott að ylja sér við minningarnar sem við áttum saman.

Ég er ekki að ýkja ef ég segi að þú hafir án efa verið einn af skemmtilegri öfum sem Ísland hefur alið, þú varst alltaf til í sprell og bras með afa- og langafabörnunum og eiga þau ófáar minningar þar sem þú ert að brasa eitthvað með þeim. Þú varst duglegur að fræða og leggja þeim línurnar og veit ég að þau munu hafa orð þín í huga þegar þau fara í gegnum lífið.

Elsku besti tengdapabbi, ég datt í lukkupottinn þegar ég kynntist Friðþóri þínum og ykkur hjónum, þú varst mér alltaf svo góður og áttum við einstakt samband.

Þú varst stjarna sem skein svo skært á jörðu að allir tóku eftir, en ég hef trú á því að þú munir skína enn skærar á himnum.

Takk fyrir allt, þín er sárt saknað en við yljum okkur við minningar um einstakan mann.

Minningarsíður

Nýleg andlát

Útfarir

Hlaðvarp

Þjónustusíða

Fræðsluefni

Ingi Steinn Ólafsson

Andlátstilkynning

Útför

Aðstandendur

Þakkir

Hjartans pabbi

Ástkær faðir

Hannyrðamaðurinn hann pabbi

Hann ver einstakur tengdapabbi