Höskuldur Guðmundsson matsveinn lést á heimili sínu Hulduhlíð Eskifirði 26. ágúst 2026.


Minningarathöfn fer fram í Norðfjarðarkirkju fimmtudaginn 3. september klukkan 14:00.
Útför fer fram í Fossvogskirkju mánudaginn 7. september klukkan 13:00.

Aðstandendur vilja koma fram kæru þakklæti til starfsfólks Hulduhlíðar Eskifirði fyrir frábæra umönnun. 

[DEFAULT]

Við vorum bestu vinkonur, það sagðir þú alltaf. Við áttum svo einstakt samband elsku afi minn. Síðastliðna viku hafa mér borist samúðarkveðjur og skilaboð frá mínum nánustu og það sem mér hefur fundist dýrmætast er að allir nefna það hversu mikil afastelpa ég er og hversu fallegt sambandið okkar var.

Ég lít til baka á allar dýrmætu minningarnar okkar þegar ég finn fyrir söknuði. 

Í hvert skipti sem ég kom til ykkar ömmu í Breiðuvíkina voru alls kyns kræsingar í boði. Hvort sem það var heimagerður ís, frómas(sem ég kunni aldrei nógu vel að meta), pönnukökur, brúnuðu kartöflurnar eða heimsfræga niðurkakan þín. Ég kom aldrei svöng úr heimsókn hjá ömmu og afa. Þrátt fyrir allar þessar dýrindis kræsingar þá tókst mér samt alltaf að plata þig í eitthvað annað. ,,Æj afi má ég fá KFC’’ ,,Já ástin mín’’, ,,æj afi viltu fara út í sjoppu’’ og þú varst rokinn út. Þú settir mig alltaf í prinsessusætið. Þú gistir inní gestaherbergi svo ég gæti fengið rúmið þitt, skutlaðir mér ef ég þurfti að komast einhvert og reyndir meira að segja að læra á krullujárnið þegar ég bara VARÐ að hafa krullur í veislu. 

Ég varð eldri og sambandið okkar hélt bara áfram að styrkjast. Við fórum tvö saman á ættarmót þegar ég var orðin 15 ára, stuttu eftir að amma dó og ég bara skildi ekki hvað ég þurfti að slást við allar kerlingarnar um dans við þig. Afi kvennagull, það varstu svo sannarlega. Þarna sá ég að það var ekki bara ég sem sá ekki sólina fyrir þér heldur voru allir sem þú umgengist heillaðir af þér. Ég sá það síðan enn betur þegar þú fluttir austur til okkar og heilt samfélag heillaðist af þér. Hver flytur bara á hinn enda landsins um áttrætt og kynnist heilu bæjarfélagi. 

Eignast vini, gerir prakkarastrik og blómstrar á ný.

 Árin liðu enn og kom að því að þau tóku af þér bílprófið. Þú breyttir fljótt í spaða og splæstir í ‘’gamlingavænt’’ tryllitæki, hana Helgu. Ég fékk þann heiður að kaupa af þér glæsikerruna þína, bláu þrumuna, á heila 1 krónu. Bíllinn var ekki beint í tísku en hann kom mér frá A til Ö. Ég keyrði um stolt á ljósbláa, beyglaða(allan hringinn) kagganum með bensínlokið teipað á. Vinkonur mínar vildu sko alls ekki koma með mér á rúntinn því rúðurnar voru ónothæfar og brunablettirnir í sætunum héldu með sér reykingalykt frá seinustu öld en mér var sama. Þetta var svo bíllinn hans afa sem hann treysti mér fyrir að klára fyrir sig. Og það gerði ég.

Mér leið alltaf eins og fegurðardrottningu þegar við hittumst. Þú ljómaðir við það að sjá mig og hrósaðir mér út í eitt. ,,Þú ert svo glæsileg alltaf’’ sagðir þú og ég svaraði alltaf ,,enda er ég með þín gen’’ og þú hlóst. Þú lést mig alltaf vita hversu stoltur af mér þú varst og meira að segja í eitt skipti þegar þú dast út og þekktir mig ekki þá blikkaðiru mig, bentir á pabba og sagðir mér að dóttir hans væri sko flugmaður.   Ég gaf þér loforð í 90 ára afmælinu þínu að þú fengir þann heiður að verða fyrsti farþeginn minn þegar flugnámi mínu væri lokið. Því miður varð aldrei að fluginu okkar þar sem heilsan þín var ekki nógu góð þegar ég kláraði loksins. Það sat alltaf svo í mér að þú hafir ekki komist í flugið og ég varð oft fúl útí sjálfa mig yfir því að hafa ekki klárað nógu snemma. En þú sást til þess að við færum saman í flug. Þitt hinsta flug.  Ég var fyrir tilviljun sett á flug til Egilsstaða miðvikudagsmorgun 2. september. Viku eftir að þú kvaddir okkur. Flug sem var ekki á áætlun hjá mér. Ég hef unnið sem flugfreyja í ótal flugum frá Egilsstöðum en þetta mun alltaf standa uppúr. 

Kvöldinu áður tilkynnir mamma mér að þú yrðir sendur með flugi suður. Flugið sem varð fyrir valinu var FI61. Ég lít á mína skrá og sé að það er flugið sem ég var nýbúin að taka að mér. Þetta var erfiðasti en á sama tíma fallegasti vinnudagurinn minn. 

Að fá að fylgja þér heim. Augnablik sem ég hefði ekki viljað sleppa. Ég kom þér frá austurlandinu þínu, aftur heim til ömmu þar sem þú getur nú hvílt þig með henni.

Ég mun sakna þess að spila kasínu við þig. Brosið þitt og húmorinn. Ég mun sakna þess að þú segir mér að þegja þegar ég hnerra eða að hætta að skipta mér að þegar ég spyr þig frétta. Sakna krókaleiðana sem þú tókst fyrir eina sígó og hvernig þú blekktir mig í að kaupa eldspýtur fyrir þig í laumi, en í öllum þessum söknuði mun ég samt brosa af þakklæti yfir að hafa þessar minningar til að sakna og að hafa átt mann eins og þig sem afa. 

Minningarsíður

Nýleg andlát

Útfarir

Hlaðvarp

Þjónustusíða

Fræðsluefni

Höskuldur Guðmundsson

Andlátstilkynning

Útför

Aðstandendur

Þakkir

Góða ferð afi