Ástkær móðir, tengdamóðir amma og langamma lést á heimili sínu þann 22 ágúst
Jarðarförin fer fram á Akureyrarkirkju 5 september kl 13
Börn, tengdabörn ömmu og langömmubörn

[DEFAULT]

Elsku mamma, síðan þú kvaddir okkur streyma minningarnar um þig í huga minn. Þú fékkst vindinn í fangið strax við fæðingu en móðir þín var með berkla og fékk aldrei að halda á þér. Fleiri áföll og erfiðleikar áttu eftir að fylgja bæði í æsku og síðar á ævinni.  

But this time Lord you gave me a mountain 

It isn´t just a hill any longer You gave me a mountain this time  (sungið af Elvis)

Frá fæðingu var lítið öryggi í lífi þínu og þú áttir eftir að flakka mikið.  Margir hefðu brotnað  en það gerðir þú ekki. Þú varst bjartsýn, dugleg, úrræðagóð og þrjósk og hélst áfram að klífa fjallið. Helsta festan í æsku þinni var Bragi bróðir þinn og var mikil vinátta milli ykkar. Einnig bast þú traustum vináttuböndum við frændsystkini þín í Hvassafelli. Þú fékkst litla menntun og öryggisleysið og flakkið gerðu það að verkum að þú varst einskonar villibarn, í jákvæðri merkingu þess orðs, eins og þú orðaðir það við mig.Nú heyri ég þig segja „svona nú, við tölum ekki meira um það“. Þú vildir aldrei dvelja við það erfiða og ég tek það eftir þér. Ég man ekki eftir miklum erfiðleikum fyrstu 7-8 ár ævi minnar í Grænugötu 8. Þar bjóstu með okkur fjögur systkinin undir súð í litlu 2ja herbergja íbúðinni. Þú settir það ekki fyrir þig að klöngrast með Maju og Agga í barnavagni upp alla stigana eða að baða okkur í bala því hvorki var sturta né baðkar í íbúðinni. Þú varst óþreytandi; varst í 2-3 störfum, hugsaðir um börnin þín, hjálpaðir öllum sem áttu erfitt, varst einsmanns prjónaverksmiðja og heimili okkar var fullt af gestum. Hjá þér fannst mér mig ekki skorta neitt, líf mitt var Grænagatan, Eiðsvöllurinn, afi og amma í Eyrarvegi, fótboltinn, allir vinirnir á Eyrinni, systkinin og þú. Í minningunni er þetta gullaldartími, þú svo glæsileg og skemmtileg kona sem allir hrifust af. Þú last ekki sænskar uppeldisbækur en gafst okkur frekar lausan tauminn. Þú hugsaðir vel um ungana þína, sýndir okkur ástúð og veittir okkur öruggt skjól. Við gátum verið ósátt með hvort annað en ég man aldrei eftir að þú hafir skammað mig. Þér tókst að halda fjölskyldunni saman í gegnum brimganginn. Fyrir það veit ég að þú átt eftir að fá bæði bjartsýnisverðlaun Bröste og Fálkaorðuna þó síðar verði, ég krossa fingur fyrir því til öryggis.Elsku mamma, ég á eftir að sakna heimsóknanna til þín. Það var alltaf stutt í kímnina hjá þér og mikið hlegið. Við setjumst nú niður með kaffi og setjum Elvis á fóninn, það lag sem minnir á þig er „You gave me a mountain“. Ég er þakklátur fyrir þann tíma sem ég fékk með þér og mun ávallt muna eftir öllum góðu stundunum sem við áttum saman. Hvíl í friði, þinn sonur Einar (EP)

Minningarsíður

Nýleg andlát

Útfarir

Hlaðvarp

Þjónustusíða

Fræðsluefni

Hólmfríður Júlía Pálmadóttir

Andlátstilkynning

Útför

Mamma

Kveðja