Fylgja minningarsíðu
Helgi Hallgrímsson
Fylgja minningarsíðu
22. febrúar 1933 - 8. október 2020
Útför
Útför hefur farið fram.
Minningarorð flutt við útför í Fossvogskirkju
Þremur dögum áður en pabbi dó sat ég hjá honum á líknardeildinni á sólríkum degi þegar hann sneri sér allt í einu á hliðina í rúminu, með erfiðismunum, og bað mig að klóra sér á bakinu. Ég gerði það auðvitað og hann andvarpaði af létti, en mér fannst þetta samt hálf skringilegt og leið undarlega, því það rann upp fyrir mér að pabbi minn hafði aldrei beðið mig að gera neitt fyrir sig þar til þarna, þar sem hann lá banaleguna.
Bæta við leslista
Minningargrein birt á Facebook - Hallgrímur Helgason
Pabbi er dáinn. Hann fór fallega á fögrum degi, fallegur sem hann var. Helgi Hallgrímsson, fyrrum vegamálastjóri. Við kynntumst honum enn betur á síðustu dögunum, sú reynsla var dýrmæt, gráturinn góður, dauðinn dýpkar lífið. Hann greindist með krabba fyrir ári, var tekinn af lyfjunum í ágúst og dó 8. október. Það var ótrúlegt að sjá þennan brúarstólpa bogna fyrir því ósýnilega Skeiðarárhlaupi sem sjúkdómurinn var. Allt í einu var pabbi komin með staf, svo göngugrind, loks á dánarbeð. Eins og stálbitinn á Sandinum.
Bæta við leslista
Helgi frændi
Helgi frændi var mér nánast frá fæðingu eins konar aukapabbi, samgangur fjölskyldna okkar var það mikill alveg frá upphafi, og alltaf kallaði Siggi Valur bróðir hann Helga pabba. Saman fórum við um hverja helgi á skíði í Hamragil þar sem Helgi Hall var lykilmaður í að reisa lyftu; á skíðamótum var Helgi gjarnan ræsir og síðar markstjóri, best treyst fyrir tölunum, í skíðagallanum þar sem teipum fjölgaði með árunum, því lítill sundurgerðarmaður var frændi, en aftur á móti maður teipsins; við fórum vikulega í fótbolta á vetrum og þar var Helgi alltaf aftasti maður, í mestu ábyrgðarstöðunni í samræmi við sinn karakter; og svo oft í útilegur þar sem Helgi naut sín vel í gleði, söngmaður góður, og ekki síst í Stóra-Langadal og á leiðinni stoppaði Helgi, samviskusami brúarverkfræðingurinn, við hverja brú og fór undir hana.
Bæta við leslista