Yndislega Hekla okkar lést í faðmi fjölskyldunnar á krabbameinsdeild Landspítalans aðfararnótt þriðjudagsins 12. nóvember 2024.
Ljúf var samfylgdin og minningar ylja. 


Útför Heklu fer fram í Hallgrímskirkju þann 26. nóvember klukkan 13:00. Öll velkomin.

Fjölskylda Heklu þakkar innilega öllum þeim sem gerðu líf þeirra léttara undanfarnar vikur með samhug og yndisleguheitum sem og starfsfólki Landspítalans. Það var mikils virði. 

Hekla fæddist í Reykjavík 2. júní 2003. Hún lést á krabbameinsdeild Landspítalans í Reykjavík 12. nóvember 2024. Foreldrar Heklu eru Hrafnhildur Brynjólfsdóttir frá Hvammstanga f. 5.6.1970 og Hrafn Margeirsson frá Mælifellsá f. 13.12.1966. 

Eldri systir Heklu er Eldey, f. 2000 og tvíburasystir Heklu er Katla, f. 2003. Bræður Heklu samfeðra eru Örn f. 1992 og Margeir f. 1994. Kona Arnar er Natalia Pelipets, og sonur þeirra Örvar f. 2023. Kona Margeirs er Ásdís Másdóttir og sonur þeirra Þórhallur f.2024. Móðir Arnar og Margeirs var Þórhalla Arnardóttir f. 1962, d. 2022.  

Hekla fæddist í Reykjavík og bjó í Laugardalnum í Efstasundi 79 alla tíð. Laugardalurinn var hennar þorp. Inga dagmamma bjó í næstu götu, hún fór í leikskólann Brákarborg. Hekla gékk í Langholtsskóla þar sem hún eignaðist kærar vinkonur. Hún labbaði í Rangá, Álfheimabúðina, ísbúðina og bakaríið. Allt sem hugurinn girntist var í Skeifunni og heima drullumallaði hún með systrum sínum og vinkonum í búinu í garðinum og sveiflaði sér öruggum höndum í kaðli í tré. Ung fór hún að æfa frjálsar með ÍR en færði sig svo yfir í blakið hjá Þrótti með systrum sínum. Hekla spilaði í gegnum alla yngri flokkana með Þrótti, svo var hún leikmaður meistararflokks í nokkur ár þrátt fyrir ungan aldur. Hún var einnig valin til að spila fyrir unglingalandslið Íslands. Síðustu ár hefur Hekla spilað með neðri deildar liðum Þróttar ásamt systrum sínum og tekið þátt í Íslandsmótum. Hekla var alla tíð viðloðandi við blakdeildina og þegar hún var ekki að spila þá mætti hún sem stuðningsmaður eða var sjálfboðaliði með systrum sínum og móður. Hekla var stúdent frá Menntaskólanum í Hamrahlíð og stundaði nám í mannfræði við Háskóla Íslands.

[DEFAULT]

Það er svo óraunverulegt og ósanngjarnt að þurfa kveðja þig svo snemma. Ég man ekki eftir lífinu öðruvísi en með þér enda höfum við verið samferða síðan þú fæddist og átt óteljandi góðar stundir saman.

Ég er gríðarlega þakklát fyrir allan tímann sem ég fékk að eiga með þér, allar minningarnar sem við sköpuðum og hvað við frænkurnar vorum duglegar að finna tíma til þess að bralla eitthvað skemmtilegt saman. Sumrin hjá ömmu og afa á Hvammstanga, drullumall og eina króna úti í garði, lesa syrpur og teiknimyndasögur saman í Sveitinni, sundferðirnar, tala um og horfa á Merlin saman, helgarnar sem ég fékk að koma til ykkar að leika og jafnvel gista, Þorláksmessurnar í Efstasundinu, Eurovision partýin, útilegur og veiðiferðir, ævintýri í Sveitinni, piparkökubakstur fyrir jólin, Eldurinn, spilakvöldin, Parísarferðin og helgarferðirnar út á land síðustu ár eða húsmæðraorlofin okkar eins og þær voru kallaðar einu sinni. Það má með sanni segja að nánast allar mínar bestu minningar séu með þér.

Þú varst einstaklega falleg sál sem lýstir upp lífið og tilveruna. Þú varst líka með sterkan karakter, vissir hvað þú vildir og óhrædd við að standa með sjálfri þér. Þú varst grallari og það er búið að vera gaman að fara yfir gamlar myndir úr æskunni og sjá prakkarasvipinn á þér dúkka reglulega upp. Ég mun sakna þess að sjá svipinn og heyra þig segja „tíhí“ sem gjarnan fylgdi með. Þú varst alltaf skvísa og með mikið tískuvit, fylgdist með nýjustu straumum og ég vissi að ég gæti alltaf horft til þín í þeim efnum og lært af þér. Þú varst dugleg, hjartahlý, góð og fyndin, við áttum aldrei dauða stund saman. Þú varst dugleg að segja hlutina hreint út en á góðan hátt. Þegar við unnum saman og ég var verkstjórinn þinn þá gafstu mér engan afslátt, varst dugleg að minna mig á pásur, togaðir mig niður á jörðina ef ég var með of háleit plön og bentir mér á hluti sem mætti gera betur. Þú kunnir svo sannarlega að lifa og njóta lífsins og varst dugleg að minna mig á það síðustu ár og spyrja mig krefjandi spurninga, þú gafst aldrei neinn afslátt. Ég kann mikið að meta það og það var mjög gott og dýrmætt að hafa einhvern sem tók þetta hlutverk að sér. Við gátum rætt um allt okkar á milli og ég mun sakna þess mikið að eiga samræður með þér um allt og ekkert.

Ég hafði oft hugsað til þess í sumar áður en þú greindist með krabbameinið hvað það væri dásamlegt að fylgjast með þér í blóma lífsins, þú kunnir vel við þig í mannfræðinni, ánægð með sumarvinnuna, áttir góða vini og fjölskyldu, naust þess í botn að vera stóra frænka og hafðir fundið ástina hjá honum Sindra þínum.

Það verður skrítið að fara í gegnum lífið án þín en frá tímanum okkar saman sitja eftir endalaust margar dásamlegar stundir og minningar. Það er mín mesta lífsins lukka að hafa átt þig sem frænku því þú og þið systurnar hafið verið mér svo miklu, miklu meira en bara frænkur. Ég hlakka til að hitta þig aftur elsku Hekla og eiga fleiri góðar stundir saman.

Minningarsíður

Nýleg andlát

Útfarir

Hlaðvarp

Þjónustusíða

Fræðsluefni

Hekla Hrafnsdóttir

Andlátstilkynning

Útför

Aðstandendur

Þakkir

Kveðja til Heklu frænku