Elsku móðir okkar, tengdamóðir og amma 
Halldóra Ágústsdóttir 
Frá Laugum í Sælingsdal 
verslunarstjóri
lést þriðjudaginn 14. des. 
Útför fer fram í kyrrþey að ósk hinnar látnu.

[DEFAULT]

Í dag kveðjum við Halldóru Ágústsdóttur, hana Ömmu Höddu - í Laugarneskirkju.  

Við Amma Hadda vorum svo lánsamar að eignast sameiginleg barnabörn eftir að sonur minn, Ragnar og dóttir hennar, Lára rugluðu saman reitum og börnin þeirra þrjú, Rut, Valtýr Svanur og Úlfar Örn eru því barnabörnin okkar....  en barnabörn hennar eru fleiri, Kristján sonur hennar á 2 börn og 3 stjúpsyni. Við deildum þvi eðlilega mörgum glöðum stundum á þeim rúmu 35 árum sem liðin eru, á jólum og öðrum  hátíðisdögum, auk allskonar fjölskylduuppákomum og tíminn hefur liðið svo ótrúlega hratt. Alltaf kölluðum við hana Ömmu Höddu, það gerði Sigga Rósa dóttir mín líka og sonur hennar, Hallgrímur, heilsaði henni og lagði áherslu á hvert orð,  „Amma Hadda Sigríður.“  Alltaf var hún Amma Hadda okkar allra,  hún sem lifði fyrst og fremst fyrir börnin sín og barnabörnin öll,  þau voru henni allt. Hún fylgdist með þeim og öllum þeirra athöfnum af einlægum  áhuga og ást.

Ég get ekki rakið ætt Höddu, um það eru aðrir færari, en hún var fædd á Hafurstöðum í Staðarfellssókn í Dal og uppalin að Laugum í Sælingsdal þar sem foreldrar hennar bjuggu í gamla Sælingsdalsbænum.   Foreldrar hennar voru Ágúst Júlíusson kennari og Lára Jóhannsdóttir húsmóðir kona hans.  Þar leið fjölskyldunni vel og áttu Hadda og systkyni hennar þar góð ár.  Við gátum deilt ótal minningum um uppvöxt okkar, báðar aldar upp í sveit á fyrri hluta síðustu aldar við hefðbundin sveitastörf sem í öllum sveitum voru þau sömu eða svipuð, heyskapurinn, mjaltirnar, og jafnvel sveitaböllin, en eitt hafði hún og upplifði  en ekki ég:  „Hún,  systkyni hennar og sveitungar dönsuðu á sumrin í sundlauginni á Laugum“  Vatninu var einfaldlega hleypt úr lauginni og þar með var fengið fínasta dansgólf. Þetta fyrirfannst ekki í minni sveit.

Hadda eignaðist 4 börn, þau Ágúst, Láru, Kristján og Rut sem dó á barnsaldri, það var Höddu og þeim systkynum öllum þungt áfall. Ekkert er þungbærara en að missa barn.  

Hún ól ein upp sín börn, vann í Verðlistanum áratugum saman. Þar var hún ómissandi. Hún fór í verslunarferðir út á land, í innkaupaferðir til útlanda, hún var verslunarstjóri (í það minnsta í afleysingum)  hún var alltaf til staðar, ég held hún hafi líka skúrað búðina, allavega stundum.

Börnin voru dugleg og hjálpuðust að. Lára passaði Kristján sem fljótlega varð stærri og sterkari en hún þó nokkur ár skyldu þau að, hún sótti hann  í leikskólann og passaði hann þangað til mamma kom heim.  Þau áttu líka öll góðan hauk í horni, hana Lóu, systur Höddu, Gunnar  og þeirra fjölskyldu  á Karfavoginum, það var ómetanlegt.   Hadda bjó myndarlega hvar sem hún kom sér fyrir, en ekki hefur alltaf verið auðveld baráttan á Reykvískum leigumarkaði get ég ímyndað mér.  Um svipað leiti og við tengdumst fjölskylduböndum keypti hún svo góða íbúð í Seljahverfinu og þar leið henni vel.  

Einhvern vegin var það svo að Hadda fann ekki alveg sína fjöl þegar kom að verklokum og hún hefði átt að njóta efri áranna, frí og frjáls, hvíla sig og njóta.  Hún kunni ekki vel við að vera ein, fara ekki í vinnuna, hitta ekki vinnufélagana.  En víst átti hún líka góðar stundir, allrabest var auðvitað þegar börnin og tengdabörnin komu í heimsókn sem þau gerðu sannarlega oft.

Fyrir nokkrum árum seldi Hadda íbúð sína og flutti til Kristjáns sonar síns og fjölskyldu og deildi með þeim húsnæði.  Þau reyndust henni vel og reyndu sem best að létta henni lífið, en heilsuleysi hennar fór hratt vaxandi, læknaheimsóknir og spítalalegur voru tíðar og erfiður tími fór í hönd . Svo kom, að hún fékk pláss á hjúkrunarheimili við Sléttuveg þar sem vel fór um hana og vel var um hana hugsað á allan hátt. Því miður átti ég þess ekki kost að hitta hana þar, allar heimsóknir hafa verið bannaðar eins og við öll vitum og - nú er hún farin. Hún andaðist þann 14. desember síðastliðinn, södd lífdaga. 

Ég kveð Ömmu Höddu með söknuði og kærum þökkum fyrir allt og allt. Elsku Lára mín og Raggi, Rut, Valli og Úlfar - Ágúst, Kristján og aðstandendur allir,  innileg samúð. 

Ég skal vanda mig við að líta eftir gimsteinunum okkar Hadda mín !             

Minningarsíður

Nýleg andlát

Útfarir

Hlaðvarp

Þjónustusíða

Fræðsluefni

Halldóra Ágústsdóttir

Andlátstilkynning

Útför

Aðstandendur

Halldóra Ágústsdóttir