Halla Guðný fæddist á Jörfa í Kolbeinsstaðahreppi, Hnappadalssýslu, 11. júlí 1928. Hún lést eftir stutta sjúkdómslegu 30. maí síðastliðinn á Landspítalanum við Hringbraut.

Foreldrar hennar voru hjónin Anna Jónsdóttir frá Kaldárbakka, f. 1904, d. 1999, og Erlendur Ólafsson frá Jörfa, f. 1897, d. 1994. Systkini Höllu eru Ólafur, f. 1926, d. 2005. Pétur Ágúst, f. 1929, og Agatha Heiður, f. 1933, d. 2015.

Halla fluttist til Reykjavíkur með fjölskyldu sinni haustið 1935 og bjó þar alla tíð eftir það, lengst af á Laufásvegi 50 eða frá árinu 1952.

Hinn 19. október 1958 giftist hún Trausta Kristinssyni bifreiðastjóra, f. 1921, d. 2012. Foreldrar Trausta voru hjónin Margrét Magnúsdóttir, f. 1883, d. 1961, og Kristinn Steinar Jónsson, f. 1889, d. 1965.

Halla eignaðist fimm börn; Önnu Erlu, f. 1948, sem hún átti áður en hún hóf búskap með Trausta og hann átti eina dóttur, Málhildi, f. 1942, frá fyrra hjónabandi en saman áttu þau Margréti, f. 1956, Hjördísi Steinu, f. 1958, Erlend, f. 1960, og Þórð Ólaf, f. 1962. Barnabörnin eru orðin 14 og barnabarnabörnin 21.

Halla starfaði fyrir hjónaband í Félagsprentsmiðjunni í um 10 ár. Með barnauppeldi saumaði hún og prjónaði flíkur á fjölskyldu, vini og vandamenn og prjónaði lengi lopapeysur fyrir Álafoss og Handprjónasambandið. Hún var virk í starfi aldraðra í Hallgrímskirkju hin síðari ár sér til mikillar ánægju.

Útför Höllu fer fram frá Hallgrímskirkju í dag, 11. júní 2018, og hefst klukkan 13.

[DEFAULT]

Minningar mínar um þig eru margar og mér mjög dýrmætar. Það var alltaf í miklu uppáhaldi hjá mér þegar ég kom til Reykjavíkur að fara til ykkar afa og þegar ég fékk að gista þá fór ég ekki að sofa fyrr en þú varst búin að fara með bæn fyrir mig. Ég man hvað þú áttir mikið af fallegum slæðum og skartgripum sem ég og frænkur mínar fengum að leika okkur með. Þú varst alltaf svo fín og smekkleg kona. Ég er svo heppin að eiga fallegar flíkur sem þú prjónaðir á mig og mikið komu sér vel allir ullarsokkarnir sem þú prjónaðir handa mér þegar ég var að byrja í fiskvinnu. Ég mun sakna þess að sitja ekki með í eldhúsinu á Laufásveginum að spjalla um lífið og tilveruna, með ristað brauð með bönunum og mjólkurglas við hönd, sakna kótelettuveislnanna sem þú bauðst í en mest mun ég sakna hlýju faðmlaganna sem ég fékk alltaf þegar ég kom í heimsókn. Takk fyrir allt, elsku amma Halla.

Minningarsíður

Nýleg andlát

Útfarir

Hlaðvarp

Þjónustusíða

Fræðsluefni

Halla Guðný Erlendsdóttir

Útför

Elsku fallega amma mín