Hákon Jónsson er fæddur 6. ágúst 1918 í Víðum í Reykjadal í Suður-Þingeyjarsýslu. Foreldrar hans voru Jón Sigurgeirsson búfræðingur og bóndi í Víðum og á Brettingsstöðum í Laxárdal og kona hans; Guðrún Erlendsdóttir. 

Systir Hákonar, sammæðra, er Sigríður Stefánsdóttir f. 06.08.1900 - d. 23.12.1974 giftist Sigfúsi A. Sigurhjartarsyni f. 06.02.1902 - d. 15.03.1952. Þau eignuðust þrjú börn og bjuggu í Reykjavík. 

Hákon ólst upp hjá foreldrum sínum í Víðum og seinna á Brettingsstöðum. Lærði um fermingu orgelleik hjá Guðfinnu á Hömrum í Reykjadal. Veturinn 1935-36 var hann við nám í orgelleik hjá Páli Ísólfssyni í Reykjavík. Var síðan heima á Brettingsstöðum við bústörf og ýmis tilfallandi störf s.s: vegavinnu o.fl. Söng á þessum árum með Karlakór Reykdæla.  

Kvæntist vorið 1941 Sigrúnu Kristbjörgu Hólmgeirsdóttur frá Hjalla í Reykjadal. Þau bjuggu, ásamt foreldrum Hákonar á Brettingsstöðum til 1945. Fluttu þau þá öll að Tungugerði á Tjörnesi þar sem þau bjuggu til sumarsins 1958 en fluttu þá til Húsavíkur. Á Húsavík bjuggu þau í húsinu Þórshamri. Hákon stundaði þar fyrst vinnu við bryggjusmíði, en verið var að lengja hafnargarðinn á Húsavík. Hann vann um tíma sem afgreiðslumaður við Bifreiðastöð Húsavíkur. Síðan hóf hann störf við Fiskiðjusamlag Húsavíkur þar sem hann vann við aðgerð og saltfiskverkun. Vorið 1973 lést Sigrún, eiginkona hans, á sjúkrahúsi í Reykjavík. Hákon fluttist stuttu seinna til mágs síns og konu hans sem þá bjuggu í Víðum í Reykjadal. Vorið eftir flutti hann með þeim að Narfastöðum í sömu sveit þar sem þau bjuggu til ársins 1986. Hákon hélt áfram störfum við F.H. á Húsavík allt til 1980. Þá hóf hann störf hjá nýstofnuðu fyrirtæki á Laugum í Reykjadal, sem nefndist Stokkfiskur. Vann hann þar til starfsloka. Hákon flutti til Húsavíkur árið 1986 og bjó þar til æviloka. Þar var hann í skjóli Dvalarheimilis aldraðra í;  Þórshamri, Miðhvammi og seinast í Hvammi. 

Á Húsavík starfaði Hákon með Karlakórnum Þrym frá 1958 og þar til hann hætti starfsemi 1975. Hann starfaði einnig með kirkjukór Húsavíkurkirkju árum saman. Hann hljóp einnig oft undir bagga með sóknarprestum á Húsavík ef þá vantaði undirleikara við ýmsar athafnir. Hákon var einn af stofnendum Harmonikufélags Þingeyinga árið 1978 og starfaði með því félagi til æviloka. Hákon stofnaði ásamt fjórum harmonikufélögum sínum hljómsveitina  “Strákabandið” sem lék við ýmis tilefni og gaf út hljómdiskinn “Ljúfu lögin” árið 1999. Hákon söng einnig með kirkjukór Einarsstaðasóknar og seinast með Kór aldraðra á Húsavík. Árið 2003 gaf Hákon út endurminningar sínar sem nefnast; “Brotinn er nú bærinn minn” 

Jón Hákonarson f. 26. júlí 1944. Búsettur í Reykjavík. 

Hólmgeir Helgi Hákonarson f. 23. febrúar 1951. Búsettur í Reykjavík. 

Hákon varð bráðkvaddur á Húsavík 25. janúar 2005. Útför hans fór fram frá Húsavíkurkirkju 5 febrúar 2005. Hann var jarðsettur í Fossvogskirkjugarði 8 febrúar 2005. Þar hvílir hann við hlið eiginkonu sinnar. 

Minningarsíður

Nýleg andlát

Útfarir

Hlaðvarp

Þjónustusíða

Fræðsluefni

Hákon Jónsson

Útför

Ertu með minningargrein?