Hákon Aðalsteinsson var fæddur á Öxnhóli í Skriðuhreppi í Hörgárdal, sem nú kallast Hörgársveit, 8. desember 1929. Hann lést á Fjórðungssjúkrahúsinu á Akureyri 17. nóvember 2023. 

Foreldrar Hákonar og ábúendur á Öxnhóli voru hjónin Aðalsteinn Sigurðsson f. 26. september 1893, d. 3. september 1971 og Elísabet Pálína Haraldsdóttir f. 11. maí 1904, d. 2. september 1993. Systkini Hákonar voru Hulda f. 23. apríl 1928, bóndi og húsfreyja að Syðri-Bægisá í Hörgársveit og Hreiðar f. 24. desember 1933, lengst af bóndi á Öxnhóli. Þau eru bæði látin. Eiginkona Hákonar var Rannveig Ármannsdóttir f. 22. júlí 1925, d. 23. júní 2012. Synir þeirra eru Aðalsteinn f. 10. janúar 1954, Elías f. 9. janúar 1957, Hákon f. 9. desember 1960 og Örn Viðar f. 19. júlí 1962, látinn. Fyrir átti Rannveig soninn Ármann þóri Björnsson, f. 2. október 1944, sem ólst upp hjá móðurforeldrum sínum á Myrká. Eignkona Aðalsteins er Sigurlína Hilmarsdóttir f. 19. april 1954 og þeirra synir Hákon f. 17. desember 1979 og Heiðar Már f. 5. október 1987. Eiginkona Elíasar er Dröfn Jónsdóttir f. 3. júlí 1955 og þeirra börn Rannveig f. 9. ágúst 1982 og Jón Steinn f. 10. febrúar 1987. Eiginkona Hákonar er María Björk Ívarsdóttir f. 5. ágúst 1963 og þeirra börn Ívar Örn f. 12. maí 1987, Sigrún María f. 2. febrúar 1990 og Sólveig Helga f. 9. júní 1992. Barnabörnin eru 7 og barnabarnabörnin 14. 

Hákon ólst upp á Öxnhóli við hefðbundin sveitastörf. Skólagangan var stutt og annað nám ekki í boði á þeim tíma en farskóli í sveitinni. Oft var mannmargt og erilsamt á Öxnhóli sem var framsækið bú í sinni tíð. Þar var byggt tvílyft íbúðarhús úr timbri á árunum upp úr 1920 og ekki löngu eftir stríð var þar komin dísilvél sem framleiddi rafmagn til ljósa og knúði mjaltavélar í fjósi. Algengt var á þessum árum að bændur úr Barkárdal eða framanverðurm Hörgárdal gistu á Öxnhóli á leið sinni í eða heim úr kaupstaðarferð til Akureyrar. Eins bar oft við að gangnamenn úr Skagafirði gistu á Öxnhóli þegar þeir sóttu og ráku heim fé sem hafði farið á milli sýslna. Þá var jafnan vinnufólk á Öxnhóli tímabundið eða til lengri tíma og um það leyti sem börnin voru að fæðast tóku foreldrarnir að sér stúlku á fermingaraldri sem bjó hjá þeim í rúm 20 ár. 

Hákon fékk snemma áhuga á bílum og fyrsti bíllinn sem keyptur var í Öxnhól var af Willysgerð og kom þangað 1947. Skömmu síðar var keypt þangað Renault vörubifreið sem Hákon vann m.a. á þar í sveitinni. Hann tók ungur meiraprófið og á sínum yngri árum vann hann mikið við akstur og á vinnuvélum við vegagerð o.fl. einkum í Eyjafjarðar- og Þingeyjarsýslum eftir að hann flutti búsetu til Akureyrar. Um tíma gerði hann hann einnig út eigin vörubíla með leyfi frá Bifreiðastöðinni Stefni á Akureyri, vann hjá Versluninni Eyjafirði, var verkstjóri hjá Útgerðarfélagi Akureyringa og rak um tíma ásamt öðrum smurstöð BP á Akureyri. 

Á árinu 1964 flutti Hákon og fjölskylda hans í Öxnhól þar sem hún bjó í félagi við foreldra hans í tvö ár en flutti þá aftur til Akureyrar. Þá hóf Hákon störf hjá BP, Olíuverslun Íslands hf. sem síðar varð Olís. Fyrst starfaði hann sem bílstjóri á olíubílum sem óku í sveitir, síðan við bókhald og innheimtur á skrifstofu og loks sem umboðsmaður Olís á Akureyri uns hann lét af störfum vegna aldurs skömmu fyrir aldamótin 2000. 

Hákon var með afbrigðum minnugur, kunni mikið að vísum og honum var einkar lagið að muna afmælisdaga. Þessi gáfa hélst honum að mestu til dauðadags. Hann var frekar léttlyndur og gamansamur að eðlisfari og ekki er hægt að halda því fram að hann hafi verið langrækinn þótt honum hafi mislíkað eitthvað. Hann var laginn að eiga við vélar og lagfæringar á ýmsum hlutum og íbúar í Lindarsíðunni, þar sem hann bjó síðast í rúm 30 ár, voru honum þakklátir þegar hann skipti um ljósaperur, pakkningar í krönum eða losaði stíflur úr vöskum o.fl. þess háttar. Hákon var jafnan heilsuhraustur, bjó einn eftir að Rannveig lést og sá að mestu um sig sjálfur. Hann keyrði bíl til síðasta dags en velti orðið fyrir sér að skila ökuleyfinu svo hann kæmist tjónlaus inn í eilífðina af því að hann hafði sjálfur aldrei valdið tjóni í umferðinni. Síðustu árin var hann í dagvistun í Hlíð tvo daga í viku og nýlega búinn að bæta þriðja deginum við þegar hann fékk heilabóðfall sem dró hann til dauða viku síðar. 

Hákon átti góða vinkonu, Erlu Ívarsdóttur, sem hann var þakklátur fyrir að hafa kynnst og átt góða samveru með. Aðstandendur Hákonar eru þakklátir henni fyrir ómetanlegt samband þeirra og fyrir að hafa létt honum lífið síðustu árin. 

Útför Hákonar fór fram í kyrrþey frá Höfðakapellu á Akureyri 12. desember 2023.

Minningarsíður

Nýleg andlát

Útfarir

Hlaðvarp

Þjónustusíða

Fræðsluefni

Hákon Aðalsteinsson

Útför

Ertu með minningargrein?