Gústav Sigurgeirsson múrarameistari, Norðurbrún 1, Reykjavík, lézt á Landspítalanum í Reykjavík á annan í jólum á 75. aldursári. Útför hans hefur farið fram í kyrrþey að ósk hins látna. Gústav heitinn var fæddur á Ísafirði 5. dag nóvembermánaðar árið 1919. Foreldrar hans voru hjónin Ingibjörg Þórunn Jóhannsdóttir, Árnasonar skósmiðs á Ísafirði, Jóhannssonar bónda í Hvammi í Austur-Húnavatnssýslu og Sigurgeir Sigurðsson, sjómaður á Ísafirði, Sumarliðasonar leiðsögumanns á Akureyri, Guðmundssonar landpósts á sama stað.

Gústav ólst upp í stórum systkinahópi. Elztur var Jóhann, verzlunarmaður á Ísafirði, fæddur 16. ágúst 1911, dáinn 2. marz 1987, næstelzt Þóra, fædd 12. september 1913, sem lengi rak hótel ásamt manni sínum á Blönduósi, þá Svava, húsmóðir á Akureyri, fædd 26. ágúst 1915, dáin 8. júlí 1990, síðan Sumarliði, fæddur 26. janúar 1922, dáinn 12. febrúar 1936, þá Elísabet Þórunn, fædd 23. september 1926, forstöðumaður félagsstarfs aldraðra á Blönduósi, og loks Þorgerður, fædd 14. desember 1928, fulltrúi á Raunvísindastofnun.

Gústav nam múraraiðn og vann í þeirri starfsgrein meðan heilsa hans leyfði.

Fyrri kona hans var Guðrún Sveinsdóttir frá Borgarnesi. Þeim varð tveggja dætra og tveggja sona auðið. Elzt er Ása, verzlunarmaður, gift Birgi Þórðarsyni, útibússtjóra ÁTVR í Borgarnesi. Annar er Þráinn, mjólkurfræðingur í Borgarnesi. Þriðja Ingibjörg, skrifstofustúlka, gift Guðmundi Benjamínssyni, framkvæmdastjóra í Stykkishólmi. Fjórði Sveinn Svavar, mjólkurfræðingur í Bogarnesi, kvæntur Elínu Kristínu Helgadóttur, skristofustúlku. Guðrún og Gústav skildu.

Seinni kona Gústavs var Ragnhildur Jósepsdóttir, ættuð úr Eyjafirði, matráðskona. Systir þeirra eru tveir. Ari Brimar, bókbindari, kvæntur Önnu Bjargeyju Gunnarsdóttur, tannsmið, Gústav Hjörtur, rafeindavirki, kvæntur Maríu Lovísu Sigvaldadóttur, dagmóður. Gústav og Ragnhildur skildu.

Barnabörn og barnabarnabörn Gústavs eru 12 talsins.

Síðustu árin sem Gústav lifði naut hann hlýhugar og tilsjónar góðrar vinkonu, Nínu Björnsdóttur.

Gústav heitinn Sigurgeirsson var gjörvilegur maður, hár og spengilegur, léttur í lund og bjó að hagmælsku og skemmtilegri frásagnargáfu. Hann hafði og yndi af hljómlist og dansi og var liðtækur bridge-spilari.

Gústav var hörkuduglegur og velvirkur múrari lengst af starfsferli sínum, en veikindi hægðu á starfsgetu hans fyrir allmörgum árum og gerðu honum loks ókleift að ganga til daglegra starfa. Hann varðveitti þó vel ljúfmennsku sína, skemmtilegheit og snyrtimennsku og bar sig af karlmennsku, þótt ekki gengi hann heill til skógar. Síðustu misserin vóru honum erfið heilsufarslega, en hann gerði sér glögga grein fyrir því að hverju stefndi og gekk frá málum sínum af æðruleysi.

Á þessum krossgötum kveð ég Gústav mág minn með þakklæti fyrir hlýhug hans allan og bið honum betri daga með blómum í haga í landi fyrirheitanna.

Minningarsíður

Nýleg andlát

Útfarir

Hlaðvarp

Þjónustusíða

Fræðsluefni

Gústav Sigurgeirsson

Útför

Ertu með minningargrein?