Guðni Alexander Snorrason fæddist þann 9. september 2004 í Reykjavík. Hann varð bráðkvaddur í svefni aðfaranótt föstudagsins 31. janúar 2025 og hlaut friðsælt andlát.

Foreldrar Guðna Alexanders eru Elsa Guðnadóttir, fædd þann 14. september 1978, búsett í Svíþjóð og Snorri Valur Einarsson, fæddur þann 15. febrúar 1980, látinn þann 8. ágúst 2009 í Reykjavík.

Eftirlifandi systkini Guðna Alexanders er Guðmundur Galdur Egilson, samfeðra bróðir, fæddur þann 5. júlí 2008 í Reykjavík. Móðir Guðmundar Galdurs er Klara Nótt Egilson, fædd þann 11. mars 1971. Þau eru búsett á Eyrarbakka.

Kistulagning Guðna Alexanders fór fram í Fossvogskapellu þann 20. febrúar 2025 og bálför þar á eftir. Guðni Alexander var færður til hinstu hvílu í fjölskyldugrafreit móðurfjölskyldu sinnar í bænum Ulricehamn í Svíþjóð.

[DEFAULT]

Guðni Alexander Snorrason – sonur, bróðir, barnabarn, frændi, vinur og ástvinur – fallega barnið okkar allra, ungi og lipri hljóðfæraleikarinn og hæfileikaríka, upprennandi tónskáldið – dásamlegi drengurinn og góða manneskjan, hann Guðni, hefur lagt aftur björtu augun sín.

Lítill þriggja ára hnokki breiðir út faðminn og hleypur brosmildur á móti mér. Það glampar á sólina í vesturbæ Reykjavíkur og barnsleg hlátrasköllin óma um allt hverfið. Ég helli sykurlausu gosi í glas og segi honum, full trúnaðartrausts, að drykkurinn í glasinu heiti „Guðna-kók.“ Hann kinkar kolli og fær sér gúlsopa af sykurlausu gosinu.

Ánægður fjögurra ára hnokki sýnir mér rauðan leikfangadreka. Forvitin ýti ég fingri á annan vænginn en ekkert gerist. Ljóshærði drengurinn með björtu augun horfir íbygginn á mig, allt að því umhyggjusamur og leiðréttir fingrahreyfingu mína meðan hann hvíslar: „Svona,“ og þrýstir báðum vængjunum saman með traustum barnsfingrum.

Rauði drekinn hans Guðna. Við Galdur eigum hann enn.

Hávaxinn og myndarlegur grunnskólanemi í örum uppvexti segir mér feimnislega frá elsku sinni á gítartónum. Hann situr í bjartri stofunni heima hjá mömmu sinni og ylurinn streymir um okkur Galdur. Hún hefur svo hlýja nærveru, hún Elsa. Forviða spyr ég hvort Guðni sé í raun svo hæfileikaríkur hljóðfæraleikari og raunin er. Elsa brosir og segir já.

Ungur menntskælingur stendur á stofugólfinu mínu og brosir feimnislega þegar ég spyr hvort hann muni eftir „Guðna-kókinu“ okkar forðum daga. Hann segir „já“ og gagnkvæmur trúnaðarglampi læðist yfir andlit okkar beggja. Sykurlaust gos var toppurinn í þá daga. Guðmundur Galdur er feiminn. Það er heiður að fá stóra bróður sinn í heimsókn.

Við tölum saman aftur bráðlega, elsku Guðni minn, við verðum að hittast oftar.

Ungur maður móttekur skilaboð mín nú um jólin. Ég skrifa honum eins og fyrir hálfgerða rælni um hátíðarbil og segi honum í örfáum orðum – sem eru fátækleg, því ég vil ekki hvolfa mér yfir barnið þó að sé fullorðinn – að ég sakni þess að drekka Guðna-kók með honum og að fátt þrái ég meira en að heyra af öllum ævintýrum hans í dag.

Já, það er alveg rétt, við verðum að hittast bráðlega, svarar hann. Hittumst fljótlega.

Fáeinum vikum síðar berst mér símtal frá nánum fjölskyldumeðlim sem greinir mér frá því að Guðni Alexander sé látinn. Hann hafi hlotið friðsælt andlát í svefni – fyrir um sólarhring síðan.

Guðni Alexander var eldri samfeðra bróðir Guðmundar Galdurs Egilson, yngri sonar míns og eldri sonur Snorra Vals Einarssonar, barnsföður míns, sem andaðist í svefni á heimili sínu aðeins 29 ára gamall, þann 8. ágúst 2009. Móðir Guðna Alexanders er Elsa Guðnadóttir, en Guðni Alexander var einkabarn Elsu.

Við höfum heiðrað jarðneska minningu Guðna Alexanders með hinstu kveðju okkar þegar kistulagning Guðna Alexanders – sonar, bróður, barnabarns, frænda, vinar og ástvinar – fór fram í kapellu Fossvogskirkju við ljúfa tóna sem sæma bjartri minningu unga hæfileikaríka drengsins sem kveður allt of fljótt.

Guðni Alexander verður jarðsettur í Svíþjóð og mun hvíla í fögrum fjölskyldugrafreit – sem okkur mun þykja heiður að heimsækja, þó það viti algóður Guð á himnum að við þráum fleiri samverustundir með Guðna, sem hlaut seinna nafn sitt að sögn Snorra, föður hans – í höfuðið á Alexander mikla og bar þá miklu nafngift, sem keisarinn sigursæli bar, með rentu.

Móður Guðna Alexanders, Elsu Guðnadóttur, fjölskyldu og öllum ástvinum votta ég dýpstu samúð mína. 

Guðmundur Galdur, yngri bróðir Guðna Alexanders, heldur minningu Guðna á lofti með stolti og kærleika í hjarta.

Ég mun aldrei yfirgefa þig, elsku hjartans Guðni minn – þú munt ávallt hvíla bjartur í mínu hjarta.

Guðna-kók, rauður dreki, bjart bros og magnaðar melódíur. 

Minningarsíður

Nýleg andlát

Útfarir

Hlaðvarp

Þjónustusíða

Fræðsluefni

Guðni Alexander Snorrason

Útför

Guðni Alexander - Minning