Guðmundur Hjörleifsson eða Mummi eins og hann var alltaf kallaður fæddist í Reykjavík þann 1.mars árið 1932 en hann lést á Hjúkrunarheimilinu Klausturhólum á Kirkjubæjarklaustri þann 20.febrúar árið 2016. 

Foreldrar hans voru Hjörleifur Guðbrandsson, bóndi, og Ágústa Hallmundsdóttir, húsmóðir. Mummi fæddist á Grettisgötu 20a og átti heima þar svo til alla sína ævi. Systir Mumma var Margrét Eyrún, alltaf kölluð Maddý, fædd árið 1935 en hún lést árið 1997. 

Mummi var ókvæntur og barnlaus en börn Maddýjar og Benna, eiginmanns hennar, eru Hjörleifur, Ágústa og Bernharð. 

Mummi var trésmiður og vann við ýmis byggingarstörf bæði í Reykjavík sem og úti á landi. Hann var mikill áhugamaður um ljósmyndun og margar af myndum hans hafa ratað í fræðibækur um sögu og byggingu Reykjavíkur og nágrennis. 

[DEFAULT]

Kæri Mummi, nú er komið að leiðarlokum. Minningarnar af æskuheimilinu á Grettó koma núna ljóslifandi fram. Alltaf hékk myndavélin um hálsinn á þér. Svo voru það allar græjurnar sem fylgdu henni. Það voru nokkrir flasskubbar, nokkur filmubox, jafnvel tvær myndavélatöskur, önnur minni myndavél og svo var þrífóturinn aldrei langt undan. Heilt framköllunarherbergi var útbúið innaf stóra verkstæðinu í kjallaranum heima. Minna mátti það nú ekki vera. Stundum fengum við systkinin að fylgjast með við framköllun mynda, það var spennandi fyrir lítið barn. Við fjölskyldan fengum að njóta ljósmyndahæfileika þinna og eru til ófáar myndir af okkur börnunum sem og öðrum ættingjum og vinum. Fjölmargar myndir liggja núna á Ljósmyndasafni Reykjavíkur.

Þú varst mikill listamaður og margir dýrgripir urðu til í höndum þínum eins og útskorin skartgripabox, prjónastokkar, gestabækur, pennar og pennastokkar. Þetta eru einstaklega fallegir gripir, gerðir af flinkum og vandvirkum smið. Það þarf mikla þolinmæði að skera út heila gestabók eða skartgripabox. Hana hafðir þú.

Þú varst góður við okkur systkinin og hlökkuðum við einna mest til að opna pakkana frá þér. Alltaf harðir pakkar, dúkka fyrir mig og bílar fyrir strákana, klikkaði aldrei. Við vorum einu börnin í kringum þig og fengum við oft að njóta þess. Svo var jafnvel farið í fjársjóðsleit um allt húsið í leit að jólapökkunum eða páskaeggjunum. Það var ótrúlega skemmtilegt og þú skemmtir þér ekki minna. Á jólunum var myndasýningu skellt upp og mikið hlegið. Þetta eru dýrmætar minningar.

Þér fannst alveg sérstaklega gaman þegar vinkonur mínar mættu allar á svæðið. Þú kallaðir þær stóðið, við vorum alltaf sex stelpur hangandi saman og stelpum fylgir gjarnan mikil kátína og gleði. Þú skemmtir þér konunglega í kringum okkur og varst fjótur að koma upp þegar þú sást þær koma í hús. Þú hafðir húmor fyrir látunum í okkur og við trufluðum þig aldrei. Ég held, svona eftir á að hyggja, að lífsgleði nokkurra unglinga hafi hjálpað þér á margan hátt og meira en mann grunar. 

Hvíl í friði, kæri frændi, og þakka þér fyrir margar góðar minningar.

Minningarsíður

Nýleg andlát

Útfarir

Hlaðvarp

Þjónustusíða

Fræðsluefni

Guðmundur Hjörleifsson

Útför

Kveðja til frænda