Guðmunda Mjöll Þórðardóttir, síðar Söegren og jafnan kölluð Mjöll, var fædd að Gufuskálum á Snæfellsnesi þann 28. mars árið 1924. Foreldrar hennar voru Jón Þórður Sveinsson, sjómaður og Ásthildur Sæmundsdóttir, húsmóðir. Hún var yngst þriggja systkyna og varð langlífust þeirra. 

Þórður, faðir Mjallar, sem starfaði sem sjómaður skilaði sér ekki til skips í Grimsby árið 1925 og hefur ekkert til hans spurst síðan. Vegna bágra kjara í framhaldinu gat Ásthildur ekki staðið undir þremur dætrum og sendi Mjöll í fóstur til hjóna í Reykjavík. Henni leið ekki alltaf vel þar og þótti henni hún baggi á þeim hjónum. Tvennum sögum fer af því hvernig málum var háttað eftir það. Elínborg, systir Mjallar, sagði að þegar hagur batnaði hjá fjölskyldunni hefði móðir þeirra óskað eftir því að fá dóttur sína til baka en fósturforeldrarnir voru ekki viljugir til þess svo Mjöll bjó áfram hjá þeim. Sagði Mjöll hins vegar sjálf að fósturforeldrar sínir hefðu tjáð henni að blóðmóðir sín vildi ekkert með hana hafa og hitti hún því ekki blóðfjölskyldu sína í marga áratugi. Þetta átti Mjöll erfitt með að sætta sig við. Ásthildur Sæmundsdóttir, móðir Mjallar, lést þann 15. júní árið 1979. 

Það var fyrir tilstuðlan Sigurðar Ragnarssonar, barnabarns Elínborgar, að leiðir þeirra Mjallar lágu saman á ný því í ágústmánuði 1986 skipulagði hann ferð fyrir sig og ömmu sína til Kaupmannahafnar og var Mjöll heimsótt í ferðinni. Þær systur táruðust er þær hittust í fyrsta sinn í sex áratugi og urðu þar miklir fagnaðarfundir. Eftir þessa heimsókn voru samskipti hennar við skyldmenni sín heima á Íslandi mikil og heimsótti hún föðurland sitt í það minnsta tvisvar. 

Mjöll stundaði nám við Hjúkrunarkvennaskóla Íslands og útskrifaðist þaðan 1. maí árið 1948. Eftir nám sitt í hjúkrunarkvennaskólanum stóð henni til boða að vinna við hjúkrun í Danmörku annars vegar og í Bretlandi hins vegar og valdi hún fyrri kostinn. 25 ára gömul fluttist Guðmunda Mjöll Þórðardóttir svo til Kaupmannahafnar til að vinna sem hjúkrunarkona á Frederiksberg Hospital í Kaupmannahöfn. Mjöll kynntist tilvonandi eiginmanni sínum, Jørgen Søegren arkítekt í Tivoli í Kaupmannahöfn gamlársdag einn og giftist honum þann 2. maí árið 1953 og tók þá upp ættarnafn hans. Jørgen hannaði og lét byggja hús fyrir fjölskyldu sína á Amager þar sem þau bjuggu mestan hluta ævinnar. Þau Mjöll og Jörgen nutu lífsins, ferðuðust mikið bæði innan Danmerkur og utan hennar. Þau eignuðust saman tvö börn, þau Jou Søegren (2. desember 1954) og Kim Søegren tónlistarkennara (26. desember 1957.)

Jörgen lést eftir skammvinna baráttu við krabbamein árið 2013.

Mjöll lifði mann sinn um sjö ár og var hún mjög virk í félagsstarfi og tók reglulega á móti gestum. 

Síðustu árin kvartaði Mjöll undan hrakandi heilsu en þá var sjónin orðin döpur og líkaminn farinn að þreytast. Hún bjó heima hjá sér meðan hún gat með aðstoð Jou dóttur sinnar en fluttist svo á hjúkrunarheimilið Bomi Parken í Kaupmannahöfn og bjó þar í skamman tíma. Hún lést á hjúkrunarheimilinu þann 13. nóvember árið 2020, 96 ára að aldri.

Minningarsíður

Nýleg andlát

Útfarir

Hlaðvarp

Þjónustusíða

Fræðsluefni

Guðmunda Mjöll Þórðardóttir

Útför

Ertu með minningargrein?