Okkar ástkæri Guðjón Elisson lést á Landspítalanum 29. desember síðastliðinn.
Fyrir hönd ástvina,

Útförin fer fram frá Grundarfjarðarkirkju. Kirkjugestir eru beðnir um að framvísa neikvæðu hraðprófi, ekki eldra en 48 klst. 

Blóm og kransar eru vinsamlegast afþakkaðir en þeim sem vilja minnast hans er bent á SÁÁ

Guðjón Elisson fæddist í Grundarfirði 3. febrúar 1958 og lést á Landspítalanum 29. desember síðastliðinn. Foreldrar Guðjóns eru Elis Guðjónsson, f. 9. ágúst 1931, d. 20. desember 2016 og Bára Bergmann Pétursdóttir, f. 2. desember 1935. Systkini Guðjóns eru Ómar Bergmann, f. 7. júní 1955, Pétur Kristinn, f. 14. júlí 1960, d. 27. maí 2008, Ægir Már, f. 14. maí 1966 og Sigríður Elísabet, f. 24. desember 1968.

Barnsmóðir Guðjóns er Alda Arnardóttir, f. 1. febrúar 1960. Sonur þeirra er Kristján, f. 2. febrúar 1979 og dóttir hans er Iðunn Gígja. Sambýliskona Kristjáns er Fríða María Harðardóttir, f. 28. febrúar 1974 og hennar börn eru Sunneva Líf Albertsdóttir og Þorgeir Atli Albertsson. Fyrri sambýliskona Guðjóns var Karítas Anna Þórðardóttir, f. 24. febrúar 1956, d. 13. október 2013. Hennar börn eru 1) Atli Már Hafsteinsson, f. 29. júlí 1977, maki Sonja Helena Gunnarsdóttir, f. 25. júní 1974. Sonur Atla er Bjartur Ýmir. Börn Sonju eru Vincenzo Atli og Anita. Sonur Vincenzo er Kristófer Antonio. 2) Árni Þórarinsson, f. 3. september 1984, maki Birna Vala Eyjólfsdóttir, f. 8. maí 1987. Dóttir Árna er Heiða María og sonur Birnu er Hermann Valur. 3) Anna Dís Þórarinsdóttir, f. 15. maí 1986, maki Narfi Jónsson, f. 3. apríl 1986, dætur þeirra eru Vigdís og Sesselja. Sambýliskona Guðjóns er Grazyna Zofia Bajda, f. 22. janúar 1963. Börn hennar eru 1) Katarzyna Bajda, f. 25. nóvember 1990, maki Adrian Oleszczuk, f. 19. janúar 1988. Börn þeirra eru Alexander Dominik og Anna Maria. 2) Dominik Bajda, f. 22. maí 1992, maki Agnes Sif Eyþórsdóttir, f. 19. júní 1988.

Guðjón ólst upp í foreldrahúsum á Grundarfirði. Eftir skyldunám fór hann í Héraðsskólann í Reykholti og þaðan í Menntaskólann á Laugarvatni þar sem hann kynntist barnsmóður sinni, Öldu Arnardóttur. Eignuðust þau soninn Kristján og bjuggu saman á Grundarfirði þar til þau slitu samvistum eftir stutta sambúð. Árið 2003 Kynntist Guðjón Karítas Önnu Þórðardóttur og bjuggu þau saman á Grundarfirði þar til hún lést árið 2013. Guðjón og Grazyna felldu hugi saman árið 2014 og hófu sambúð skömmu síðar. Guðjón reyndist fjölskyldunni vel og studdi alla eftir bestu getu.

Guðjón, eða Gaui eins og hann var jafnan kallaður, fór á sjóinn 13 ára með afa sínum og eldri bróður, Ómari. Eftir stúdentspróf frá Eðlisfræðibraut Menntaskólans á Laugarvatni árið 1979 starfaði hann eitt ár sem kennari við Grunnskóla Grundarfjarðar. Þaðan fór hann til starfa í frystihúsinu Sæfangi. Síðan lá leið hans í Fiskvinnsluskólann í Hafnarfirði þaðan sem hann útskrifaðist sem fisktæknir. Gaui hélt svo áfram störfum í Sæfangi en nú sem verkstjóri. Árið 1986 keypti Gaui sér trillu í félagi við Ægi bróður sinn og hófu þeir útgerð. Fyrstu þrjú árin reru þeir trillunni á sumrin en unnu sem hásetar á Runólfi á veturna. Fljótlega fjárfestu bræðurnir í öðrum bát og reru eftir það hvor í sínu lagi. Saman ráku þeir útgerðina í 20 ár.

Gaui var fróðleiksfús og átti auðvelt með að nema það sem fangaði áhuga hans. Hann sökkti sér niður í viðfangsefni sín svo fátt annað komst að á meðan. Hann var áhugaljósmyndari og eftir að hann hætti sjómennsku árið 2006 tók hann að sér ýmis verkefni s.s. myndvinnslu og passamyndatöku. Hann hagnýtti sér snemma möguleika alnetsins og sótti þar ýmis fjarnámskeið. Þar á meðal tók hann grunnnámskeið í kerfisfræði og leituðu ófáir til hans með tölvurnar sínar þegar í óefni var komið. 

Eitt af fjölmörgum áhugamálum Gauja voru örnefni í hans heimabyggð sem og gömul heiti á fiskimiðum. Hann aflaði sér upplýsinga með því að yfirheyra sér eldri menn og skráði fróðleikinn niður á myndrænan hátt á heimasíðu sinni (gauiella.is). 

Gaui greindist með sykursýki og síðustu árin var lágkolvetnamataræði og lífsstíll því tengt honum afar hugleikið. Hann hlustaði á fjölmarga lífefnafræðilega fyrirlestra á netinu og hefði líklega getað talað margan sérfræðinginn í kaf um þau efni. 

	Öllum ber saman um hjálpsemi Gauja. Var hann jafnan fyrstur á staðinn ef hann gat orðið að liði, hvort sem um var að ræða smíðar, aðstoð við tölvur, ljósmyndun eða hvers kyns ráðleggingar. Gaui var virkur í sínu nærsamfélagi og átti meðal annars þátt í að stofna félagsskapinn Karlakaffi. Árið 1996 fór Gaui í sína fyrstu og einu áfengismeðferð og var eftir það félagi í AA samtökunum. Þar vann hann ötullega að eflingu samtakanna og studdi dyggilega við aðra samferðamenn sína.

	Gaui var stoð og stytta móður sinnar eftir að faðir hans veiktist. Hann sá um að hana skorti aldrei neitt og veitti henni félagsskap á hverjum degi.

[DEFAULT]

Guðjón Elisson, tengdapabbi minn, er látinn, en aðeins rúmum mánuði eftir að við fréttum af veikindum hans var hann allur. Þetta var óvænt og skyndilegt og eftir sitja ástvinir hans harmi slegnir. Gaui, eins og hann var oftast kallaður, var á besta aldri, rétt skriðinn yfir sextugt. Ég kynntist honum og Grazynu fyrir tæpum sex árum þegar við Kristján, sonur hans, vorum farin að vera saman. Þau tóku alltaf vel og rausnarlega á móti okkur þegar við komum vestur og ég upplifði mig afar velkomna í fjölskylduna. 	

	Gaui hafði hlýja og góða nærveru, virtist lífsglaður og léttlyndur. Hann var iðinn og hjálpsamur, ávallt reiðubúinn að hjálpa ef einhver þurfti aðstoð. Gaui bjó yfir þeim eiginleika að geta sökkt sér á kaf í hugðarefni sín og naut þess að deila því sem hann lærði með öðrum. Hann hafði sterkar skoðanir á ýmsum málum, í sumu vorum við ósammála, en mér þótti í raun magnað hve heill hann var í sinni trú og upptendraður af áhuga. Sem dæmi um það hvernig hann gat sökkt sér í hugðarefni sín og tekið málin í sínar hendur, þá náði hann stórkostlegum árangri í átt að betri heilsu með því að umbylta mataræði sínu fyrir einhverjum árum. 

	Gaui var eins og fyrr segir hlýr og glaðlyndur maður. Hann var brosmildur og aldrei sá ég hann skipta skapi eða hækka róminn. Hann var bóngóður og hafði augljóslega mikil og jákvæð áhrif á fólkið sem stóð honum næst. Missir ástvina Gauja er því mikill og sorgin þung.

Elsku Kristján minn, Iðunn Gígja, Grazyna, Bára og fjölskyldan öll, ég votta ykkur mína dýpstu samúð. Megið þið finna styrk á erfiðum tímum í nærveru hvers annars og þeirri vissu að minningar um góðan mann muni ylja ykkur um ókomna tíð.

Minningarsíður

Nýleg andlát

Útfarir

Hlaðvarp

Þjónustusíða

Fræðsluefni

Guðjón Elisson

Andlátstilkynning

Útför

Aðstandendur

Þakkir

Minningargrein frá Fríðu Maríu