Gréta Ösp Jóhannesdóttir fæddist í Reykjavík 16. október árið 1961.  Foreldrar hennar eru Heiður Helgadóttir og Jóhannes Pétursson.  Gréta eignaðist eina alsystur Elínu Björk Heiðardóttur sem er fædd árið 1963 og tvo bræður samfeðra, þá Pétur sem er fæddur 1953 og Svavar fæddur 1961.  Frá eins til sex ára aldurs ólst Gréta að mestu upp hjá ömmu sinni og afa, Margréti Sigurðardóttur og Helga Hannessyni og var þeim til mikillar gleði. Þau hjónin bjuggu á Rangárvöllum, fyrst á Ketlu og síðar á bænum Strönd. Hún bjó svo með móður sinni, systur og fósturföður, Óskari Hallgrímssyni í Vestmannaeyjum á árunum 1967 til 1972, en þær mæðgurnar fluttu saman til Reykjavíkur nokkrum mánuðum áður en jörð rifnaði á Heimaey og eldgos hófst með öllum þeim fólksflutningum og náttúruhamförum sem því fylgdu.  Síðar bjó Gréta með afa sínum í Reykjavík síðustu tvö æviár hans og veitti honum öryggi á efri árum.  Hann var sérstæður maður en Gréta kunni að mæta sérvisku hans og skapferli sem var svo lýsandi fyrir hennar skapandi eðli og fordómaleysi.

Gréta var alla tíð einstaklega kröftug og sjálfstæð manneskja.  Frá tólf ára aldri, vann Gréta með námi hvern dag, sem aðstoðarmaður í utanríkisráðuneytinu. Fyrst sem sendill, en seinna líka sem aðstoðarmaður og bílstjóri. Gréta útskrifaðist sem stúdent frá Menntaskólanum í Reykjavík árið 1981. Gréta var í sambúð með Ævari Oddi Ævarssyni í nokkur ár og þau eignuðust saman dóttur sem fékk nafn móðurömmu sinnar Heiður, en hún leit dagsins ljós í Reykjavík 30. mars árið 1993.  

Gréta hafði brennandi áhuga á frönsku og öllu því sem franskt var. Til að ná góðum tökum á frönskunni réði hún sig því að loknu stúdentsprófi, í vist sem au pair hjá franskri fjölskyldu í París og dvaldi þar í nokkra mánuði.  Hún kom svo aftur til Íslands til að vinna og safna fyrir skólavist í Esmod hönnunarskólanum í París, sem er lýsandi fyrir áræðni Grétu og kappsemi.   Í skólanum tókst hún svo á við tvöfalt nám, fatahönnun og klæðskurð, af miklu kappi, dugnaði og ósérhlífni, í heil þrjú ár. 

Eftir að heim kom hannaði Gréta fljótlega fatalínu, fyrir ullarvinnslufyrirtækið M.A. Eiríksson. Peysurnar voru frumlegar og fallegar og allt öðruvísi en það sem áður hafði verið hannað úr íslenskri ull. Enn í dag má sjá peysurnar sem hún hannaði hér og þar „á gangi“ um bæinn.  Gréta hóf starfsferil sinn sem grafískur hönnuður hjá Auglýsingastofu Ernst Backman árið 1988. Hún þreifst vel þar og líkaði lífið og störfin á auglýsinastofunni svo vel að hún ákvað að þetta væri vettvangur sem hún vildi vinna við. Gréta sagði gjarnan frá því að hún valdi auglýsingabransann því þar var alltaf svo gaman, einstaklega skemmtilegt fólk og alltaf líf og fjör og nóg að gera. Enda eignaðist hún marga vini meðal kollega sinna á auglýsingastofunum. Vini sem fylgdu henni, og hún þeim, eftir það.  Gréta vann seinna um langt árabil hjá Íslensku auglýsingastofunni og síðast hjá Auglýsingastofunni Hvíta húsinu. Eftir að hún hætti þar vann hún sem sjálfstætt starfandi grafískur hönnuður og sá meðal annars um árabil um allar auglýsingar, matseðla og kynningarefni fyrir Tapas barinn, veitingastaðinn Apótek og fleiri vinsæla veitingastaði í Reykjavík.

Gréta var mikill vinnuforkur, hraðvirk en jafnframt vandvirk. Það var því oft leitað til hennar þegar vinna átti mikilvægt verk og naumur tími var til stefnu. Ekkert verkefni var of stórt eða lítið til að hún helti sér í það og lyki með sóma, og á mettíma. Vakti þá oft heilu næturnar til að geta skilað á þeim tíma sem óskað var eftir. Meðfram fullri vinnu tók Gréta að sér mörg hönnunarverkefni. Hún hannaði meðal annars og saumaði fjöldan allan af brúðarkjólum og samkvæmiskjólum fyrir fegurðardrottningar og aðra. Hún hannaði einnig og saumaði fatnað á þekkt fólk eins og t.d. „fjólubláu jakkafötin“ fyrir Hemma Gunn og sjónvarpsþáttinn Á tali hjá Hemma Gunn. 

[DEFAULT]

Elsku fallega dásamlega Gréta okkar.   

Besta frænka í heimi, falleg að innan sem utan með risastórt hjarta úr gulli.  Þú varst stórkostleg, alveg einstök manneskja.  

Ofurblíður töffari sem máltækið ´Sælla er að gefa en þiggja´ hlýtur að hafa verið samið um.   Þú hefur verið órjúfanlegur hluti af lífi okkar systra frá því við munum eftir okkur og við náum ekki utan um að þú sért farin frá okkur. 

Þú varst hlaðin hæfileikum sem birtust okkur hinum kannski sem ofurnæmt auga fyrir hönnun, fallegum formum, efnum og litum að ekki sé minnst á skó!  Maður hitti þig aldrei í illa hönnuðum skóm! 

Og það að fá hrós frá þér fyrir skóna eða fötin, það var mesti gæðastimpill sem hægt var að fá. 

Þú varst hugrökk og fórst þínar eigin leiðir ,alltaf. Eitt af mörgu, sem okkur fannst svo aðdáunarvert við þig.  Skarpgreindur námsmaður og harðdugleg og hefði nú einhverjum dottið í hug að eftir eftir menntaskóla legðir þú fyrir þig læknisfræðina eða lögfræði, eitthvað praktískt sem þú hefðir auðvitað rúllað upp, en nei þú eltir  drauminn og fórst til Parísar í hönnunar og klæðskeranám.   Og sem betur fer eltir þú drauminn og  naust þín í heimsborginni umvafin kúltúr sem mótaði þinn karakter og hafði áhrif á okkur hin að elta okkar eigin drauma.

Og takk elsku besta Gréta fyrir þína endalausu gjafmildi, ekki bara til okkar systra  heldur líka okkar barna, sem þú sýndir svo mikinn áhuga og kærleik. Og ég held að það sé ekki á neinn hallað en þú varst þeirra uppáhaldsfrænka!

Ef allir væru bara örlítið meira eins og þú og væri heimurinn betri.

Við munum sakna þín endalaust elsku Gréta, og þó þú sért farin frá okkur verður þú alltaf með okkur í

Þínar frænkur, Sara Lind og Hekla Dögg

Minningarsíður

Nýleg andlát

Útfarir

Hlaðvarp

Þjónustusíða

Fræðsluefni

Gréta Ösp Jóhannesdóttir

Útför

Gréta Ösp Jóhannesdóttir - minning