Ástkær faðir okkar, tengdafaðir,  bróðir, afi, langafi, 

Gísli Blöndal, frá Seyðisfirði, 

lést á Landspítalanum þann 3. júní.

Útför Gísla Blöndal verður föstudaginn 20. júní 13:00 í Grafarvogskirkju.
Kistulagn 11:30 
Kaffi í safnaðarheimilinu að athöfn lokinn.

Prestur verður Sr. Aldís Rut Gísladóttir. 

﻿Gísli Blöndal er fæddur á Seyðisfirði þann 26. febrúar 1948, og var annað barn Margrétar og Péturs Blöndal, en  fyrir áttu þau soninn Theodór Blöndal (1946). Alls eignuðust þau fimm börn, auk Theodórs og Gísla, þær Ásdísi Blöndal (1953), Margréti Blöndal (1964) og Emilíu Blöndal (1968). 

Gísli ﻿ólst upp á Seyðisfirði, gekk síðar í Gagnfræðaskólann á Eiðum og Verslunarskólann í Reykjavík. Síðar var Gísli við nám við Cambridge Háskóla á Bretlandi. 

Gísli ﻿giftist Hrefnu Þórarinsdóttir (1947) úr Reykjavík þar sem þau eignuðust Elsu Blöndal (1971). Þau fluttu síðar á Seyðisfjörð þar sem þeim fæddust Birna Blöndal (1976) og Gylfi Blöndal (1977). 

﻿Á Seyðisfirði tók hann við rekstri Stálbúðarinnar, einum hluta fjölskyldufyrirtækisins STÁL sem Pétur, faðir Gísla, stofnaði árið 1948 og rak í yfir 50 ár með bróðir sínum, Ástvaldi Kristóferssyni. Þar starfaði einnig Theodór, bróðir Gísla. Í Stálbúðinni hóf Gísli að bjóða upp á nýmæli eins og hljómplötur og hljómflutningstæki, við góðar undirtektir listsækinna Seyðfirðinga og nærsveitunga. 

﻿Síðar átti hann eftir að taka slaginn við kaupfélagið á staðnum með kaupum á matvöruversluninni Bröttuhlíð ásamt Ólafi Má Sigurðssyni, góðvini sínum.

﻿Um 1982-1983 flytja Gísli og Hrefna ásamt börnum sínum suður, fyrst í Mosfellssveit til skamms tíma áður en þau komu sér vel fyrir á Háaleitisbraut í Reykjavík. Gísli fór að starfa hjá Hagkaup sem innkaupastjóri og síðar sem aðstoðarframkvæmdarstjóri. Þar tók hann marga slagi, eins og þegar hann hóf að selja innfluttar kartöflur og síðar ódýr lesgleraugu, sem augnlæknar litu augljóslega hornauga. Hann vildi hrista upp í gamaldags aðferðum og setti hag neytenda í fyrsta sæti með að storka stöðnuðu kerfi.

﻿Síðar á sínum starfsferli átti Gísli eftir að starfa hjá Auglýsingastofu Ólafs Stephensen, ARGUS, sem framkvæmdastjóri Miklagarðs, framkvæmdastjóri Borgarkringlu fyrir og eftir opnun, Veröld Bókaklúbb, Gosan (áður Sanitas), sem markaðsstjóri TAL þegar það braust inn á fjarskiptamarkaðinn, fyrsta einkarekna fyrirtækið í slíkum rekstri á Íslandi, Búnaðarbankanum og Landsbankanum. Gísli var í áratugi einnig virkur með námskeið sín í markaðs- og þjónustufræðum, ræðumennsku og framkomu. Hann var einnig virkur í JC hreyfingunni og var sæmdur Senator nafnbótinni árið 1988.

Síðar tók Gísli upp sambúð með Erlu Harðardóttir og gekk ungri dóttur hennar, Chloé Ophelia Gorbulew, í föðurstað.

﻿Um miðjan aldur fór hugur hans að leita til útlanda, og starfaði hann allnokkur ár sem leiðsögumaður fyrir íslenskar ferðaskrifstofur á Dóminíska Lýðveldinu, Kúbu, Grikklandi, Portúgal og víðar við góðan orðstír. Þegar barnabörnunum fór að fjölga kom hann aftur að fullu til Íslands og hóf störf sem hótelstjóri, fyrst hjá Hótel Egilsstöðum, en síðar hjá Íslandshótelum þar sem starfaði á Fosshótel Stykkishólmur áður en hann tók við Fosshótel Ólafsvík, síðar fór hann yfir á Fosshótel Hellnar áður en hann lauk sínum glæsta ferli sem hótelstjóri á Fosshótel Westfjords á Patreksfirði. 

Síðustu árin bjó Gísli í Reykjavík, bæði á Tryggvagötu og Vesturgötu áður en veikindi gerðu vart um sig, og bjó hann á Borgum í Grafarvogi undir það síðasta. 

Gísli var mikill ræðumaður, og kenndi ræðumennsku og opinbera framkomu m.a. í Stjórnunarskólanum, Endurmenntun HÍ og víðar. Hann var kosningastjóri Péturs Kr. Hafstein í forsetakosningunum 1996 auk þess að vera kosningastjóri Guðlaugs Þórðarsonar í prófkjörinu fyrir fyrstu alþingiskosningar hans. 

Auk þess var Gísli virkur í tónlist meira og minna alla ævi. Hann lék á trommur með hljómsveitinni Einsdæmi, sem var einskonar sveitaballaarmur annarar hljómsveitar, Þokkabót. Hann var umboðsmaður Faxa, sem m.a. Halli og Laddi voru í, og stóð fyrir hljómleikaferðum um landið. Hann var uppátækjasamur og skemmtilegur til veislu, nýjungagjarn og alltaf vel til fara, bóngóður og gaf frá sér hlýju og þokka hvert sem hann fer. Honum þótti vænt um  fjölskylduna sína og fólkið sitt og rætur hans lágu alla tíð heim til Seyðisfjarðar. Hann studdi ávallt Huginn og Bjólfurinn alltaf uppáhalds fjallið. 

[DEFAULT]

Það var í byrjun árs 1972 sem ég hitti Gísla Blöndal í fyrsta skipti en þá hafði hann flust til baka með fjölskylduna á sínar heimaslóðir, Seyðisfjörð, en sjálfur hafði ég komið í Fjörðinn fagra fyrr um haustið. Gísli hafði komið til að taka við rekstri verslunarhluta fjölskyldufyrirtækisins Stál og með tilkomu Gísla kom ferskur blær í bæinn. Hann tók til hendinni og umbreytti versluninni og kom að auki með miklum krafti inn í félagslífið í bænum. Það var ekki annað hægt en að hrífast með og við tók lífsganga og vinátta sem varað hefur sl. 53 árin svo aldrei bar skugga á. Við félagarnir deildum um margt sömu lífsskoðunum og áhugamálin féllu vel saman. Þar má nefna velferð og uppgang samfélagsins okkar, íþróttalífið, tónlistina, félagslífið og hvaðeina annað sem gerir samfélag að betri og blómstrandi bæ. Tónlistin var Gísla í blóð borin og hann hafði á unglingsárum sínum spilað með skólahljómsveit á Eiðaskóla og lært á saxófón þegar hann var á Siglufirði. 

Sumarið 1973 er eftirminnilegt en þá stofnuðum við hljómsveitina Einsdæmi ásamt nokkrum félögum okkar en Einsdæmi var undanfari hljómsveitarinnar Þokkabótar. Þarna tóku við mörg skemmtileg ár þar sem spilað var á böllum vítt og breitt á Austurlandi næstu árin. Gísli sem var trommuleikari sá um að bóka hljómsveitina og halda utan um fjármálin. Við félagarnir keyptum verslunina Brattahlíð árið1974 en það var kjöt- og nýlenduvöruverslun í bænum. Við lögðum mikinn metnað í þá verslun og þar kom reynsla og útsjónarsemi Gísla sér vel. Á þessum tíma var samkeppnin við Kaupfélagið allsráðandi og ég fullyrði það að þessi tími mótaði þroska okkar og þekkingu á viðskiptum til framtíðar. 

Það var mikill drifkraftur á Seyðisfirði þarna í upphafi áttunda áratugarins, atvinnulífið blómstraði og félagslífið öflugt. Það var ekki síst fyrir elju og dugnað Gísla sem var hvetjandi og leiðandi að efla félagslífið með því að efla íþróttalífið ásamt öðru góðu fólki. Þá stóð hann að stofnun öflugs JC félags þar sem metnaðurinn var mikill svo eftir var tekið en þar var Gísli formaður, leiðbeinandi og leiðtogi. Við félagarnir stofnuðum ásamt fleiri kaupmönnum á Austurlandi, Kaupmannafélag Austurlands sem var deild innan Kaupmannasamtaka Íslands. Þar gegndi Gísli formennsku í upphafi og leiddi það félag til margra góðra verka á miklum umbrotatímum verslunar á Íslandi þar sem tekist var á um frelsi og heilbrigða viðskiptahætti.

Eftir að Gísli flutti frá Seyðisfirði hóf hann störf hjá þeim Hagkaupsfeðgum og fann sig vel í þeim verkefnum sem þar biðu hans en þá var Hagkaup að feta þann veg til aukins frelsis þar sem tekist var á við staðnað og úr sér gengið eftirlitskerfi og einokun. Gísli varð virkur félagi í JC hreyfingunni á Íslandi og stýrði þar ræðukeppnum og var þátttakandi í ræðuliði JC Reykjavík hvar hann vann til fjölda verðlauna enda afburða ræðumaður. Eftir að ég fluttist til Reykjavíkur árið 1985 hittumst við félagarnir mun oftar og það var alltaf hressilegt spjall og ánægjulegir vinafundir. Eftir að Hagkaupsárunum lauk hóf hann störf hjá Auglýsingastofu Ólafs Stephensen. Þar vann hann í nokkur ár ásamt því að halda ræðu- og sölunámskeið fyrir fólk og fyrirtæki. Námskeiðin hans Gísla voru vel sótt og vinsæl og hann þótti góður leiðbeinandi. Þetta var jú líf hans og yndi að vera innan um fólk, hlusta á fólk og tala við fólk. Um nokkurra ára skeið var Gísli fararstjóri erlendis, bæði í Karabíska hafinu og í Evrópu. Við áttum góða samveru þegar ég mætti til hans með syni mína á Rhodos í stutta heimsókn. Þar sá ég hversu vinsæll og góður leiðsögumaður Gísli var enda lifði hann sig vel inn í starfið. Nokkar ferðir fórum við saman ásamt strákunum mínum um páska til Seyðisfjarðar á skíði og minnast þeir þeirra ferða og samveru með miklum hlýhug. Um tíu ára skeið starfaði Gísli sem hótelstjóri á nokkrum stöðum á landsbyggðinni og líkaði vel. Síðustu árin starfaði hann hjá Íslandshótelum vítt og breitt um landið. Heimsótti ég hann nánast á hverju ári þar sem hann starfaði og naut samvista með honum. Það var stíll á mínum manni í þeim störfum því allt vildi Gísli gera vel og af fagmennsku.

Fyrir tæplega þremur árum greindist Gísli með krabbamein í hálsi og gekkst undir erfiða aðgerð. Meinið var fjarlægt en eftir stóð einstaklingur sem átti erfitt með að tjá sig og tala. Fyrir mann eins og Gísla Blöndal, þennan sterka persónuleika sem hafði tileinkað sér óaðfinnanlega framkomu og tjáningu þá var það þungur kross að bera. Eftir því sem á leið þyngdist sá kross og nú undir það síðasta kaus hann að halda sig mest til hlés. Við áttum þó góð samskipti með skilaboðum og heimsóknum og hann var skýr með allar hugsanir þótt getan til að tjá sig væri að mestu horfin. Við félagarnir hittumst og kvöddumst þremur dögum fyrir andlátið. Það var hlýtt og gott handtak – okkar síðasta handtak.

Elsku Elsa, Birna, Gylfi og Chloé, barnabörn, barnabarnabarn, systkini og aðrir ástvinir. 

Megi minningin um kæran vin, Gísla Blöndal, lifa að eilífu.

Minningarsíður

Nýleg andlát

Útfarir

Hlaðvarp

Þjónustusíða

Fræðsluefni

Gísli Blöndal

Andlátstilkynning

Útför

Aðstandendur

Gísli Blöndal - minning